FAAMATALAGA A DAMI

I le taimi muamua, na foliga mai o se tigā masani o lona ulu. Ae ina ua faateteleina le tigā o le ulu o loʻu tamā, na vili loa e loʻu tinā le taavale a le falemaʻi. Ou te manatua le aveese atu o ia e ē galulue e faia galuega faafomaʻi. Ou te leʻi manatu o le taimi mulimuli lea ou te vaai ai iā te ia a o ola. Na maliu loʻu tamā i le tolu aso mulimuli ane i le maʻi o le aneurysm. E na o le ono oʻu tausaga i lenā taimi.

Na ou tuuaʻia aʻu i le tele o tausaga i le maliu o loʻu tamā. Na ou toe faaāta i loʻu mafaufau le taimi na aveese atu ai o ia e ē faia galuega faafomaʻi, ma fesili ifo, ʻAiseā na ou tūtū ai e aunoa ma le faia o se gaoioiga?’ Pe a ou vaai atu i ē ua loa le soifua o loo tauivi ma maʻi o le tino, ou te taumānatu, ʻAiseā ua soifua ai pea i latou ae oti loʻu tamā?’ A o faagasolo taimi na fesoasoani mai loʻu tinā e sasaa atu oʻu faalogona. E lē gata i lea, i le avea ai o i matou o ni Molimau a Ieova, na matou maua le lagolagosua malosi mai i le faapotopotoga.

E manatu nisi e mafai ona e faavauvau i le taimi lava e maliu ai se tasi ona mou ese atu lea, peitaʻi, e leʻi faapena loʻu tulaga. E ui na ou faanoanoa, ae na faatoʻā ou lagona le faavauvau ina ua ou talavou.

O laʻu fautuaga i fanau talavou ua maliu se tasi o mātua, “ia talanoa atu i se tasi e faatatau i ou faalogona. Atonu o le vave ona e faia faapea, o le lelei foʻi lenā mo oe.”

Ioe, e lē faigofie le lē iai o loʻu tamā a o tutupu ni mea tāua i loʻu olaga. Peitaʻi e faamāfanafanaina aʻu i le folafolaga o loo i le Tusi Paia i le Faaaliga 21:4, o loo taʻua ai ua toeitiiti ona soloiesea lea e le Atua o “loimata uma i o [tatou] mata, e lē toe iai se oti, po o se faanoanoa, po o se tagiauē, e lē toe iai foʻi se tigā.”

FAAMATALAGA A DERRICK

O nisi o taimi fiafia ou te manatua ai loʻu tamā, o le matou fagogota faatasi ma nonofo i faleʻie i luga o mauga. E fiafia o ia e alu i luga o mauga.

Na iai se taimi na iai se faafitauli i lona fatu; ou te manatua a o oʻu laʻitiiti, e pe tasi pe lua taimi na ou asiasi ai iā te ia i le falemaʻi. Ae ou te leʻi malamalama i le tugā o lona maʻi. Na maliu loʻu tamā i le iva o oʻu tausaga.

Ina ua maliu o ia, sa tele ina ou tagi. E pei ua lē mafai ona ou toe faia se gaoioiga, ma ou te leʻi fia talanoa i se isi. O le taimi muamua lea i loʻu olaga ua ou mafatia ai faapea, ma ou te leʻi toe fia faia se mea. Na faaalia e le ʻautalavou a le lotu na ou iai le naunau mai i le taimi muamua, ae na vave lava ona toe mou atu. Na latou faapea mai, “Ua oo i lona taimi” po o “Ua valaauina o ia e le Atua” po o “Ua i le lagi i lenei taimi.” E leʻi faamalieina moni aʻu i  nei faamatalaga, ae e leai soʻu malamalamaga e faatatau i aʻoaʻoga a le Tusi Paia i nei manatu.

Na amata ona suʻesuʻe e loʻu tinā le Tusi Paia ma Molimau a Ieova, mulimuli ane na ma auai ma loʻu uso i lana suʻesuʻega. Na matou aʻoaʻoina e faatatau i le tulaga o le tagata pe a oti, faapea le folafolaga faamāfanafanaloto a le Atua i le toetū. (Ioane 5:28, 29) Ae o le mau na sili ona fesoasoani iā te aʻu, o le Isaia 41:10: “Aua e te fefe, auā ou te faatasi ma oe. Aua e te vaai solo, auā o aʻu o lou Atua. Ou te faamalosi iā te oe. Ou te matuā fesoasoani iā te oe.” O se matuā faamāfanafanaloto le iloaina na faatasi mai Ieova a o oʻu feagai ai ma faalogona faavauvau, ma o loo fesoasoani mai pea i le taimi nei.

FAAMATALAGA A JEANNIE

Na maliu loʻu tinā i le kanesa, ae faatoʻā fitu oʻu tausaga. Ou te leʻi talitonu i mea na tutupu i lenā aso atoa. Ou te manatua na maliu loʻu tinā, ae o loo iai ona mātua i lo matou fale. Na toʻafilemu tagata uma. Ou te manatua foʻi na ʻai a matou fuāmoa i le afiafi. Na ou lagona e pei ua faasolosolo lemū ona suia atoa loʻu olaga.

I lenā taimi ma tausaga mulimuli ane ai, sa ou mafaufau e tatau ona ou lototele mo loʻu uso laʻitiiti, o lea ou te leʻi faailoa atu ai oʻu faalogona. E oo mai lava i le taimi nei, o loo taofiofi pea oʻu faalogona tigā ma e lē o se mea lelei.

Ou te manatua le alofa ma le lagolagosua na matou maua mai i le faapotopotoga o Molimau a Ieova i le vaipanoa na matou iai. E ui lava faatoʻā auai lo matou aiga i sauniga i le Maota mo Sauniga, ae na fesoasoani mai uso tapuaʻi, ma na pei lava ua leva ona matou masani. Ou te lē o manatua na toe kuka e loʻu tamā se meaʻai i le tausaga atoa, ona e tatala atu lava le faitotoʻa o loo iai i luma meaʻai.

O se tasi o mau e sili ona ou fiafia i ai, o le Salamo 25:16, 17. O loo taʻua ai le augani a le faisalamo i le Atua: “Ia liliu mai ou fofoga iā te aʻu ma ia e finagalo malie mai; auā ua na o aʻu lava ma ua ou puapuagatia. Ua tele lava mafatiaga o loʻu loto; ia e aveeseina aʻu mai i mea ou te tigā ai.” E faamāfanafanaina aʻu i le iloaina e lē tuulafoaʻia i tatou pe a mafatia. E fesoasoani le Atua iā i tatou. O le fesoasoani a le Tusi Paia, ua mafai ai ona ou faia pea mea masani o le olaga ma taulaʻi i itu lelei e pei o le folafolaga faamāfanafanaloto e uiga i le toetū. Ou te moomoo ia ou toe vaai i loʻu tinā ua ia maua le soifua mālōlōina lelei atoatoa, ma iloa le tele o mea e faatatau iā te ia.—2 Peteru 3:13.

Pe e te fia iloa atili e faatatau i le feʻau faamāfanafanaloto o loo i le Tusi Paia mo ē faavauvau? E mafai ona e kopiina mai le lomiga “Pe a Maliu se Tasi e Pele iā te Oe.” Tagaʻi i le www.dan124.com/sm i le vaega LOMIGA > TUSI MA POLOSIUA.