Le Manatu o le Tusi Paia

Aiseā ua Taʻua ai Iesu o le Alo o le Atua?

NA TAUTALA atu Peteru ma lona mautinoa atoatoa iā Iesu: “O oe o le Keriso, o le Alo o le Atua soifua.” (Mataio 16:16) E tele mau i le Tusi Paia o loo iai le manatu, o Iesu o le Alo o le Atua, ma e eseese lagona o tagata e naunau i mea faale-Tusi Paia i lea tulaga.

O i latou e talitonu o Iesu Keriso o le Atua lea, e faigatā ona latou faamatala le māfuaaga ua taʻua ai o ia o le Alo o le Atua. Ae a mafaufau lelei i ai, e lē mafai ona avea Iesu ma ia mea uma e lua. O nisi ua manatu o Iesu o se tagata tāua i talafaasolopito, po o se tagata poto, po o se perofeta moni a le Atua, ona pau lea. Ae o le ā moni le aʻoaʻoga a le Tusi Paia? E iai se tāua po o lē fea talitonuga e te talitonu ai?

Le Ulumatua a le Atua

Ua iloa mai le Tusi Paia, na iai le taimi na soifua ai le Atua na o ia lava. Ae o lona alofa na ia filifili ai e faasafua atu i isi le meaalofa o le ola, i le avea lea o ia ma tamā, ae e lē i le auala e masani ai. Na faaaogā e Ieova lona mana silisili e foafoa ai mea, ia faia ai se tasi e tino agaga, e atamai, ma o ia “o le amataga o mea na faia e le Atua.” Ua tatou iloa o ia i lona suafa, o Iesu Keriso. (Faaaliga 3:14; Faataoto 8:22) Na faia e le Atua Iesu, a o soifua na o ia, o lea ua talafeagai ai ona taʻu Iesu o le “Alo e toʻatasi,” ma “o le ulumatua o mea uma lava ua faia.”—Ioane 1:14; Kolose 1:15.

Ua manino mai la, afai o Iesu le foafoaga muamua a le Atua, e lē mafai ona faapea o Iesu Lē na faia mea, po o ia “o le Atua e toʻatasi.” (1 Timoteo 1:17) Peitaʻi e tele ni faaeaga na tuuina atu e le Atua i lona Alo. O se faaaʻoaʻoga, na faaaogā e le Atua Iesu e na te faia “mea uma lava,” e aofia ai agelu. Ua taʻua nei agelu o “atalii o le Atua,” ona o Ieova na latou  maua mai ai le ola.—Kolose 1:16; Iopu 1:6; 38:7.

Ina ua uma ona saunia le lalolagi mo tagata, e foliga mai o lona Alo ulumatua lea na fetalai i ai le Atua: “Ina tā faia ia le tagata i lo taʻua faatusa.” (Kenese 1:26, NW; Faataoto 8:22-31) Na faia foʻi e Ieova lona atalii faaletagata, o Atamu, e ala i le foafoaga agaga lea ua igoa iā Iesu.—Luka 3:38.

Ua Avea Iesu ma Atalii Faaletagata o le Atua

Ua faaalia mai e le aposetolo o Ioane e faapea i le taimi atofaina, o le Alo agaga lenei o le Atua, na ‘liu tino tagata, ma mau ma i tatou.’ (Ioane 1:14) Ina ia suia le tino agaga o Iesu e avea ma tino tagata, na faavavega ona aumaia e le Atua le ola o Iesu mai le lagi ma tuu i le manava o se taupou Iutaia e igoa iā Maria. O le faia faapea, ua tumau ai pea le avea o Iesu ma Alo o le Atua, e ui o ia o se tagata. E lē gata i lea, e lē o se tagata ae o le Atua na foaʻia le ola iā Iesu, o lea, na fanau o ia ma le lelei atoatoa, e aunoa ma se agasala. Na taʻu atu e le agelu o Kaperielu iā Maria: “E taʻua ai le tama paia e fanau mai, o le Alo o le Atua.”—Luka 1:35; Eperu 7:26.

A o soifua Iesu o se tagata, o le Tamā lava ia na faamaonia mai e faapea o Iesu lona Alo. I le taimi o le papatisoga o Iesu, na vaai ai Ioane le Papatiso ua faaavanoa le lagi, faapea ma le siʻufofoga mai le lagi na faapea mai: “O loʻu atalii pele lenā, ua ou fiafia lava iā te ia.” (Mataio 3:16, 17) E lētioa a fai Ioane i ona soo: “Ua ou vaaia foʻi, ma ou molimau o ia lava le Alo o le Atua.”—Ioane 1:34.

I le taimi o lana faiva i le lalolagi, e leʻi faalauaʻiteleina e Iesu faapea o ia o le Mesia, o le Alo o le Atua. (Mareko 8:29, 30) Na ia tuu ia iloa e le tagata lava ia, e ala i le faalogo i ana aʻoaʻoga, ma mātau le auala na ia soifua ai, ma vaai i ana vavega e tele, auā na faia le tele o ana vavega i luma o tagata. O se faaaʻoaʻoga, na ia faamālōlōina “ē ua mamaʻi atoa uma, o ē ua i ai maʻi eseese, ma ē ua puapuagatia.” (Mataio 4:24, 25; 7:28, 29; 12:15) Na ō atu iā Iesu i latou uma e tauaso, tutuli, pipili, ma maʻi eseese, ma na ia faamālōlōina. Na ia toe faatutūina foʻi nisi na feoti! (Mataio 11:4-6) A o vāai ona soo, na faavavega ona savali o ia i luga o le vai, ma faafilemuina matagi ma galu. O lea faaaliga o lona mana na uunaʻia ai ona soo e faapea ane: “E moni, o oe lava o le Alo o le Atua.”—Mataio 14:24-33.

Le Ala ua Aogā ai le Alo o le Atua mo Oe

Aiseā na aumaia ai e le Atua mai le lagi le ola o lona Alo e toʻatasi i le lalolagi, ma maliu ai i se maliu tigā? “Ina ia lē fano se tasi e faatuatua iā te ia, a ia maua e ia le ola e faavavau.” (Ioane 3:16) Ioe, o lona maliu ua mafai ai ona ‘foaʻi lona ola e fai ma togiola e sui aʻi tagata e toʻatele.’ (Mataio 20:28) O le mea moni, i le talafaasolopito atoa, e leai se isi ua faaalia se alofa e sili atu mo le fanau a tagata, na i lo le alofa o Ieova ma lona Alo ulumatua.—Roma 8:32.

Ina ua mavae lona maliu, na faaalia mai, pe “faasinotonuina [Iesu] o le Alo o le Atua” i se auala mamana faapitoa, e ala “i le toe tū mai nai ē ua oti,” ia avea o se Alo agaga o le Atua. (Roma 1:4; 1 Peteru 3:18) Na avea o ia ma Tupu o le Malo o le Atua, ina ua mavae le toeitiiti 1,900 tausaga o faatalitali ma le onosaʻi i autafa o lona Tamā. Ua toeitiiti pule mai lea malo faalelagi i le lalolagi atoa.—Salamo 2:7, 8; Tanielu 7:13, 14.

Pe e te fia mauaina le finagalo lelei o lenei Alo malosi o le Atua? Afai o lea, matou te faalaeiau atu ia e suʻesuʻe i ana aʻoaʻoga ma faaaogā i lou olaga. O Iesu lava ia na fetalai: “O le ola faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.” (Ioane 17:3) Ioe, e tāua tele po o le ā lou talitonuga o iai, e faatatau i le Alo o le Atua!—Ioane 3:18; 14:6; 1 Timoteo 6:19.

PO O E TAUMĀNATU EA I NISI TAIMI?

▪ Aiseā ua taʻua ai Iesu o le Alo e toʻatasi o le Atua?—Ioane 1:3, 14; Faaaliga 3:14.

▪ Aiseā e ao ai ona talitonu o Iesu o le Alo o le Atua?—Mataio 3:16, 17.

▪ E faapefea ona e maua aogā i lou talitonu e faapea o Iesu o ia o le Alo o le Atua?—Ioane 3:16; Ioane 14:6; 17:3.

[Ata i le itulau 26, 27]

O aʻoaʻoga poto ma vavega mamana a Iesu, na faamaonia ai e lē pei o ia o isi tagata