Le Manatu o le Tusi Paia

Pe Tatau Ona Tatou Ō i Sauniga Faa-Kerisiano?

“SA MASANI ona ou alu i le lotu, ae ua ou lē toe alu.” “O loʻu manatu e mafai lava ona e tapuaʻi i le Atua i so o se mea, ae lē na o se falesā.” “Ou te talitonu i le Atua ma le Tusi Paia, ae ou te lē talitonu i le alu i se lotu.” Pe sa e faalogo i ni faamatalaga faapena? E toʻatele tagata i aso nei ua latou faia ni faamatalaga faapena, aemaise lava i atunuu i Sisifo. O tagata sa masani ona ō i lotu, ua lē o toe manatu e faapea o se mea e tatau ona faia. O le ā o fai mai ai le Tusi Paia e uiga i le ō i lotu? Pe e tatau i Kerisiano ona auai i se nofoaga po o se fale patino ina ia talia ai e le Atua la latou tapuaʻiga?

Tapuaʻiga i le Nuu o Isaraelu

Sa manaʻomia i le Tulafono a Mose tane Iutaia uma ina ia faapotopoto i se nofoaga faapitoa mo tausamiga e tolu faaletausaga. Sa auai foʻi le toʻatele o fafine ma fanauiti. (Teuteronome 16:16; Luka 2:41-44) I nisi o taimi, sa aʻoaʻoina ai e ositaulaga ma sā Levī le motu o tagata sa faapotopotoina, e ala i le faitauina atu o le Tulafono a le Atua. Sa latou ‘⁠folafolaina atu le uiga, ma sa faamatalaina atu i a te i latou mea o latou faitauina.’ (Neemia 8:8) E uiga i tausaga faa-Sapati, ua faapea mai le faatonuga a le Atua: “Ia e faapotopotoina le nuu, o tane, ma fafine, ma tama iti, atoa ma le tagata ese e ia te oe i au aai, ina ia latou faalogologo ai, ma ia aʻoaʻoina i latou, ma ia latou matatau ia Ieova lo outou Atua, ma latou anaana e fai o upu uma lava o lenei tulafono.”—Teuteronome 31:12.

 E na o le malumalu lava i Ierusalema e mafai e se tagata ona ofo atu ai taulaga i le Atua ma maua ai faatonuga mai i ositaulaga. (Teuteronome 12:5-7; 2 Nofoaiga a Tupu 7:12) E mulimuli ane, sa iai foʻi isi maota mo tapuaʻiga sa faatutūina i Isaraelu—o sunako ia. O nofoaga nei mo le faitauina ai o Tusitusiga paia ma faia ai tatalo. Ae sa avea pea le malumalu i Ierusalema ma nofoaga autū o le tapuaʻiga. Ua faaalia lenei mea i le lipoti a le tusitala o le Tusi Paia o Luka. Ua ia taʻua ai se fafine matua o lona igoa o Ana, o lē sa “lei alu ese ia i le malumalu, a ua auauna o ia i le Atua i anapogi ma talosaga i le ao ma le po.” (Luka 2:36, 37) Sa faaautū le soifuaga o Ana i le tapuaʻiga moni faatasi ai ma isi sa tuutoina atu i le Atua. Sa mulimuli ai foʻi isi tagata Iutaia e matataʻu i le Atua i lea lava auala.

Tapuaʻiga Moni Ina ua Mavae le Maliu o Iesu

Ina ua mavae le maliu o Iesu, sa lē toe nonofo loa ona soo i lalo o le Tulafono faa-Mose, ma sa lē toe manaʻomia foʻi ona latou tapuaʻi atu i le malumalu. (Kalatia 3:23-25) Ae e ui i lea, sa faaauau pea ona latou faapotopoto faatasi mo talosaga ma le suʻesuʻeina o le Afioga a le Atua. Sa leai ni o latou maota tetele, ae na i lo o lea sa latou faaaogāina fale o aiga ma nofoaga faitele. (Galuega 2:1, 2; 12:12; 19:9; Roma 16:4, 5) E aunoa ma ni faiga faalotu e tautū i ai po o ni faiga faalialiavale, sa manaia le faigofie o sauniga a Kerisiano o le uluaʻi senituri.

I faiga leaga tauamio a le Emepaea o Roma, sa matuā matilatila mai ai e pei o ni taimane mataupu silisili sa aʻoaʻoina i na sauniga. O nisi tagata lē talitonu sa auai i na sauniga mo le uluaʻi taimi sa mafai ona faapea mai: “E moni, o ia te outou le Atua.” (1 Korinito 14:24, 25) Ioe sa iai moni lava le Atua iā i latou. “Ua faamalosia foi ekalesia i le faatuatua, ma ua faatoateleina i lea aso ma lea aso.”—Galuega 16:5.

Pe sa mafai e se Kerisiano i na taimi ona maua le faamaoniga a le Atua e ala i le tapuaʻi atu i malumalu faapaupau, po o le tapuaʻi na o ia lava? Ua aumaia i le Tusi Paia taʻiala manino e faatatau i lenei mataupu e faapea: O tagata tapuaʻi ua faamaonia, e tatau ona avea ma vaega o le ekalesia moni lava e tasi, po o le faapotopotoga, le ‘tino e tasi’ o tagata tapuaʻi faamaoni. O i latou ia o soo o Iesu, sa lauiloa o Kerisiano.—Efeso 4:4, 5; Galuega 11:26.

Ae Faapefea Aso Nei?

Na i lo o le faalaeiauina o i tatou ina ia tapuaʻi atu i se falesa, ua faalaeiauina i tatou e le Tusi Paia ina ia tapuaʻi faatasi ma le ekalesia “le faapotopotoga a le Atua soifua,” o tagata o loo “tapuai atu . . . i le agaga ma le faamaoni.” (1 Timoteo 3:15, NW; Ioane 4:24) O sauniga faalelotu ua faamaonia e le Atua, e tatau ona aʻoaʻoina ai tagata i “amio e tatau ai i le amio lelei ma le amio Atua.” (2 Peteru 3:11) E tatau i nei sauniga ona fesoasoani iā i latou o auai, ina ia avea o ni Kerisiano taʻumatuaina o ē e mafai ona “iloa . . . le lelei ma le leaga.” —Eperu 5:14.

E taumafai malosi Molimau a Ieova e mulimuli i le faaaʻoaʻoga a Kerisiano o le uluaʻi senituri. E sili atu i le 91,400 faapotopotoga i le lalolagi aoao o loo faapotopoto e lē aunoa e suʻesuʻeina le Tusi Paia ma faalaeiau le tasi i le isi, ma e faia faapea i Maota o le Malo, fale o aiga, ma isi nofoaga. Ua ōgatasi lenei mea ma upu a le aposetolo o Paulo e faapea: “Ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou.” —Eperu 10:24, 25.