Iloiloina le Moni o Tala

E ESEESE lava auala e tali atu ai tagata i tala faaonaponei e uiga i fesootaʻiga ma agelu. Muamua, e iai tagata e talitonu i nei tala. Ua latou finau mai faapea, talu ai le anoanoaʻi o na tala ma ua taatele, atonu ai lava e moni. Lona lua, o i latou e masalosalo i ai. Ua latou faapea mai, e leai se faamaoniga maumaututū e lagolagoina ai na manatu. O loo latou finau e faapea, e lē avea le taatele o se talitonuga ma māfuaʻaga e moni ai. Manatua foʻi, na iai se taimi na talitonu ai tagata faapea e iai ni teine siʻusiʻuiʻa. Lona tolu, e iai i latou o ē e leai lava so latou manatu e faia i le matāʻupu. I le faamatalaina o lenei vaʻaiga lē faaituʻau, ua taʻua ai e le tusi Angels—Opposing Viewpoints e faapea: “E toʻatele tagata e faapea mai ua latou vāʻai i agelu. E lē mafai ona faamaonia nei vaʻaiga; ua latou talitonu maumauaʻi i se mea e leai se faamaoniga. Peitaʻi, e leai foʻi ma se tasi o le ʻaumasalosalo o faamaonia mai le sesē o o latou manatu, ma e toʻaitiiti foʻi nisi na taumafai.”

 E toʻatele tagata e ioe mai faapea o le Tusi Paia o se puna maufaatuatuaina o faamatalaga e uiga i le nofoaga o agaga. * E mafai ona fesoasoani ia i tatou e fuafua lelei ai le moni o tala faaonaponei e uiga i agelu. Atonu ua e silafia, ua faamautinoa mai e le Tusi Paia ia i tatou faapea o agelu o ni foafoaga agaga moni, e mālolosi tele, ma mamalu. O loo iai i le Tusi Paia tala e faatatau i agelu sa latou momoli maia feʻau ma laveaʻi auauna a le Atua mai mea leaga.—Salamo 104:1, 4; Luka 1:26-33; Galuega 12:6-11.

E faamaonia foʻi e le Tusi Paia e iai agelu leaga. O foafoaga agaga nei o loo latou maileia ma taʻitaʻi sesē tagata, ua faaliliu ese i latou mai le Atua. (2 Korinito 11:14) Ona o se māfuaʻaga lelei, ua lapataʻi mai ai le Tusi Paia: “Aua tou te faalogo i agaga uma lava, a ia outou tofotofo i agaga pe mai le Atua i latou.” (1 Ioane 4:1) Mo se faaaʻoaʻoga, a o tatou leʻi talitonu i ni valoaga e folafola mai e se tasi ua faapea mai o ia o se perofeta, e atamai tele ona tatou faatusatusa atu mea o loo ia fai mai ai ma le Afioga a le Atua, lea e ono faapea mai o loo fai ai o ia ma sui. E mautinoa, e tatau foʻi ona faapena le auala e ao ona tatou vāʻiliʻilia ai le moni o tala uma faaonaponei e uiga i le faaali mai o agelu. E faapēfea la, ona faatusatusa atu tala o fesootaʻiga ma agelu i ona po nei, ma mea o loo faamauina i le Tusi Paia?

E Lē Tutusa le Tulaga Moni o Agelu ma le Manatu o Loo Talitonu i ai le Toʻatele

Seʻi o tatou amata e ala i le faamanino lelei o manatu sesē e lua ia o loo taatele nei e faatatau i agelu. E ese mai le talitonuga o loo taatele, sa leʻi amataina e agelu o latou olaga o ni tagata. Sa latou iai i le lagi a o leʻi taitai lava foafoaina e le Atua le ola i luga o le lalolagi. Ua faapea mai le Tusi Paia i le taimi na ‘faavaeina ai [e le Atua] le lalolagi, na alalaga fiafia ai atalii [agelu] uma o le Atua.’—Iopu 38:4-7.

O le isi manatu sesē faaonaponei e faapea e tuufau lava ma faataga e agelu le faia o measesē. Na i lo lea, e lagolagoina e agelu faamaoni tapulaa amiotonu a le Atua ma gaoioi e tusa ai ma lana taʻitaʻiga. O loo latou auauna atu i le Atua, ae lē i tagata.—Salamo 103:20.

E Naunau Mai Agelu i lo Tatou Lelei Faaleagaga

I tala lata mai nei e uiga i agelu, e anoanoaʻi tala e faatatau i laveaʻiga na fai. I se tasi o tusi e sili ona alumia, tatou te faitau ai i le tala i se teineitiiti na taʻitaʻi fīlēmū ese e se lima sa leʻi mafai ona iloa atu, mai se fale na mu. O le isi tusi o loo taʻua ai ni tama aʻoga o se kolisi na saisaitia i totonu o le la taavale ona o le tetele o le kiona. Ae na faafuaseʻi lava ona oo atu se loli ma toso ese mai le la taavale i se vaipanoa saogalēmū, ae leai ma ni tulaga paʻu o se loli e iloa atu! I se isi tusi, o loo taʻua ai se tala e uiga ia Ana, o lē na maua i le kanesa. A o toe tolu aso alu atu i le falemaʻi mo lona taʻotoga, na alu ane ai i lona fale se tagata umī lava e lē masani ai. Na ia faailoa mai o ia o Tomasi ma faapea mai na aauina mai o ia e le Atua. Na sii aʻe e Tomasi lona lima, ma lagona ai e Ana se malamalama paʻepaʻe ae vevela o ati atu i lona tino. Ina ua taunuu o ia i le falemaʻi mo lona taʻotoga, na matuā māofa lava fōmaʻi. Ua leai sona kanesa!

O nei tala e manino lava le lāgā ai o se fesili, Pe  afai e tofu le tagata ma sana agelu leoleo, aiseā la ua laveaʻiina ai nisi tagata, ae lē laveaʻiina le toʻatele o isi? E lē mafaitaulia le fia miliona o tagata ua maliliu mai faamaʻi, o taua, o oge, ma mala faalenatura. E mautinoa lava, e toʻatele sa tatalo faatauanau atu mo se fesoasoani. Aiseā la na lē laveaʻia ai i latou e se agelu leoleo?

O loo ofo mai e le Tusi Paia se fesoasoani i lenei fesili. O loo taʻu mai ai faapea e lē faailoga tagata le Atua. (Galuega 10:34) E lē gata i lea, e ui ina naunau mai agelu faamaoni a le Atua mo lo tatou lelei faaletino, ae sili atu ona latou naunau mai i lo tatou lelei faaleagaga. Na faafesili mai e le aposetolo o Paulo lenei manatu: “E le o [agelu] e auauna ea i latou uma, ua aauina e auauna ona o i latou o e a maua le ola?” (Eperu 1:14) O fesoasoani faaletino e lē tūmau ni aogā e maua mai ai, peitaʻi o fesoasoani faaleagaga e mafai ona aumaia aogā e faavavau.

O tala e uiga i agelu e foliga mai e faalētāua. Ua faapea mai e fesoasoani atu agelu i se tinā vaivai ina ia sui ie o lona moega, e faamanatu atu i se tagata o loo fai sana faatau ina ia manatua e faatau ni afitusi, ma fesoasoani atu i avetaavale i le sāʻilia o ni pākaga o a latou taavale. E tala ata mai se tamaʻitaʻi talavou i Sikotilani faapea: “Ua tolu nei vaiaso talu ai o paka laʻu taavale i se vaipanoa e lē tatau ona paka ai i St Mary’s Street, ae na ou ōle atu i laʻu agelu ina ia ona puipuia laʻu taavale i le alofa ma le agalelei. So o se leoleo taavale lava e ono alu ane i ai ia matuā faatumulia i latou i faalogona alofa ma latou lē faasalaina ai aʻu. E leʻi faasalaina lava la aʻu.” E lētioa lava faatusatusa e nisi tagata agelu leoleo o ona po nei i se tināfai agaalofa po o le Tamā o le Kirisimasi mo tagata matutua.

E Lē Feteenaʻi Agelu Faamaoni ma le Afioga a le Atua

Ua faatumulia tusi e uiga i agelu i alagāupu ma fautuaga e peiseaī e auina mai le nofoaga o agaga. Mo se faataʻitaʻiga, e iai se tusi faapea o loo iai aʻoaʻoga na faamatalatala mai e le agelu sili o Mekaeli i se fafine i Colorado, i le Iunaite Setete o Amerika. O se tasi lenei o “faamatalaga” na aumai ia Mekaeli: “O auala uma lava e tau atu i le Atua. O talitonuga uma, o upu moni uma o le malamalama e tau atu i le Atua.” I se faaeseesega, na fetalai Iesu, e na o le lua lava auala faalotu ma e na o le tasi o na auala e  mauaina ai le finagalo malie o le Atua ma e tau atu i le ola e faavavau. O le isi auala e lē faamaonia e ia ma e tau atu i le faaumatiaga e faavavau. (Mataio 7:13, 14) E manino lava, e lē mafai ona moni uma nei faamatalaga.

O le ā le tulaga o “agelu” o “le tulaga faaleagaga fou” e tusa ai o faaipoipoga ma tulaga tauamio mamā? I se tasi o tusi, na faitau ai se tagata i se tala e uiga ia Rosana o lē na taʻu atu i ai e lana “agelu” e faapea: “E toʻatele tagata e tatau ona e faamasani atu i ai, ma o lou tūmau i [lau tane] e lē o le olaga lena e tatau ona e ola ai. E te alofa ia te ia ma e alofa foʻi o ia ia te oe, ae ua oo i le taimi ua tatau ai ona lua teteʻa.” Sa tatala loa e Rosana lana faaipoipoga. Peitaʻi, e faaalia e le Tusi Paia faapea, e ʻinoʻino le Atua i talagā faaipoipoga e aunoa ma ni māfuaʻaga talafeagai. (Malaki 2:16) O le isi tala o loo taʻua ai ni tagata se toʻalua na la faia le mulilua, i lo la talitonuga faapea o loo fiafia i ai agelu ia o loo matamata mai ma siʻomia i laʻua i se siʻomaga e peiseaī e mamalu. Peitaʻi o loo faapea mai le Tusi Paia: “Aua e te mulilua.”—Esoto 20:14.

Faamata ea o nei feʻau faaonaponei atonu ua toe faafouina ai tusitusiga a le Tusi Paia? E leai, e lē suia le Afioga a le Atua. Na tusi atu le aposetolo o Paulo i nisi i le uluaʻi senituri e faapea: “Ua ou ofo ina ua faapea ona vave liliueseina o outou i le na valaauina outou i le alofa tunoa o Keriso, a e faasaga i le tala lelei e ese; e le se tasi tala lelei foi lea; a ua i ai nisi tagata ua faaatuatuvale ia te outou, ma fia faaliliueseina le tala lelei a Keriso. A e peitai, e ui lava ina talaʻiina e i matou, po o se agelu mai le lagi, ia te outou se tala lelei e ese i lea na talaʻiina atu ai e i matou ia te outou, ia anatema ia.”—Kalatia 1:6-8.

“Valaʻau Atu i Agelu Uma!”

Pe tatau ea ona tatou talosaga atu i agelu mo se fesoasoani e feagai ai ma faafitauli ma lamatiaga i le olaga? O le matāʻupu autū lena i le tele o tusi. O nisi nei o faaaʻoaʻoga e lua. Ua faapea mai o loo faaalia e le tusi Ask Your Angels i lana ʻaufaitau ‘le auala e mafai ona latou maua ai le mana o agelu ina ia mafai ona latou toe fesootaʻi atu i o latou faalogona loloto ma uiga tōtino autū sa mou atu, ma ina ia ausia ai o latou sini.’ O se isi tusi e tali faapena foʻi o le Calling All Angels!: 57 Ways to Invite an Angel Into Your Life (Valaʻau Atu i Agelu Uma!: 57 Auala e Valaʻaulia ai se Agelu i Lou Olaga).

Peitaʻi, e leʻi fautuaina lava i tatou e le Tusi Paia e talosaga atu i agelu. Na faamanino mai e Iesu lenei manatu i le tatalo faaaʻoaʻo. Na ia fetalai: “O lenei, ia faapea outou ona tatalo, Lo matou Tamā e, o i le lagi . . .” (Mataio 6:9) Na faapena foʻi le tusi mai a le aposetolo o Paulo: “Ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai.”—Filipi 4:6.

I le Igoa o Agelu

E matuā faamamafa e “le tulaga faaleagaga fou” le tāua o le iloaina o igoa o agelu. Ua aumaia e tusi lauiloa e uiga i agelu ni igoa taumatemate o le faitauafe o agelu. Aiseā? E lē ina ia faamalie ai le uiga fiailoa; ina ia valaʻau ai mo le faatinoina o o latou tofiga. E fesootaʻi vāvālalata lenei gaoioiga ma faiga faataulāitu. Ua taʻua e le Encyclopedia of Angels e faapea, e lē gata i sauniga masani faalotu, o mea e faaaogā i faiga faataulāitu, ma talotaloga faaletapuaʻiga mo ni fesoasoani, ae o “le faaaogāina o ‘igoa o mana,’ po o igoa o agaga patino, e tatala mai ai ni faalogona mālolosi ma tatalaina ai le faitotoʻa i le va o le nofoaga faitino ma le nofoaga o agaga, ma mafai ai e lē o loo faia mea faataulāitu ona . . . talanoa atu i agaga.” Peitaʻi, e matuā manino lava le faamatalaga a le Tusi Paia: “Aua foi le fai togafiti faataulāitu.”—Levitiko 19:26.

E na o le lua lava agelu faamaoni o loo faailoa mai e le Tusi Paia o la igoa, o Mekaeli ma Kaperielu. (Tanielu 12:1; Luka 1:26) I le taʻuina mai o nei igoa, e faaalia ai e le Tusi Paia o agelu o ni peresona agaga e tutasi lava latou. Aiseā na lē taʻu mai ai ma nisi igoa? E foliga mai o le māfuaʻaga ina ia puipuia tagata mai le faaeaea atu i agelu o se tofiga o ni mamalu e lē tatau ona latou maua—o se mea e oo lava i agelu latou te lē fia mauaina. O lea, ina ua fesili atu Iakopo i le agelu e faailoa ane lona igoa, sa musu le agelu. (Kenese 32:29) Mulimuli ane, o le agelu lea na faaali atu ia Iosua sa ia faailoa mai o ia lava, e lē i sona igoa ae na faapea mai o ia o le “ave ʻau a Ieova.” (Iosua 5:14) E faapena foʻi ina ua fesili atu le tamā o Samasoni i se agelu po o ai lona igoa, sa taʻu ane e le agelu ia te ia: “O le a le mea e te fesili mai ai i loʻu igoa, auā e silisili ese ia”? (Faamasino 13:17, 18) E mananaʻo agelu faamaoni a le Atua ina ia tatou faamamaluina le Atua ma valaʻau atu ia te ia, na i lo i latou.

[Faaopoopoga i lalo]

[Faamatalaga faaopoopo i le itulau 6]

“Mo i latou e faigofie ona iai lagona faapea ua faasāsā naʻuā le Atua ma ana tulafono, . . . e faigofie lava ona liliu atu i agelu o le [Talutalu Fou] . . . e agalelei, e lē faamasinosino. Ma e faigofie ona maua e tagata uma lava, e pei ona faigofie ona maua le asipulini.”—Mekasini o le Time

[Pusa i le itulau 5]

“Fesootaʻiga” Faaonaponei ma Agelu ma Foafoaga Ese

E toʻatele tagata i aso nei ua faapea mai ua vāʻai i agelu ma sa latou talanoa. O isi ua faapea mai sa latou fesootaʻi atu i ni foafoaga ese (aliens) mai isi paneta. O loo lisi mai e le tusi Angels—An Endangered Species mea e talitutusa ai nei faamatalaga, o loo taʻua ai faapea e talitutusa lava faamalamalamaga a nei tala uma e lua. * O loo mulimuli mai se otootoga o nisi o mea e talitutusa ai o loo lisi mai i le tusi.

1. E taufai ō mai uma agelu ma foafoaga ese mai isi lalolagi.

2. E taufai maoaʻe uma ituʻāiga olaga e ola ai, a lē i le faaleagaga pe i faiga faatekinisi.

3. E taufai talavou uma ma aulelei foliga o ituʻāiga o agelu ma foafoaga ese ia e faaleuō, ma e agalelei ma tumu i le lotoalolofa.

4. E taufai lelei uma i le itū tau i le gagana, e manino lelei le tāutala i le gagana a le tagata lea e faalogologo atu i ai.

5. E taufai popoto uma e felelei.

6. Pe a faaali mai agelu ma foafoaga ese, e aliaʻi mai ai ma se malamalama pupula uigaese.

7. E ufiufi atoa o latou tino pe a faaali mai, e masani lava a lē i ni ofu talaloa tetele po o ni ofu faapāʻave e fua pau lelei. E fiafia tele i le lanu paʻepaʻe po o le lanu moana.

8. E masani lava ona taufai tutusa lo latou uumi ma le uumi o tagata.

9. E taufai manatu mamafa uma i mala o le fanau a tagata ma le lalolagi paneta.

10. O le faamaoniga o le iai moni o ni fesootaʻiga ma foafoaga ese ma agelu e lafo atu lea i le molimau a lē na vaaitino i ai.

[Faaopoopoga i lalo]

[Ata i le itulau 7]

O loo iai i le Tusi Paia tala moni o le faaalia mai o agelu i tagata