Le Manatu O Le Tusi Paia

Pe e Iai se Aogā o le Faatupu o le Filemu?

NA FAAPEA mai Iesu Keriso i lana lauga taʻutaʻua: “Amuia ē faatupuina le filemu.” Na ia faapea mai foʻi: “Amuia ē agamalu; auā e fai mo latou tofi le nuu.” (Mataio 5:5, 9) O le faatupu o le filemu, e lē na o se lagona. Ae o le tagata e faatupuina le filemu, e tausolomua i le faaalia o lea uiga, ma taumafai ia maua le filemu.

Pe e aogā upu a Iesu o loo taʻua i luga i o tatou aso? O nisi ua manatu, ina ia taulau i lenei olaga, e ao ona faaali lo latou malosi. Ae faamata e poto le faafetaui o le fia malosi i le fia malosi? Pe e lē sili atu ea le saʻilia o le filemu? Seʻi o tatou talanoa i māfuaaga e tolu e ao ai ona manatunatu i upu nei a Iesu: “Amuia ē faatupuina le filemu.”

▪ MAUA SE LOTO LELEI Ua taʻua i le Faataoto 14:30: “O le loto lelei, o le ola lea o le tino.” Ua tele lipoti faafomaʻi ua taʻu mai ai, o le ita ma le faamisa, e mafai ona oso ai le maʻi e pē ai le itū o le tino, faapea ma le fatu pē. I le faamatalaga a se tasi tusi faafomaʻi e tusa ai o se tagata maʻi fatu, na faatusatusa ai le pasae aʻe o le ita i le pei o se ʻona i le tino. Ua taʻua ai foʻi, “a ita tele, o lona uiga o le tupu tele foʻi lea o le maʻi.” A o i latou e faatupu le filemu, e maua se “loto lelei,” ma e latou te lelei ai.

O se faaaʻoaʻoga o lenei mea, o Simi, o se alii e 61 tausaga, o loo ia aʻoaʻo atu le Tusi Paia i tagata mai Vietiname. Ua fai mai o ia: “Ou te iloa lelei uiga e pei o le sauā, ita, ma le lē fiafia, ona e ono tausaga na ou iai i le vaegaʻau, ma e tolu taimi na ou auai ai i taua. Ou te lē moe lelei i le pō, talu ai mea na ou faia. E leʻi umi ae aafia loʻu malosi ona o loʻu popole.” Na faapefea ona ia maua le mapusaga? O lana tali: “Pe ana ou lē suʻesuʻeina le Tusi Paia ma Molimau a Ieova, e faapenei ua ou leai. Ua ou maua se loto lelei ona ua ou iloaina le fuafuaga a le Atua mo se lalolagi fou filemu, faapea ma le auala ou te ofu ai i ‘le tagata fou.’ Ua telē le suiga o loʻu malosi ua iai.” (Efeso 4:22-24; Isaia 65:17; Mika 4:1-4) Ua tele nisi tagata ua latou iloa mai mea ua oo iā i latou, o le saʻili ia maua se uiga filemu, e faaleleia ai le malosi i faalogona, le tino, ma le faaleagaga.—Faataoto 15:13.

 ▪ E FAALELEIA AI FAIĀ O le a aogā le faaalia o lea uiga i a tatou faiā ma isi. Ua taʻua i le Tusi Paia: “Ia teʻa ma outou . . . le lotoa, ma le ita, ma le leo tele, ma le upu faaleaga, atoa ma le loto leaga uma lava.” (Efeso 4:31) O i latou e faaalia ia uiga, e lē fiafia i ai isi, ma oo ai ina leai ni a latou uō lelei. Ua faapea mai le Faataoto 15:18: “O le tagata lotoa, na te faatupuina le misa; a o lē faatoʻatoʻa e tuu lelei iā te ia le finauga.”

O se toeaina Kerisiano i Niu Ioka e 42 ona tausaga, e igoa iā Andy, na ola aʻe o ia i se siʻomaga sauā. Fai ma o ia: “Na ave aʻu i le mea e toleni ai tama fusu, ma amata aʻoaʻo e fusu i le valu o oʻu tausaga. Na augapiu ma soʻu manatu alofa i tagata na matou fetaui, pau lea ia vave laʻu tuʻi ina neʻi oʻu lavea. E leʻi umi ae ou auai i se kegi. E matou te faamimisa ma fetauaʻi ma isi i ala tetele. E tele taimi na faalālā mai ai fana ma naifi e tagata iā te aʻu. E lē lelei ni aʻu uō na iai, ma o le fefe le māfuaaga o a matou faauōga.”

Ae o le ā le māfuaaga na saʻili ai e Andy le filemu? Fai mai o ia: “I se tasi aso na ou alu ai i le sauniga i le Maota mo Sauniga o Molimau a Ieova, ma na vave ona ou lagonaina le fealofani o tagata. Talu mai lenā taimi, o loʻu faatasi atu i nei tagata o loo saʻili i le filemu, na aogā ou te ati aʻe ai se loto lelei, ma ua mou atu ai oʻu uiga tuai. Ua tele aʻu uō moni ua iai.”

▪ FAAMOEMOE MO LE LUMANAʻI O le māfuaaga sili e faatupu ai le filemu: Ona e faaalia ai lo tatou āva ma le migao i le finagalo o Lē na faia i tatou. Ua uunaʻia i tatou e lana Afioga: “Inā saʻiliʻili atu ia i le filemu, ma tausisi i ai.” (Salamo 34:14) E tatou te maua se faiā māfana ma Ieova, pe a tatou amanaʻia o loo soifua o ia, ma aʻoaʻoina ma tausisi i ana aʻoaʻoga e maua ai le ola. O lea faiā lelei, o le a tatou maua ai le filemu, po o le “manuia mai le Atua.” E ui ina tele luʻi e oo mai i le olaga, ae o le a faasilisilia lea filemu.—Filipi 4:6, 7.

E lē gata i lea, e taʻu atu ai iā Ieova lo tatou manaʻoga ia avea ma tagata e fiafia mai i ai. Ua faailoa atu ai i le Atua, e mafai ona tatou ola i lana lalolagi fou filemu. Pe a ia aveesea ē amioleaga, e pei ona fetalai ai Iesu, o ē e faatupu le filemu, e “fai mo latou tofi le nuu,” ma o le a tatou vāai i ai. O se faamanuiaga tele lea!—Salamo 37:10, 11; Faataoto 2:20-22.

Ioe, ua manino mai le aogā tele o upu a Iesu: “Amuia ē faatupuina le filemu.” E tatou te maua ai se loto lelei, ni faiā māfana, ma se faamoemoe mautū mo le lumanaʻi. O le a fai mo i tatou ia faamanuiaga, pe a tatou matuā taumafai ina ia “nofo lelei ma tagata uma lava.”—Roma 12:18.

[Ata i le itulau 29]

“Ua telē le suiga o loʻu malosi ua iai.”—Simi

[Ata i le itulau 30]

“Ua tele aʻu uō moni ua iai.”—Andy