Sa‘ili‘iliga i Afu Matagofie

PLAY

Saʻiliʻiliga i Afu Matagofie

TUSIA E LE TUSITALA O LE ALA MAI! I ZAMBIA

E OO ane i le 1855, ua tele ni tausaga o femalagaaʻi solo i Aferika ia David Livingstone, o ia o se misionare mai Sikotilani ma o se tagata suʻesuʻe. I lea vaitaimi, e tau leai nisi sa latou iloaina lea konitineta. A o ia malaga atu i sasaʻe i le vaitafe o le Zambezi, na ia maua ai se faamatalaga mai tamāloloa o lea vaipanoa e tusa ai o le matagofie o se afu telē o loo latou agaʻi atu i ai. Na taʻu e ia tagata lea afu o Mosi-oa-Tunya, o lona uiga “O le Ausa e Taalili” ona o lona gogolo tele, ma le ausa o loo pupuna mai ai.

Na manaʻo loa Livingstone e alu atu e vaai le afu, lea ua taʻua nei o le afu o Vitoria. I le taimi muamua lava na ia vaai ai i le afu na ia tusi ai e faapea: “Sa ou lagona le maofa tele a o oʻu tolotolo atu i le auvai, ma ou tilotilo atu i le tofē lautele o loo va aʻi auvai o le Zambezi. Na ou iloa atu le vaitafe pe tusa o le afe iata lona lautele, e palasi atu i lalo mo le selau futu [30 mita] ma tafe atu loa i se va e tusa na o le sefulu lima i le lua sefulu iata le lautele.”

Pe a oo i le taimi e lolo ai lea afu, lea e tafe atu i Zambia ma Zimbabwe, fai mai o le afu lea e sili ona telē i le lalolagi! E tusa ma le 144,000,000 kalone [545,000,000 lita] i le minute e palasi atu i le 355 futu [108 mita] agaʻi i se tofē telē, ma e saosaoa lona tafe agaʻi i se mato e fepiʻopiʻoaʻi, e itiiti ifo i le 210 futu [65 mita] lona lautele. O tulaga ia faalenatura o lea afu ua māfua ai ona ofoofogia i le maimoa.

E ese foʻi le matagofie o le vaipanoa lea o loo iai. Ua avea ma nofoaga faasao, ma e mataʻina ituaiga eseese o laau tetele ma isi laau o loo iai, faapea ma manu—e iai puaasami, o elefane, o giraffe, o wildebeest, o zebra, ma leona. E ofaga i ona papa maualuluga ia manufelelei mananaia e pei o aeto, ma le ituaiga e taʻu o le taita falcon, lea e seāseā ona vaaia.

Fai mai Livingstone, “e lē mafai e se isi ona iloa le matagofie o lea vaaiga pe a faatusa i se mea ua vaai i ai i Egelani. E leʻi vaaia lava e se tagata mai Europa se vaaiga manaia faapea, ae atonu o vaaiga matagofie faapea o loo maimoaina e agelu a o latou feleleaʻi solo.” I nei aso, tusa ma le 150 tausaga talu ona vaai Livingstone mo le taimi muamua i lea afu ma faaigoaina i le igoa o le tupu tamaʻitaʻi o Egelani o Vitoria, e faitau selau afe tagata mai le lalolagi aoao ua gasolo ane e maimoaina le matagofie o lea afu.

Ua talafeagai ai le taʻu o lea afu o se tasi o foafoaga ofoofogia i le lalolagi. Ae e lē o iloa e le toʻatele le tele o isi afu e ese foʻi le matagofie, o loo iai i le mau vaitafe tetele o Zambia. Seʻi tatou matamata la i nisi o ia afu.

Le Afu o Ngonye

I le lua tausaga muamua atu a o leʻi vaai Livingstone i le afu o Vitoria, na taunuu atu ai i le afu o Ngonye, lea foʻi o loo iloa o le afu o Sioma. Na ia tusi e faapea: “E lilo le laufanua i luga aʻe o le afu i laau matagofie. Pe a tagaʻi atu i lalo mai papa ia o loo i luga aʻe o le afu, o se vaaiga lea e sili ona matagofie ua ou vaai i ai.” Ua matuā ioeina e i latou o loo asiasi atu i lea afu le manatu o Livingstone.

Na faamatala faapea e Livingstone: “E maulalo le mea e tafe ai le vai mo le tele o maila i se va e lē silia ma le selau iata le lautele. E tai pei o loo pupuna lana tafe ma foliga mai o loo taavalevale lana alu, ma e oo lava i se tagata e matuā poto e aau, o le a faigatā lava iā te ia ona aau ai.”

Le Afu o Lumangwe

O le tele o isi afu o Zambia, e tumamao ese, ma e leʻi oo i se tulaga ua faaleagaina e tagata. E eseese lava le tetelē o afu. O le afu o Lumangwe, e tai pei o se tamaʻi afu o Vitoria. Ae e lē o se afu laʻitiiti. O se tasi o ia afu e tusa ma le 100 futu [30 mita] lona maualuga ae silia ma le 300 futu [100 mita] lona lautele. O le ausa mai le afu lea, o loo faasūsū ma ola ai le vaomatua.

Le Afu o Kalambo

O le afu lea e sili ona maualuga i Zambia, ma e tafe mai i se laufanua mafolafola agaʻi i le vanu e taʻu o le Great Rift Valley o Aferika. E silia ma le 700 futu [silia ma le 200 mita] e palasi ifo ai i papa, ma o inā e ofaga ai manulele tetelē e taʻu o le marabou stork, pe a oo i le tau mātūtū.

Ua taʻua e le tusi National Monuments of Zambia e faapea, “E tusa o Kalambo e lona lua i afu e sili ona maualuga e lamolemole lona palasi ifo e aunoa ma se mea e faalavelavea ai, i Aferika [e pito i le afu i Tugela i Aferika i Saute], ma o le afu e lona sefulu lua lona maualuga i le lalolagi, e sili atu ma le faaluaina le maualuga i le afu o Vitoria.”

E ui e lē faigofie le oo atu i lea afu, ae ua taʻua e se tusitala o lea nuu o C. A. Quarmby e faapea, o Kalambo o “se tasi lea o nofoaga e sili ona matagofie i Aferika.” O lona manatu i ai: “O le a umi se taimi ona faatoʻā avea lea o Kalambo ma nofoaga e ō atu i ai turisi. . . . E toʻaitiiti ni tagata o le a mafai ona latou oo atu i Kalambo.”

E tele lava afu ma nofoaga mataʻina o Zambia e faigatā lava ona oo atu i ai. Ua taʻua e le tusi National Monuments of Zambia e faapea o nisi o ia nofoaga e “na o se taavale e aai uma ona paʻu e fā e mafai ona alu ai, ae o isi nofoaga seʻi iloga e sopo ona faatoʻā mafai lea ona oo i ai.” O se tasi lenā o māfuaaga ua avea ai ia nofoaga ma nofoaga mataʻina. Ae e talia lava so o se isi e fia asiasi atu. O se alii e galue mo le faasaoina o le Nofoaga Faasao o Zambia e suafa iā Kagosi Mwamulowe ua ia faamatala mai e faapea, o lo latou sini, ia mafai e tagata ona maimoa i ia nofoaga matagofie ae ia faatumauina pea le manaia ma le lelei o ia nofoaga.

O le ʻOa Sili a Zambia

I lana tusi e taʻua o Zambia, na faapea mai ai le tusitala o Richard Vaughan: “O loo tumau pea ona avea Zambia ma nuu e ese le matagofie, ma e tele lava ina lē o iloa e tagata maimoa, faapea ma tagata o Zambia lava ia. . . . E tele ituaiga o vaituloto, vaitafe, vaomatua, ma mauga o loo iai.” Ae e lē o lea le ʻoa sili a Zambia.

Fai mai Vaughn: “Ua lauiloa ona tagata ona o lo latou māfana, fiafia, ma lo latou malosi e ui i faigatā.” E pei ona faaupuina e se isi tusitala e igoa iā David Bristow, “o le vaega tāua o Zambia, o ona tagata, ma o latou uiga māfana.” Afai e te malaga mai i lenei vaega o le lalolagi, matou te mautinoa o le a e ioe i lea manatu.

[Faafanua/Ata i le itulau 18]

(Tagaʻi i le lomiga mo le ata atoa)

TANZANIA

MALO FAATEMOKALASI O LE CONGO

ANGOLA

ZAMBIA

AFU O KALAMBO

AFU O LUMANGWE

Lusaka

AFU O NGONYE

AFU O VITORIA

ZIMBABWE

MOZAMBIQUE

VASA INITIA

[Ata]

Afu o Lumangwe—e tai pei o se tamaʻi afu o Vitoria

Afu o Ngonye—“e na o oe lava i le tele o aso”

Afu o Kalambo—e faaluaina le maualuga i le afu o Vitoria

[Ē Ana le Ata]

[Ata i le itulau 17, 18]

Afu o Vitoria —“O le Ausa e Taalili”

[Ē Ana le Ata]

Marek Patzer/www.zambiatourism.com

ALA MAI!