Le Manatu o le Tusi Paia

Pe e Tatau Ona e Mata‘u iā Amaketo?

O LE ā le uiga o “Amaketo”? O sona faamatalaga faigofie, o loo faatatau lea i le taimi e potopoto ai tupu o le lalolagi e faasagatau i le Atua, ma Iesu Keriso, le tupu o lona Malo. I le tusi o Faaaliga, na iloa ai e le aposetolo o Ioane se vaaiga, o tupu o le lalolagi o loo potopoto e tetee atu i le Atua i se tulaga faafaatusa e ta‘u o Amaketo.

E na o le faatasi ona ta‘ua le upu “Amaketo” i le Tusi Paia, ae i nisi gagana ua tele ina faaaogāina i se auala faafaatusa. Ua faaaogā fo‘i le upu Amaketo e faatatau i mala tetele e pei o se mala faaniukilia, po o mala laiti, e pei o se faalētonu e aafia uma ai komepiuta i le lalolagi. Ua tusia ni tusi ua fiafia tagata e faitau e faatatau i le taimi o le i‘uga o le lalolagi, po o le taimi a o lalata atu Amaketo. I le sefulu tausaga ua tuana‘i, ua silia ma le 60 miliona kopi ua faatauina atu o ni tusi faasolo, e faatatau i lea mataupu.

O nisi tagata, ua lagona le mata‘u ona o Amaketo. Ua latou manatu, o le a avea tagata faatupu faalavelave, po o nuu e faatupuina taua, faapea ma mala e lē mafai e tagata ona taofia, ma tulaga o le a tupu ai se mala i le lalolagi aoao, ma lē mafai ai ona toe ola se isi i le lalolagi. Ae o isi ua talitonu e faapea, ona o le to‘asā o le Atua, o le a ia faaumatia ai le lalolagi ma mea uma lava o loo iai i le taimi atofaina. Ioe, o ni tulaga ia e matuā faamata‘uina ai lava! Ae o le ā tonu lava le malamalamaga sa‘o e tusa ai o Amaketo, po o le “taua i le aso tele o le Atua e ona le malosi uma lava”?—Faaaliga 16:14, 16.

Pe e Faaumatia le Laueleele?

E lē o tagata uma o le a faaumatiaina iā Amaketo. E faapefea ona tatou iloa? Ua ta‘utino mai i le Tusi Paia “ua silafia e le Alii se mea e lavea‘i mai ai i ē amio Atua ai le tofotofoga, a e taofi i ē amio leaga e oo i le aso faamasino ina ia faasalaina i latou.” (2 Peteru 2:9) Ua tatou mautinoa la, o le Atua e ou le malosi uma, o le a ia faatautaia lelei lona malosi. E na o i latou e teena le pule silisili ese a le Atua, o le a oo i ai lona to‘asā iā Amaketo. E leai se isi e faaumatia fua.—Salamo 2:2, 9; Kenese 18:23, 25.

Ua ta‘ua i le Tusi Paia o le a ‘fano  fo‘i i latou o ē na fano ai le lalolagi.’ (Faaaliga 11:18) O lea la ua manino, e le‘i finagalo le Atua e faaumatia le lalolagi. Ae o le a ia faaumatia tagata amio leaga o ē tetee i lana pulega. Ua tutusa lea ma le mea na ia faia i le Lolo i aso o Noa.—Kenese 6:11-14; 7:1; Mataio 24:37-39.

“Le Aso Tele ma le Silisili”

E moni, e lagona le popole pe a taga‘i i valoaga o loo i le Tusi Paia e tusa o le faaumatiaga o le a oo mai. O se faata‘ita‘iga, na ta‘ua e le perofeta o Ioelu “le aso tele ma le silisili o Ieova.” (Ioelu 2:31) E aofia ai i auupega o loo iā Ieova, o le kiona, le uato‘a, mafui‘e, o faama‘i, o lologa, o le afi ma le teio, o le atuatuvale tele, ma le uila, ma le lauvale o tino. * (Iopu 38:22, 23; Esekielu 38:14-23; Sapakuka 3:10, 11; Sakaria 14:12, 13) O loo ta‘ua manino fo‘i i le Tusi Paia le taimi o le a ufitia ai le laueleele i tino o ē feoti, ua avea ma faalelei eleele pe fai fo‘i ma mea‘ai a manufelelei ma isi meaola. (Ieremia 25:33, 34; Esekielu 39:17-20) O le a matuā iloga ona matata‘u fili o le Atua i lea taimi.—Faaaliga 6:16, 17.

Po o lona uiga ea la, e tatau ona matata‘u tagata tapua‘i ma usitai i le Atua moni ona o mea uiga ese o le a tutupu iā Amaketo? E leai, auā e leai se vaega a auauna a le Atua e faia i lea taua. E lē gata i lea, o le a puipuia i latou e Ieova. Ae o le a matuā oo iā i latou le ofo ona o le māta‘utia o le mana o le Atua o le a faaalia ai.—Salamo 37:34; Faataoto 3:25, 26.

O le mea tāua, na faagaeeina le aposetolo o Ioane e faamāfanafana mai iā i tatou e faapea: “Amuia lē tausi i upu o le valoaga o lenei tusi” lea e aofia ai ma le valoaga e uiga iā Amaketo. (Faaaliga 1:3; 22:7) E mafai faapefea ona manuia se tasi e ala i le manatunatu e tusa ai o Amaketo?

Lapata‘i Mai le Atua ia Gaoioi

Pe a faalolo‘i mai se afā mata‘utia, e aumai e le malo ni lapata‘iga auā le puipuia o soifua o tagata. Atonu fo‘i e auina atu ni leoleo e avatu faailoilo ina ia maua e tagata uma le lapata‘iga. O le uiga o le faia faapea, e lē ona o se faamata‘u, ae o se fesoasoani ina ia gaoioi tagata ina ia faasaoina. O lea la, o tagata e mafaufau lelei, e fiafia ona o le oo atu o le lapata‘iga, ma o ē e utagia lapata‘iga, o le a i‘u lelei.

E faapena fo‘i le lapata‘iga a le Atua e tusa o Amaketo, po o le “asiosio” faafaatusa, o loo faalolo‘i mai. (Faataoto 10:25) I lana Afioga, ua aumai e Ieova faamatalaga e faatatau i lana taua. Talu ai o lona finagalo, e lē ina ia faamata‘uina i tatou, ae ia lava se lapata‘iga ina ia salamo ai tagata ma maumaua‘i e auauna iā te ia. (Sefanaia 2:2, 3; 2 Peteru 3:9) O i latou e faia faapea, o le a faasaoina. O lea la, e lē tatau ona tatou matata‘u i le taua a le Atua o loo faalolo‘i mai. A ia tatou taga‘i i le lumana‘i ma le mautinoa, e “faaolaina o i latou uma lava o e valaau atu i le suafa o Ieova.”—Ioelu 2:32.

[Faaopoopoga i lalo]

[Ata i le itulau 24]

Pe a faalolo‘i mai se afā mata‘utia, e aumai e le malo ni lapata‘iga auā le puipuia o soifua o tagata

[Ata i le itulau 25]

O le lapata‘iga a le Atua e tusa o Amaketo, o se valaau lea ia gaoioi ina ia faasaoina