Ua Fesili Mai Talavou . . .

Aiseā Ou te Fai ai ni Galuega Mamafa?

“E leai ma so‘u manatu ou te fia faia ni galuega mamafa. E sili atu ona manaia lo‘u taaloalo i le komepiuta.”—O le tala lea a Natano.

“E iai tamaiti e manatu maulalo mai iā i matou e faigaluega i galuega mamafa, ona faapea e pau lava lea o le mea e matou te iloa fai.”—O le tala a Sara.

GALUEGA MAMAFA—o le manatu i ai o le to‘atele, e lē manaia, ma e palapalā, ma e latou te lē manana‘o fo‘i e fai. O se polofesa e su‘esu‘e i le tamaoaiga o se atunuu, ua ia fai mai e tusa ai ma galuega e mana‘omia ai ona faigaluega mamafa e faapea: “E faalēano tagata i galuega faapena ona ua manana‘o i galuega e aloa‘ia ai.” E lētioa a manatu maulalo i ai le tele o talavou, ma lē fia faia galuega faapena.

Peita‘i ane, e ese le vaaiga o loo uuna‘ia mai e le Tusi Paia. Na fai mai le tupu o Solomona: “E leai se tasi mea lelei i le tagata na ona ia ‘ai, ma inu, ma faafiafia lona loto i mea lelei i ana galuega.” (Failauga 2:24) I le vaitaimi o le Tusi Paia, na avea le nuu o Isaraelu o ni tagata e faifaato‘aga. Sa mamafa ni galuega na faia auā le faamalūina o le eleele, faapea ma le selesele ma le sasaina o le saito. Ae na faapea mai Solomona, e iai se taui tele o galuega faapena.

I ni senituri mulimuli ane, na fai mai ai le aposetolo o Paulo: “O lē gaoi aua ne‘i toe gaoi, a e lelei ina faamalosi o ia i galuega a ona lima i mea aogā.” (Efeso 4:28) O Paulo fo‘i o se tagata e masani ma galuega mamafa. E ui ina sa lelei tele lana a‘oga, ae i nisi taimi, na ia galue ai o se tagata e fai fale‘ie.—Galuega 18:1-3.

Pe faamata e te fia faia ni galuega mamafa? Atonu e te lē o iloa, ae e tele auala o le a aogā ai iā te oe le faia o galuega mamafa.

E Aogā i Lou Olaga

O lou faia o galuega mamafa, po o le kamuta po o le moa o le vao, e aogā i lou soifua  mālōlōina. E lē gata ina o le a malosi ai lou tino, ae e tele fo‘i isi aogā e maua mai ai. Pe e te iloa sui se pa‘u po o le suāuu o le taavale? Pe e mafai ona e faalelei se faamalama ua ta‘e po o se paipa ua puni? E te iloa kuka? Pe e te iloa ona tapena ma faamamā lelei le fale? O ni tomai ia e lelei ona iloa e tama ma teine talavou, auā e aogā i le taimi e te tuua ai lou aiga.

O se mea e ao ona mātauina, sa poto fo‘i Iesu e fai galuega faapea i le taimi a o iai i le lalolagi. Na ia iloa ona kamuta, atonu o lona tamāfai o Iosefa na a‘oa‘oina o ia, ma na ta‘u o ia o le tufuga. (Mataio 13:55; Mareko 6:3) E tele fo‘i ni tomai eseese, o galuega e faaaogā ai le malosi, e mafai ona e a‘oina.

Ati A‘e Uiga Lelei

O lou galue mamafa, e aafia ai fo‘i lau vaaiga iā te oe lava. I sana faamatalaga na tusia mo le National Mental Health and Education Center i Amerika, na fai mai Dr. Fred Provenzano e faapea, o lou galue i galuega mamafa, e aogā lea i lou mauaina o le “uiga o le faalagolago iā te oe lava, ma le mautinoa” ma “e te iloa ona pulea o oe lava ma ia faamaopoopo mea, o se faavae lelei lea e taulau ai i galuega e te faigaluega ai.” Ua fai mai se alii talavou e igoa iā Ioane: “E aogā galuega e faaaogā ai le malosi ia iloa ai ona onosai. O le a e iloa ai ona taulima faafitauli.”

Ua toe fai mai fo‘i Sara: “O le faia o galuega e faaaogā ai le malosi, na ou iloa ai ona galue mamafa ma to‘aga. Na ou iloa ai ona pulea o a‘u lava, i le mafaufau faapea ma le tino.” Ae e lē faapea ai o ia galuega, e faigatā ma oso ai ma le fiu. Ua fai mai Natano; “Na ou iloa ai ona fiafia e galue, e ala i le faaaogā o lo‘u malosi. A o faasolosolo ina faaleleia lo‘u tomai, na faapena fo‘i ona ou iloa le faaleleia o a‘u galuega. Na oo mai ai fo‘i ma lo‘u fiafia iā te a‘u lava.”

E aogā fo‘i galuega e faaaogā ai le malosi e te iloa ai le fiafia e maua mai lou mafaia o se mea. Ua fai mai le faamatalaga a se alii talavou e igoa iā Simi: “Ou te fiafia tele e kamuta. E ui e oo mai ai le lagona vaivai, ae a ou toe mafaufau i mea na ou faia, ou te lagona ai ua aogā a‘u taumafaiga. Ou te lagona ai lava le faamalieina.” O le manatu fo‘i lenā o Brian. “Ou te fiafia lava e galue i taavale. Ou te lagona le fiafia ma le faamalieina i lo‘u iloaina na mafai ona ou toe faalelei se taavale na leaga, ma ua pei ai lava o se taavale fou.”

Auaunaga Paia

I talavou Kerisiano, e avea le galue malosi o se fesoasoani i la latou auaunaga i le Atua. Ina ua tuuina atu i le tupu o Solomona le galuega o le fausia o se malumalu matagofie mo Ieova, na ia iloaina o lea galuega e telē ma o le a mana‘omia ai se taumafaiga tele, faapea ma le tomai. Ua faapea mai le Tusi Paia: “Ua alu atu le fe‘au a le tupu o Solomona, ma ua au mai ia Hiramo mai Turo. O le tama tane ia a le fafine ua oti lana tane, o lo le itu aiga o Nafatali, a o lona tamā o le tagata Turo ia, o le tufuga fai mea ‘apa memea; sa tumu ia i le poto, ma le mafaufau, ua na iloa e faigaluega uma i mea ‘apa memea. Ua sau o ia i le tupu o Solomona, ma na faia ana galuega uma.”—1 Tupu 7:13, 14.

O se faaeaga uiga ese lea na maua e Hiramo e faaaogā ai ona tomai auā le faaauilumaina o le tapua‘iga a Ieova! Ua faamamafa mai i le mea na oo iā Hiramo le moni o upu a le Tusi Paia i le Faataoto 22:29: “Ua e iloa le tagata ua faataalise i ana galuega? e tū o ia i luma o tupu, a e lē tū i luma o tagatānuu.”

I aso nei, e oo lava i talavou e itiiti pe e leai so latou tomai, ua latou maua le faaeaga o le auai i le fauina o Maota o Malo. Ona o lea faaeaga ua latou iloa ai ona fai ni galuega aogā e iai le faieletise, palama, galue i piliki, ma le kamuta. Atonu e mafai ona e talanoa i se toeaina o lau faapotopotoga pe e mafai ona e auai i se galuega o le fausia o Maota o Malo.

 Ua fai mai Simi, o sē tasi ua tele ni Maota o Malo ua galue ai: “E to‘atele le ‘auuso i le faapotopotoga e leai se taimi po o ni tomai e mafai ai ona auai. E tusa ua avea lou alu atu e fesoasoani ma tulaga o loo e fesoasoani ai i le faapotopotoga atoa.” Na a‘oa‘oina Natano ia poto e galue i galuega e faaaogā ai le simā, ma na maua isi avanoa e auauna ai i le Atua. Ua ia faamatala mai e faapea: “Na mafai ona ou alu atu i Zimbabwe i Aferika e faaaogā o‘u tomai auā le fausia o le ofisa o le lālā o Molimau a Ieova. E tolu masina na ou galue ai i inā, ma o se mea uiga ese lea e sili ua oo iā te a‘u.” O nisi talavou, ua avea lo latou naunau e galulue mamafa ma uuna‘iga e talosaga ai e galulue tauofo i ofisa o lālā o Molimau a Ieova i o latou atunuu.

O lou maua o le poto i galuega e faaaogā ai le malosi o le a mafai ai ona e maua le “loto malie” ma e iloa ai tausi oe lava. (1 Timoteo 6:6) E to‘atele talavou Molimau a Ieova o loo galulue o ni paeonia, po o i latou e tala‘i faataimi atoa. Ua mafai ona latou tausi i latou lava talu ai ua a‘oa‘oina se tomai, e aunoa ma le tele o le taimi ma tupe e alu i a‘oga taugatā.

Le Auala e Maua ai le Tomai

O le a e maua aogā o le a‘oina o se galuega e faaaogā ai le malosi e tusa lava pe gata lona aogā i le fale, pe e te mana‘o fo‘i e su‘e ai sau galuega. Atonu o loo iai ni mataupu i lau a‘oga e a‘o ai tomai faapena. E mafai fo‘i ona e maua le agavaa i ia tomai e ala i lou aiga. E faapefea? E ala i le faia o fe‘au i le aiga. Ua faaopoopo mai Dr. Provenzano lea na ta‘ua muamua e faapea: “Ua sili ona aogā le faia o fe‘au i le fale e talavou, ona e latou te ‘maua ai tomai e aogā iā i latou’ e mafai ai ona taulau ma sologa lelei o latou olaga i le taimi e te‘a ese ai ma mātua.” O lea la, to‘aga e fai fe‘au o loo mana‘omia ona fai i lou aiga. O mana‘omia ona moa le vao? Ae ā se mea o malepe e ao ona faaleleia?

Ua tele auala o le a aogā ai lou faia o galuega e mana‘omia ai le malosi, ae e lē faapea ua maulalo ai lou tulaga. Aua e te ‘alo mai galuega mamafa! Ia e taumafai e ‘fiafia i mea lelei i au galuega uma,’ auā e pei ona ta‘ua i le Failauga 3:13, “o le mea foa‘iina mai lea e le Atua.”

[Faamatalaga faaopoopo i le itulau 29]

Ua tele se aogā o le a‘oina o se tomai e talavou i le faalauteleina atu o la latou auaunaga i le Atua

[Ata i le itulau 30]

O le tulaga masani lava, e tele ni tomai e mafai ona faasino atu e ou mātua