Na tusi Aristotle e faatatau i le suʻesuʻega i le vanimonimo, paiolo, tapulaa i amioga, gagana, tulafono, faamatalaga e faamaonia ai le moni o se mea, malosiaga o maneta e pipii ai mea, suʻesuʻe faamaoniga o le iai moni o se mea, fegaoioiaʻiga o mea, mea e maua ai le faamalieina, solo, faapolotiki, suʻesuʻeina o le mafaufau, tomai e faaaogā ai gagana ma isi mataupu, faapea lona talitonuga e leai se vaega o le tagata e ola pea pe a oti o ia. Ae o mataupu na sili ona lauiloa ai Aristotle, o ana suʻesuʻega i le paiolo ma faamaoniga o le iai moni o se mea.

Na faalagolago tagata atamamai Eleni anamua i o latou tomai e mātau ai le tulaga o mea, faia faaiʻuga, ma le tomai e faamaonia ai le iai moni o se mea, ina ia faamatala ai le lalolagi. E amata a latou suʻesuʻega i mea moni. Na latou talitonu pe afai e latou te iloiloina lelei na mea moni, ona mafai lea ona latou faia ni faaiʻuga saʻo.

E faavae mai i lenā auala na latou faia ai le tele o faaiʻuga talafeagai, ma o se tasi o na faaiʻuga o le iloaina lea o le auala e gaoioi ai mea i le vateatea. Peitaʻi, sa gata lo latou iloa i mea na latou vaaia, o se faafitauli sa taʻitaʻisesēina ai le toʻatele o tagata atamamai e aofia ai Aristotle. O se faataʻitaʻiga,  na latou talitonu na faataamilo paneta ma fetu i le lalolagi. I lenā taimi, sa manatu i lenā talitonuga o se mea moni. Ua taʻua i le tusi The Closing of the Western Mind: “E foliga mai o o latou manatu ma mea na latou iloa, ua faamaonia ai le talitonuga Eleni o le lalolagi o loo i le ogatotonu o le vateatea.”

E itiiti aafiaga o lenā manatu sesē pe ana faapea e gata ai i le faasaienisi. Ae e lē o le tulaga lenā sa iai.

I atunuu Kerisiano i Europa i le vaitau pe tusa o le 500 T.A. agaʻi i le 1500 T.A., na taliaina ai e le lautele nisi o aʻoaʻoga a Aristotle e faapea e moni. Na tupu lea tulaga ina ua uma ona faaaofia e faiaʻoga o le Katoliko Roma e pei o Thomas Aquinas (pe tusa o le 1224-1274) tusitusiga a Aristotle i a latou aʻoaʻoga. O lea, na avea ai o se vaega o aʻoaʻoga a le Katoliko le manatu o Aristotle, e tumau pea le lalolagi i le ogatotonu o le vateatea. Na taliaina foʻi lenā aʻoaʻoga e taʻitaʻi lotu Porotesano e pei o Calvin ma Luther, ma faapea mai e ōgatusa ma le Tusi Paia lenā aʻoaʻoga.—Tagaʻi i le pusa “ Na Latou Faauigasesē le Tusi Paia.”

Na taʻua e le tusitala o Charles Freeman: “Na faigatā ona iloa le eseesega o [aʻoaʻoga a Aristotle] ma aʻoaʻoga a le Katoliko.” Na iai manatu e faapea na liliu e Aquinas ia Aristotle i le talitonuga Katoliko. Ae o le mea moni na tusi Freeman, “na liliu Aquinas i talitonuga a Aristotle,” ma e foliga mai o le mea foʻi lenā na tupu i le lotu. Ae e iai sē na suʻesuʻeina le vateatea ma o se tagata tomai i le matematika e igoa iā Galileo, na ia faailoa atu ana saʻiliʻiliga e faapea e faataamilo le lalolagi i le lā. O le iʻuga, na ave Galileo i luma o le faamasinoga a le lotu, ma faamalosia o ia ina ia lafoaʻi ona talitonuga. * Na iloa e Aristotle o loo alualu pea i luma le poto faasaienisi, ma e mafai ona toe suia. Maumau pe ana faapena foʻi manatu o lotu!