Le Guanabana e Matuā Ese Lava

TUSIA E LE TUSITALA O LE ALA MAI! I MEKISIKŌ

SEʻI manatu i le tofo manaia o strawberry, kinamoni, mago, ma fala i se salati! O le auala lenā o loo faamatalaina ai e nisi le guanabana (e faaleoina gua·naʹ

ba·na). Afai e te lē o soifua i le teropika, atonu la e te leʻi tofo lava i ai. E taʻua foʻi o le sasalapa, ma o se fualaau taumafa mata lanumeamata pei a lapotopoto, e iai mea talatala e feosofi mai i lona tino ma e susua lona aano lanupaʻepaʻe ma e enaena iila ona fatu.

O le laau lenei o le sasalapa e lanumeamata ona lau i le tausaga atoa ma e lē mafai ona ola i mea e toʻa ai le aisa. E aumaia poleni i le fugalaau e ala i tamaʻi iniseti, pei o loi ma nisi o aviivii faapitoa. Ona o le leai o sona sua suamalie ma e leai ni ona lanu mananaia, o le māfuaaga lea e lē tele ai ni iniseti e tosina atu i ai e maua ai ni poleni. E lē gata i lea, e iai se tulaga faalenatura i le fugalaau lea, e eseese taimi e matua ai lona vaega tane ma lona vaega fafine. O lea ona o fuafuaga tau i fefaatauaʻiga, e manaʻomia ai la ona poleni e le tagata. A lē faia faapena, o le a na o le 12 i le 20 fua e mafai ona fuaina mai i le fuata. E seleseleina le sasalapa a o toetoe lava a matua lelei ma e vave tele ona pula. Peitaʻi, e vave tele foʻi ona pala.

E oo atu lona mamafa i le sefulu pauna (5 kilokalama), o lea o le sasalapa o se fualaau lelei mo le mauaina mai ai o le niacin, riboflavin, ma le vaitamini C ma e toetoe lava 12 pasene o le suka o loo iai. Peitaʻi, e fai lava si mālamāla o lona tofo i le toʻatele o tagata, lea e tatau ai ona faasuamalie ina ia mafai ai ona taumafaina. E palu lona aano ona vaimamā lea ma e faaaogāina faapitoa lava mo le faia o vai sasalapa ma aisakulimi sasalapa. O le tulaga masani, o se tī e faia mai i lau o le sasalapa e faaaogāina mo le togafitia o le sanatoto, fulū, ma le tumu o le moa. I Mekisikō o le tī e fai i lau o le sasalapa e faaaogāina e togafitia ai le uaua migi ma e avea foʻi ma vai e faapē ai se manuʻa o le tino. O ona aa e faaaogā e fai ai vai anufe, ma o ona fatu e faaaogā e fai ma vai e tutuli ese ai meaola ninii po o le tapēina ai o iniseti.

Afai e maua le sasalapa i lou vaipanoa, atonu la e te manaʻo e faataʻitaʻi ona tofo i ai. O le a lē taumatea lou fiafia i lona tofo!

 [Pusa/Ata i le itulau 27]

Aisakulimi Sasalapa

2 ipu o le sua totoo o le sasalapa

1 sipuni tele o le sua o le tipolo

7⁄8 ipu suka

1 ipu vai

1 ipu kulimi

1. Fai se sua totoo mai le aano o le sasalapa e ala i le vaimamāina i se faamamā, oomi i se faamamā valavala, po o le tatau i se ie valavala. 2.Saʻeu faatasi le suka ma le vai, ma faapuna mo le lima minute. Faamaalili seʻia māfanafana. 3.Sasaa i ai le sua totoo o le sasalapa, kulimi, ma le sua o le tipolo. 4.Sasaa le paluga i se ulo papaʻu, ufiufi, ma faatoʻa i le pusaʻaisa seʻia toetoe lava a malō. Saʻeu malosi. Toe faafoʻi i le pusaʻaisa, ma faatoʻa ai seʻia malō.

[Ē Ana le Ata]

Itulau 26 i luga: Geo Coppens, CIRAD-FLHOR/IPGRI; itulau 27 i luga i le taumatau: IPGRI-Americas