O Faaili Ofe Ofoofogia a le Atu Solomona

Tusia e le Tusitala o le Ala Mai! i le Atu Solomona

PE sa e taumafai e iliina se faaili e faia i ni ofe uumi? O le auala lea e manaʻomia e feula ai lenei ofe, e mafai lava ona e niniva ai. Ae seʻi manatu i le iliina o ni ofe e taʻi ono futu [2 mita] le uumi, lua inisi [5 senitimita] le lapotopoto, ma e manaʻomia ai ona faagaoioi lou tino atoa ina ia maua ai se leo. Pe a tāina faatasi na mea faifaaili e 40, ona maua ai lea o se tasi o faaili ofoofogia e faia i le ofe a le Atu Solomona. Ioe, o mea fai faaili uma i lenei faaili, e faia mai i le ofe! O le anoanoaʻi o ofe eseese i laufanua teropika tetelē o le Atu Solomona, ua  maua mai ai ni ofe uumi e mafai ona aumaia ai ni leo eseese, e mai lava i le ʻī e sili ona maualuga e oo i le malū maulalo.

Seʻi o tatou asiasi atu i se fale gaosimea i Honiara, lea e saunia ai e le ʻaufaaili e taʻua o Narasirato Pipers a latou faaili ma faataʻitaʻi ai a o leʻi faimalaga taamilo atu mo se koneseti i Taiwan. O nisi o faaili e faia aʻe i ni ofe uumi se tolu ua fuafuaina ina ia maua ai ni leo e tutusa pau se tolu. E uu faatasi e le ʻaufaimusika ia ofe e tolu ma tuʻituʻi i luga o se maa mafolafola ina ia faamautinoa ai ua ōgatusa ia leo. Afai e lē ōgatusa, ona tipi ese lea o se fasi laau mai le pito o le ofe lea e lē ōgatusa lona leo. O nei ofe e lē iliina. E saisai pito o ofe taʻitasi nei i paʻumemeʻi, ona tuʻituʻi loa lea o le mea faifaaili atoa i le eleele. Maʻeu le taalili mai ai o se leo matagofie! *

E faigatā ona faamatalaina le leo a o amata ona “tatagi” mai leo o ofe. I nisi taimi, e matuā mālū ai lava le leo; a o isi taimi, e toetoe lava a pāpā ai ou taliga. E fuafuaina ma pulea gaoioiga uma taʻitasi, ma e feosoosofaʻi solo lava le ʻaufaimusika i lea mea ma lea mea a o tāina a latou faaili. I nisi taimi, e leo paū ai le musika, ae e masani lava o se fati e matuā faafiafia loto. Atonu i se aso o le a mafai ai ona e asiasi mai iā i matou ma e faalogo lava oe i ai i se tasi o faaili ofoofogia e faia i le ofe a le Atu Solomona!

[Faaopoopoga i lalo]