Ua faalaeiauina e Malo Aufaatasi tagata uma ina ia galulue felagolagomaʻi, ia faaaloalo i aiā tatau a tagata, ma ia puipuia le siʻosiʻomaga. O le ā le māfuaaga? Na taʻua e Maher Nasser i le UN Chronicle e faapea, ua aafia tagata uma i “suiga o le tau, vaega o tagata solitulafono, faatupulaʻia o le faailogatagata, feteenaʻiga e lē mafai ona foʻia, tagata ua suʻe nisi atunuu e nonofo ai ona o faafitauli matuiā i o latou lava atunuu, faiga faatupu faalavelave i le lalolagi aoao, [ma] faamaʻi pipisi.”

O nisi ua latou faaauiluma le manatu e tatau ona pulea e se faigāmalo faaletagata e tasi le lalolagi atoa. E aofia ai Dante, o se faifilosofia, fatusolo ma o se alii tāua Italia (1265-1321) ma le saienitisi o Albert Einstein (1879-1955). Na talitonu Dante e lē mafai ona maua le filemu i se lalolagi e fevaevaeaʻi i faiga faapolotiki. Na ia toe taʻua le faamatalaga a Iesu Keriso i le faapea mai, ʻe faaumatia se malo e fevaevaeaʻi.’—Luka 11:17.

E leʻi umi talu ona mavae le Taua Lona Lua a le Lalolagi, lea na faaaogāina ai ni pomu atomika se lua, ae tusi loa Albert Einstein i le Fono Sili a Malo Aufaatasi e faapea, “E ao i le Malo Aufaatasi ona vave gaoioi e faia so o se mea ina ia maua ai se filemu i le lalolagi aoao, e ala i le faataatitia o ni faavae mo se faigāmalo faaletagata se tasi.”

Ae pe e mafai e tagata faipolotiki ona faia aʻe se faigāmalo malosi e lē aafia i faiga piʻopiʻo, le lē lava o le tomai ma pulega sauā? Po o le a sili atu lo latou leaga nai lo o isi na pule muamua? O nei fesili e faamanatu mai ai iā i tatou upu a le tusitala Peretania o Lord Acton e faapea: “E masani ona faaleagaina se tasi pe a ia maua le pule, ma o le pulega e leai ni ona tapulaa, o le pulega lenā e sili ona leaga.”

Ae ina ia maua le filemu moni, e tatau ona tatou autasi. Ae faapefea ona ausia lenā sini? Pe e mafai ona tupu lenā mea? O le tali a le Tusi Paia, ioe e mafai ma o le a ausia. E faapefea? E lē ala i se malo e faia aʻe i tagata faipolotiki lē lelei atoatoa, ae ala mai i se malo ua faavaeina e le Atua. O le a faamatilatila mai e lenā faigāmalo, e na o ia e iai le aiā e pule ai ae e lē o tagata. O le ā lenā malo? Ua faailoa mai e le Tusi Paia, “o le Malo o le Atua.”—Luka 4:43.

Sa faasino atu Iesu i le Malo o le Atua ina ua ia taʻua i lana tatalo faaaʻoaʻo e faapea: “Ia oo mai lou malo. Ia faia lou finagalo i le lalolagi.” (Mataio 6:9, 10) Ioe, ua faamautinoa mai e le Malo o le Atua le faataunuuina o le finagalo o le Atua i le lalolagi, ae e lē o faanaunauga o tagata fia pule ma manatu faapito.

Ua taʻua foʻi le Malo o le Atua o le “Malo o le lagi.” (Mataio 5:3) O le ā le māfuaaga? Ona e ui lava o le a pulea e lenei faigāmalo le lalolagi ae o le a pule mai i le lagi. E lē manaʻomia e lenei faigāmalo le tamaoaiga e faatupe ai, e pei o le aoina o lafoga. Maʻeu se mapusaga o le a iai mo tagata!

Ua faailoa mai i le faaupuga “malo,” o le Malo o le Atua o se malo tautupu. E iai lona Tupu, o Iesu Keriso o lē na tuu atu iai e le Atua le pule. O loo taʻua i le Tusi Paia e faatatau iā Iesu e faapea:

• “O le a i luga o lona tauʻau le pulega . . . E leai se mea e gata mai ai le tele o lana pulega . . . atoa ma le filemu.”—Isaia 9:6, 7.

• “Ua tuuina atu iā te ia le pule, o le mamalu ma le malo, ina ia auauna iā te ia o nuu, o atunuu, ma gagana uma. O lana pule . . . e lē mavae atu.”—Tanielu 7:14.

•   “Ua avea le malo o le lalolagi ma Malo o lo tatou Alii [o le Atua lea] ma lona Keriso.”—Faaaliga 11:15.

O le a faataunuuina le tatalo faaaʻoaʻo a Iesu, pe a faia atoatoa e le Malo o le Atua le finagalo o le Atua i le lalolagi. I lenā pulega, o le a aʻoaʻoina ai e tagata uma le auala e tausia ai le paneta ina ia lelei ma lauolaola.

E sili atu i lenā, e tutusa tapulaa o le a aʻoaʻoina ai e le Malo o le Atua ona tagata. O le a lē toe iai ni fevaevaeaʻiga. Ua taʻua i le Isaia 11:9 e faapea, “E latou te lē faia se mea e lamatia ai pe faaleagaina se mea . . . auā o le a tumu le lalolagi i le poto e uiga iā Ieova e pei ona ufitia o le ilititai i le suāsami.”

O le a autasia tagata uma ma nonofo filemu le tasi ma le isi i le lalolagi aoao, o se mea na manaʻo le Malo Aufaatasi e faataunuuina. Ua taʻua i le Salamo 37:11 e faapea, “E matuā faafiafiaina foʻi i latou ona o le tele o le filemu.” A o faagasolo taimi, o le a lē toe iai ni faaupuga e pei o le “solitulafono,” “polusione,” “mativa” ma “taua.” Ae o afea o le a tupu ai lenei mea? O afea o le a amata pule ai le Malo o le Atua i le lalolagi atoa? E faapefea ona faataunuu e le Malo o le Atua lenā tulaga? E faapefea ona e maua aogā mai i lenā pulega? Seʻi o tatou iloilo tali o na fesili.