Pe e Manaʻomia Moni ea Tuigā Toto?

IA NOVEMA i le 1998, na lāgā ai le fesili o i luga i se mataupu i le nusipepa na tusia e Dr. Ciril Godec, o le taʻitaʻifono o se vaega o vailaau mo togafitiga o totoga fanautama i Long Island College Hospital, i Brooklyn, New York. Sa ia tusi faapea: “I aso nei, o le toto atonu o le a lē talia aloaʻia o se vailaau mo togafitiga, talu ai o le a lē faataulauina e le toto faatulagaga saogalemu a le Pulega o Meataumafa ma Vailaau (Food and Drug Administration). O le toto o se totoga o le tino, ma o le tuigā toto o le avatuina moni lava lea o se totoga ese e sui ai se isi totoga.”

Na mātauina e Dr. Godec e faapea: “O le avatuina o se totoga ese e sui ai se totoga o se togafitiga mulimuli lava lea e ofoina atu i tagata mamaʻi. Ona talu ai e ono iai ni āuga matuiā e mulimuli ane tulaʻi mai, e matuā faailoa manino atu ai lava i tagata mamaʻi togafitiga eseese uma e mafai ona faaaogāina a o leʻi avatua se totoga ese e sui ai.” E tusa ai i le tuigā toto, na ia faaiʻu mai faapea: “Ua matuā fesiligia lona aogā ua faapea ona talia ai e le toʻatele o fomaʻi tipitipi se filosofia ina ia ʻalofia tuigā toto’ e lē gata i mafuaaga faafomaʻi ae faapena foʻi ma mafuaaga faaletulafono.”

O se faafitauli tele i tuigā toto ona e faitau afe tagata ua pisia i faamaʻi e iʻu ai i le oti, e aofia ai ma le AIDS. E ui ua faaleleia auala e suʻesuʻeina ai toto mai faamaʻi i le tele o nofoaga, ae na faailoa mai e Dr. Godec e faapea: “O le lamatiaga e mafai ona iai e tulaʻi mai lea i toto o loo foaʻi mai e tagata taʻitoʻatasi o ē ua pīsia ae e leʻi oo i le taimi e faatupuina ai i lona toto sela e tetee atu ia e mafai ona iloa ai ua pīsia i le taimi e suʻesuʻeina ai.”

I le faaiʻuina o lana mataupu, na faatū aʻe ai e Dr. Godec le fesili na lāgā i le matua o le mataupu: “A o faaleleia le malamalama o fomaʻi ma fomaʻi tipitipi e tusa i galuega ma gaoioiga a le okesene i le tino ma iloa ai o le fua o le hemoglobin e lē manaʻomia ona maualuga tele e pei ona sa manatu i ai muamua, ua toetoe ai lava la mafai e i latou i taimi uma ona maua togafitiga ese e sui ai tuigā toto. E leʻi mamao atu pe tusa o le tausaga ua teʻa, o taotoga sili ona faigatā e suia ai fatu ma ate na manatu i ai e tele se vaega o le toto na maʻimau ai ma na manaʻomia ai e lē aunoa le tele o se toto e toe sui ai. I le taimi nei, ua faia uma na taotoga e aunoa ma le faaaogāina ai o ni tuigā toto.

“E mafai moni i se taimi lata mai i le lumanai ona matuā lē toe faaaogāina lava tuigā toto. . . . O tuigā toto e lē gata e taugatā ae e mataʻutia foʻi; e lē o avatua e tuigā toto le tausiga silisili atu ona lelei lea e tatau ona mauaina e tagata mamaʻi.”