Peitaʻi i le taimi e tasi, na mātauina e nisi tagata o le toʻatele o talavou e faaalu le tele o le taimi i le faatekinolosi, e tele ina . . .

• pulea i latou e masini faaonapōnei.

• taufaamataʻu i luga o le initaneti.

• matamata i ata matagā taufeusuaʻiga e tusa lava pe latou te lē mananaʻo i ai.

PULEA

O nisi o mea i luga o le initaneti e pei o taaloga, e mafai ona matuā pulea ai se tasi ma e matuā faigatā ona taofia. Na taʻua e le tusi Reclaiming Conversation, “o polokalame i le telefoni na fuafuaina ina ia pulea ai i tatou e le telefoni.” O le tele e tatou te faaaogā ai na polokalame, o le tele foʻi lenā o tupe e maua e kamupani e ona na polokalame.

IA MAFAUFAU I AI: Po ua tele naʻuā le taimi a fanau e faaalu i masini faaonapōnei? E faapefea ona e fesoasoani iā te ia e faaaogā tatau le taimi?​—EFESO 5:15, 16.

TAUFAAMATAʻU

O nisi tagata ua latou faaalia uiga lē faaaloalo pe a faaaogāina le initaneti, lea e iʻu atu ai i le taufaamataʻu i isi.

O isi ua faaalia uiga lē faaaloalo ona e mananaʻo e uaʻi atu tagata iā i latou ma ia lauiloa. O isi e tigā o latou faalogona pe a iloa e lē o valaauliaina i latou i se patī.

IA MAFAUFAU I AI: Po o faaalia e lau fanau uiga lē faaaloalo i luga o le initaneti? (Efeso 4:31) Pe e tigā o latou faalogona pe a iloa pe faalogo ua lē faaaofia i latou i mea e fai e isi?

ATA MATAGĀ

E faigofie ona maua ata matagā taufeusuaʻiga i le initaneti. E iai polokalame e mafai ai e mātua ona pulea mea e faia e o latou fanau i le initaneti. Peitaʻi, e lē o taimi uma e lelei ai lenā auala ma e mafai lava ona matamata le fanau i mea leaga.

O se solitulafono le lafoina po o le mauaina o ata matagā taufeusuaʻiga i feʻau tusitusia. I nisi tulaga, e fua i le tulafono ma le matua o lē o loo aafia, e mafai ona molia i latou e lafoina na ata i le faasalalauina o ata matagā o tamaiti.

IA MAFAUFAU I AI: E faapefea ona e fesoasoani i lau fanau e tetee i le faaosoosoga o le matamata po o le lafoina o ata matagā i le initaneti?​—EFESO 5:3, 4.

TOLENI LAU FANAU

E ui e faigofie i le fanau le faatekinolosi, ae e latou te manaʻomia le fesoasoani. Na taʻua e se tusi, o se lamatiaga le faataga o le fanau e faaaogā le initaneti e aunoa ma le toleniina o i latou i le auala e faaaogā ai ma le saogalemu.

Ia filifili se fautuaga e te manaʻo e faataʻitaʻi pe tusi sau oe lava auala.

• Ia talanoa i lau tama i le auala e faaalia ai le faaaloalo i luga o le initaneti

• Ia fesoasoani i lau tama ia manumalo mai i faalogona o le lē amanaʻia

• Ia faia mea uma e te mafaia ina ia puipuia ai lau tama mai mea leaga i le initaneti

• Ia fai ma siaki po o ā mea o loo i le telefoni a lau tama

• Ia faatapulaa le faaaogāina o lana telefoni i aso taʻitasi

• Ia faasā le faaaogāina o le telefoni aemaise pe a oo i le taimi e moe ai

• Ia faasā le faaaogāina o telefoni i taimi o le taumafataga a le aiga