O le popole o le auala lea e tali ai lou tino i se tulaga e sili atu nai lo o le mea e masani ai. E avatu e le faiʻai le tele o homone i vaega uma o le tino, lea e māfua ai ona vave le tātā o lou fatu, vave ai le gasologa o le toto, lapoʻa ma laʻitiiti ai le māmā, ma mālō ai maso o le tino. E vave ona gaoioi vaega o lou tino a o e leʻi iloa atoa le mea o loo tupu. Pe a uma lou popole, o le a lē toe tali atu lou tino i aafiaga o le popole ma toe foʻi ai i le mea e masani ai.

O le popole o se faalogona masani pe a tatou feagai ma luʻi po o tulaga e lamatia ai. O le tali mai o lou tino i le popole e amata mai i le faiʻai. O le popole lelei e uunaʻia ai oe e gaoioi pe tali atu i se auala vave. O nisi popole e fesoasoani iā te oe e ausia ai ou sini, pe faaleleia ai le auala e te faia ai mea e pei o le faia o se suʻega, se taaloga po o se faatalanoaga mo se galuega.

Peitaʻi, e mataʻutia āuga o le popole faaumiumi. Pe a faaauau pea ona tali atu le tino i le popole, o le a mafatia ai i le itu i le tino, itu tau faalogona ma le mafaufau. E ono suia foʻi lau amio e aofia ai le auala e te feutagaʻi ai ma isi. O tagata e maua i le popole faaumiumi e latou te inu tele i le ʻava malosi, faaaogā fualaau faasāina, ulaula ma le tele lava o isi masaniga leaga ina ia foʻia ai le popole. O le iʻuga e oo atu ai lava i le lotomafatia, lagona le fiu, ma mafaufau ai e pule i le ola.

E ui lava e eseese auala e aafia ai tagata i le popole, ae o le popole e mafai ona saosaolaumea i le tele o faamaʻi eseese. E mafai ona aafia ai le toetoe o vaega uma o le tino.