Atonu e te manaʻo e vave ona suia mea uma lava i lou olaga. Ua e faapea ifo, ʻO le vaiaso lenei ou te lē toe ulaula ai, ou te lē toe palauvale, ou te lē toe ala umi i le pō, amata ona ou faamalositino, ʻai meaʻai paleni, ma vili atu i mātua o oʻu mātua.’ Peitaʻi, o le taumafai e ausia ou sini uma i le taimi e tasi, e mautinoa e uma ane ai e leai ma se mea e ausia!

O le tagata faamaulalo e fuafua lelei. E na te amanaʻia e tapulaa lona taimi, malosi, ma ana meafaitino. O lea, nai lo o le taumafai e suia mea uma i le taimi e tasi, e faasolosolo ona ia faia ni suiga.

Ia faasolosolo ona galue i se masaniga se tasi pe lua. E ono fesoasoani laasaga nei iā te oe:

1. Ia fai ni lisi se lua, o le lisi o masaniga lelei e te manaʻo e atiaʻe, ma le lisi o masaniga leaga e ao ona e ʻalofia. Aua le gata ai i inā mea e tusia i au lisi; ia tusi i lisi uma e lua le tele o mea e te mafaufau i ai.

2. Ia faatulaga lelei au lisi e amata mai i mea e tāua iā te oe.

3. Filifili ni masaniga e tusa pe na o se tasi pe lua mai i lisi uma e lua, ma uaʻi patino atu i na masaniga. Pe a uma, ona faasolo lea i isi masaniga o loo sosoo ai i au lisi.

Ia vave ona galue i nei lisi e ala i le suia o se masaniga leaga i se masaniga lelei. O se faataʻitaʻiga, afai o loo i lau lisi o masaniga leaga le tele o le taimi e matamata ai i le TV, ae o loo i lau lisi o masaniga lelei le fesootaʻi pea ma ē e pele iā te oe, e te ono filifili la: ʻOu te taunuu loa i le fale i aso uma mai i le galuega, vili loa saʻu uō po o soʻu tauaiga e talanoa i ai, nai lo o le ki o le TV.’