Tumau e ui i Faigatā

E pei ona valoia i le Tusi Paia, ua tatou ola nei i “aso faigatā.” (2 Timoteo 3:1) Atonu o nisi o faigatā o loo oo iā te oe e aofia ai omiga i aiga, o faalētonu tau le soifua mālōlōina, ma faafitauli tau tupe. Atonu e iai foʻi taimi ua e lagonaina ai, ua e lē mafaia lava ona onosai. Ae ui i lea, e mafai ona e tumau e ui i nei faigatā. Seʻi tagaʻi foʻi i le faataʻitaʻiga lea o loo sosoo mai.

E iai se laau e taʻua o le violeti (Teide violet) e ola i se nofoaga maualuga e tusa ma le 12,000 futu, i le motu o Tenerife, e lata i le talafatai o Aferika i Mātū. O le mauga mū o Pico de Teide, lea e faaigoaina ai le violeti e mafai ona iloa mai i so o se vaega o lea motu, lea e lata i le teropika, ma e foliga mai e leai se mea e ola ai i ona vaega pito i luga. Ae a oo i le tau e totogo ai mea, ua lava le suāvai e tafe mai le kiona lea ua liu suāvai, e faasūsū ma toe faaola aʻe ai nei violeti, ma fua mai e pei o se ula ona fua violē manaia i luga o lea mauga. Ioe, e ui ina foliga vāivāi, ae ua mafai ona ola malaulau i lea siʻomaga faigatā.

I le pei o lea violeti , e mafai foʻi ona e onosaia tulaga faigatā. E toʻatele Molimau a Ieova ua mafai ona latou faia faapea e ala i le fesoasoani mai le Tusi Paia. O se faataʻitaʻiga, na mafai ona tumau pea i latou na faafalepuipuiina i nofoaga o faasalaga i Siamani, a o pulea e le ʻau Nasi. Ua taʻua e Björn Hallström, o se tusitala o nusipepa mai Suetena e faapea: “Sa sili ona faileagaina i latou na i lo se isi lava vaega, ae e ala i lo latou faatuatua i le Atua, na sili atu ona mafai ona latou tumau na i lo isi.”

Po o le ā lava le tulaga o loo e iai, e mafai ona fesoasoani le Tusi Paia iā te oe ina ia e tumau e ui i faigatā. Ia faafesootaʻi Molimau a Ieova i lou vaipanoa, po o le tusi atu foʻi i le tuatusi o loo i le itulau e 5 o lenei mekasini mo se suʻesuʻega faale-Tusi Paia e faia e aunoa ma se totogi.