Le Tāua o le Iloaina e Iai Sē na Foafoaina Mea
Aiseā e tāua ai le iloaina pe e iai Sē na foafoaina mea? Pe afai ua e talitonu i faamaoniga e iai se Atua e ou le malosi uma lava, atonu la e te manaʻo e iloilo faamaoniga e iloa ai o le Tusi Paia na faagaeeina e le Atua. Pe a e maufaatuatuaina le Tusi Paia, o le a e maua ai aogā nei:
Mauaina o se olaga faamalieina
LE MANATU O LE TUSI PAIA: “Na ia [le Atua] foaʻi mai le timu mai i le lagi ma fuata o le tau, na foaʻi mai foʻi le anoanoaʻi o meaʻai ma ua tutumu ai o outou loto i le olioli.”—Galuega 14:17.
LE UIGA: O mea uma e tatou te olioli ai i le lalolagi, o meaalofa mai i Lē na foafoaina mea. O le a atili ona e talisapaia nei meaalofa pe a e iloa e manatu mamafa mai o Ia iā te oe.
Maua ai fautuaga aogā e fesoasoani iā te oe i le taimi nei
LE MANATU O LE TUSI PAIA: “Ona e malamalama ai lea i le amiotonu, o le faamasinotonu ma le amio saʻo, o ala lelei uma ia.”—Faataoto 2:9.
LE UIGA: Talu ai o le Atua o Lē na foafoaina mea, e na te silafia lelei mea e manaʻomia ina ia tatou maua ai le fiafia. Pe a e faitau i le Tusi Paia, o le a e maua ai lesona e aogā iā te oe i le taimi nei.
Maua ai tali o au fesili
LE MANATU O LE TUSI PAIA: ʻE te maua ai le poto i le Atua.’—Faataoto 2:5.
LE UIGA: O le iloaina o loo soifua Lē na foafoaina mea, e fesoasoani iā te oe e maua ai tali o fesili tāua e pei: O le ā le fuafuaga o le olaga? Aiseā ua tele ai mafatiaga? O le ā e tupu pe a tatou feoti? E mafai ona e maua tali faamalieloto i le Tusi Paia.
Mauaina o se faamoemoe mo le lumanaʻi
LE MANATU O LE TUSI PAIA: “ʻUa ou iloa lelei manatu ua ou manatu ai iā te outou,’ ua fetalai mai ai Ieova, ʻo manatu o le filemu ae e lē o le malaia, ma ia avatu iā te outou se lumanaʻi ma se faamoemoe.’”—Ieremia 29:11.
LE UIGA: Ua folafola mai e le Atua o le a ia aveesea i le lumanaʻi le amioleaga, mafatiaga, ma le oti. Pe a e faatuatuaina folafolaga a le Atua, o le a fesoasoani le faamoemoe mo le lumanaʻi e te fesagaʻia ai ma le lototele ou faafitauli.
E te Ono Fiafia Foʻi
ALA MAI!
Le Ala e Maua ai le Fiafia—Se Fuafuaga i le Olaga
O le saʻilia o tali faamalieloto i fesili tāua o le olaga, o se tasi lea o vala e sili ona tāua i le mauaina o le fiafia.
ALA MAI!
O le ā le Manatu o le Tusi Paia e Faatatau i le Foafoaga?
O loo taʻua i le Tusi Paia e ono “aso” na faia ai le foafoaga. Pe e taʻi 24 itula i le aso?
