O le ā e Tatou te Aʻoaʻoina Mai i Meafaiola?
O meafaiola o loo siʻomia ai i tatou e tuputupu aʻe, e gaoioi ma fanafanau. E latou te faamatagofieina lo tatou lalolagi. Ua sili atu le iloa e tagata o nei meafaiola i le taimi lenei, nai lo o se isi taimi. O le ā ua faailoa mai e meafaiola e faatatau i le amataga o le ola? Ia mātau manatu o loo mulimuli mai:
E foliga mai na foafoaina le ola. E faia aʻe meafaiola i ni mea ninii e taʻua o sela. E tele mea lavelave e faia e nei sela ina ia faatumauina ai le ola o se meafaiola ma ia fanafanau. E moni lenei manatu e oo lava i meafaiola ninii. O se faataʻitaʻiga o nei meafaiola ninii, o sela o le mea faafefete lea e fai ai le falaoa. Pe a faatusatusa nei sela i sela o le tagata, e ono foliga mai e faatauvaa. Peitaʻi, e matuā lavelave lava nei sela. I le ogatotonu o sela taʻitasi, e iai le DNA lea e na te faatonutonuina le sela. E mafai foʻi e sela taʻitasi ona liua vailaau e avea ma meaʻai, lea e manaʻomia mo le ola o le sela. Pe a lē maua e sela ni meaʻai, o le a lē toe gaoioi. O le māfuaaga lea e umi ai ona teu se mea faafefete, ae a oo i le taimi e faaaogā ai o loo aogā pea.
Ua tele tausaga o suʻesuʻe e saienitisi sela o le mea faafefete, ina ia malamalama atili ai e faatatau i sela o tagata. Peitaʻi, e tele lava mea e latou te lē o malamalama i ai. Ua faapea mai Ross King o se polofesa i le Chalmers University of Technology i Suetena: “E lē lava saienitisi i le lalolagi e faia suʻesuʻega ina ia malamalama ai i meafaiola ninii e pei o le mea faafefete.”
O le ā sou manatu? Pe e faamaonia i sela o le mea faafefete e iai Sē na foafoaina mea? Pe na teʻi lava ua iai?
E maua le ola mai i meafaiola. Ua faia aʻe le DNA i ni tuufaatasiga o vailaau e taʻua o le nucleotides. E 3.2 piliona nucleotides i sela taʻitasi o le tagata. Ua faatulagaina nucleotides i se auala maopoopo, ina ia mafai ai e le sela ona faia enzymes ma polotini.
Ua taʻua e saienitisi e lē mafai ona teʻi lava ua tuufaatasia nucleotides ina ia maua ai le DNA.
O le mea moni, e leai se faamaoniga faasaienisi e mafai ona tupuga mai le ola i se mea e leai se ola.
E ese le ola o le tagata mai i isi meafaiola. E iai i tagata uiga lea e mafai ona olioli ai i le ola, i auala e lē mafai ona faia e isi meafaiola. Ua iā i tatou foʻi tomai faapitoa ma faalogona. E mafai ona tatou iloa tofo eseese, manogi, leo ma lanu. E tatou te faia fuafuaga mo le lumanaʻi ma saʻili se fuafuaga mo le olaga.
O le ā sou manatu? Pe na teʻi lava ua iai nei tomai ma uiga iā i tatou? Pe e faamaonia ai o le ola o se meaalofa mai i Lē na foafoaina mea?
E te Ono Fiafia Foʻi
ALA MAI!
Sela o Lou Tino—O Loo Iai Faamatalaga
Aiseā na lafoaʻia ai e ni saienitisi atamamai o la talitonuga e faatatau i le evolusione?
