Polokalame Ina ia Suia Pagota i Toese i Mekisikō

Faamatalaina e le tusitala o le Ala Mai! i Mekisikō

O NISI taimi, ua taʻua e faapea e ala ona tuu pagota i le toese, ina ia sui ai a latou amio. Ae ua lē lava le iai i le toese e suia ai amio a pagota. E tatau ona iai i lona mafaufau ma lona loto le uunaʻiga ia sui, ia salamō moni mai ana mea leaga na fai, faapea ma se faanaunauga ia sui lana amio. Ua toʻatele i latou o i falepuipui i le lalolagi ua sui ona o aʻoaʻoga faale-Tusi Paia o loo faia e Molimau a Ieova. Seʻi o tatou tagaʻi i ni taumafaiga o loo faia i Mekisikō.

E 150 falepuipui i Mekisikō o loo asiasi atu i ai Molimau a Ieova, ma faia ai la latou polokalame o le faitauina o le Tusi Paia, ma aʻoaʻoina atu ana tapulaa tau amio ma aʻoaʻoga. O se faataʻitaʻiga, e 1,200 pagota i le toese i Ciudad Juárez i Chihuahua, o loo ō atu pea i ai Molimau a Ieova e talaʻi ai. Ua matuā faaaloalogia i latou e pagota ma e latou te puipui i latou i tulaga mataʻutia. Ina ua tupu se fouvalega i le falepuipui, o nisi o pagota e sili ona mataʻutia na faafilemuina le ʻaufouvale ina ia saogalemu le tuumuli ese o Molimau na iai.

Na fiafia pagota ma o latou pule e faitau i le Awake! o Me 8, 2001, o loo iai le mataupu “Pe Mafai e Pagota Ona Suia?” i le faa-Peretania. I le toese i San Luis Río Colorado i Sonora, e 2,149 ni kopi o lea mekasini na tufaina atu e Molimau e toʻa 12.

Pe a maua nisi e fiafia moni i le Tusi Paia, e asia pea i latou e Molimau a Ieova i vaiaso taʻitasi ina ia aʻoaʻoina i latou i le Tusi Paia, ma faia sauniga e aʻoaʻoina ai le Tusi Paia. Po o tele ea se aogā o lea polokalame faale-Tusi Paia i le suia o olaga o pagota?

O Pagota ua Avea ma Tagata Talaʻi

Na amata le olaga solitulafono o Jorge, a o leʻi atoa lona 20 tausaga. Na magalo o ia mai le falepuipui i Islas Marías ina ua uma ona tuli lona faasalaga mo le 13 tausaga. Ae e leʻi leva ae toe aafia foʻi i fefaatauaʻiga o fualaau faasāina. O se alii e lelei lana fana, ma e 32 tagata na ia fasiotia ona o faatonuga mai isi. Na toe lokaina o ia, ma na taʻu atu e ana loia iā te ia, e lē popole ē na pule iā te ia po o le ā se tupe e alu e faasaʻoloto ai o ia mai le toese, ona sa iai se tagata na latou mananaʻo e tatala mai o ia e na te tagatavaleina. Ae o le taimi lea ua suʻesuʻe ai e Jorge le Tusi Paia ma Molimau a Ieova. O lana taumafaiga faaleagaga na oo ai ina papatisoina, ma na avea o ia o se tagata talaʻi faataimi atoa, po o se paeonia, i le falepuipui. Pe faamata o le a manaʻo o ia ia saʻoloto ma galue mo tagata e autū i le solitulafono, pe e manaʻo e nofo ai pea i le toese ma auauna iā Ieova? Na tali mai Jorge: “E sili iā te aʻu loʻu nofo i le falepuipui ma tuli loʻu faasalaga ona o mea leaga na ou fai. Ua avea nei aʻu ma auauna a Ieova le Atua, le Alii Silisili ese.” Na tumau ma le faamaoni  Jorge i le Atua ma e ui ua maliu o ia ae ua iai lona faamoemoe i le toe tū. Ua fai mai ona uso talitonu, “Na ia aʻoaʻoina le upu moni, ‘ma na saʻoloto o ia ona o le upu moni.’”—Ioane 8:32

O Tavita, e 110 tausaga o lona faasalaga ona o lona fasioti tagata, ave faamalosi o tagata, ma le gaoi, ma na lokaina o ia i se vaega ua faapitoa mo pagota e sili ona mataʻutia. Ae talu ai ua matuā sui lana amio ona o lona suʻesuʻe i le Tusi Paia ma Molimau a Ieova, na faapitoa ona faatagaina o ia e oo atu i se sauniga, ae vaavaaia e se leoleo. Ua suia lona olaga ona o aʻoaʻoga a le Tusi Paia. Ua avea nei o ia ma tagata talaʻi, ma o loo ia faia suʻesuʻega faale-Tusi Paia ma nisi pagota e toʻavalu i le mea o loo lokaina ai o ia. E oo lava i lona aiga, ua matuā ofo i lona suiga ma ua latou ō atu e na te faia a latou suʻesuʻega faale-Tusi Paia. Ua ia fai mai, “E lē muta loʻu faafetai atu iā Ieova ona o le saʻolotoga faaleagaga lea ua ou iai.”

E toʻa 175 pagota o loo i toese e 79 i Mekisikō ua agavaa e talaʻi, ma e toʻa 80 ua papatisoina, ona o le fesoasoani a Molimau a Ieova e ala i le polokalame o aʻoaʻoga faale-Tusi Paia. E 703 le aofaʻi o suʻesuʻega faale-Tusi Paia o loo faia ma isi pagota. E lē gata i lea, e tusa ma le 900 i latou o loo auai i sauniga e faia i falepuipui.

Se Faamālō Mai Pule

Ua aloaʻia e pule o toese le galuega o loo fai e Molimau a Ieova. O se faataʻitaʻiga, na tuuina atu e pule o le falepuipui i Tekax, i Yucatán, se tusi faapitoa e faaalia ai lo latou talisapaia o la latou “galuega lē manatu faapito ma agaalofa e fesoasoani” ai i pagota i le tausaga e 2002.

Ina ua faatoʻā amata le polokalame tau aʻoaʻoga faale-Tusi Paia a Molimau, e toʻatele ni leoleo sa vaavaaia a latou sauniga. Ae, a o faagasolo le taimi, na oo ina aloaʻia i latou e leoleo, ma ua na o le toʻatasi le leoleo o loo iai e vaavaaia a latou sauniga.

E iai se Maota o le Malo o le ʻauuso i le falepuipui i Ciudad i Juárez. Sa iai i le lotoā se auivi o se fale e fai i uʻamea, ma na faatagaina le ʻauuso e avatu ni mea faufale e fau ai se fale e tapuaʻi ai. Na fauina lea maota e ni pagota e 13 ua papatisoina, faatasi ma i latou o loo suʻesuʻeina le Tusi Paia i le falepuipui. O loo iai i le maota mea faalelei leo, o se fale lē taʻua, o nofoa e pei o nofoa i faletifaga, ma e toʻa 100 e mafai ona ofi ai. E tusa ma le 50 tagata e auai e lē aunoa i sauniga e lima i vaiaso taʻitasi.

Ioe, ua mafai ona suia olaga ona o aʻoaʻoga a le Tusi Paia. Ua mafai e pagota i aso nei ona suia o latou uiga ma matataʻu i le Atua, e pei lava foʻi o le tupu o Manase, lea o loo taʻua i le Tusi Paia. O ia o se tupu o Iuta sa ia faia ni mea e matuā leaga lava, ma na ave faatagataotauaina o ia i Papelonia, ae na ia salamō ma tatalo ina ia faamagaloina.—2 Nofoaiga a Tupu 33:12, 13.

[Ata i le itulau 20, 21]

Papatisoga i totonu o se toese

[Ata i le itulau 20, 21]

O i latou e talaʻi faataimi atoa ma ē o loo faia le aʻoga i se Aʻoga a Paeonia i se toese