O le ā se Lumanaʻi mo le Faa-kerisiano?

FAAMATA o le a faa-Kerisianoina le lalolagi atoa, po o le a mou atu? Po o tumau pea ona avea le Faa-Kerisiano ma malamalama i le lalolagi pogisa, po ua filogia? Ua loa ona tatou fia iloa le tali o ia fesili.

Na fai e Iesu se tala faatusa faigofie e faailoa mai ai, ina ua uma ona ia faavaeina le Faa-Kerisiano, na faalavelave ane le fili, o Satani. (Mataio 13:24, 25) O lea la, e lē o tagata na suia le Faa-Kerisiano i senituri talu ona mavae Iesu, ae o taumafaiga a le fili, o Satani. O loo faaauau pea i lotu ua taʻu o lotu Kerisiano nei sesē mai anamuā, ma o loo latou seleseleina foʻi ona fua.—2 Korinito 11:14, 15; Iakopo 4:4.

O se Taumafaiga Faalilolilo

Na valoia e Iesu, o le a iai se taimi e filogia ai ana aʻoaʻoga. Na faapea mai o ia: “Ua faatusaina le malo o le lagi i le tagata na lūlūina le saito lelei i lona fanua; ua momoe tagata, ona alu ane ai lea o lē ua ita mai iā te ia, ua na lūlūina le titania i totonu o le saito, ona alu ese ai lea o ia.” Ae ina ua taʻuina e auauna i le matai lea mea, ma latou mananaʻo loa e vele ese le titania, na fai atu le matai: “Aua; ina neʻi outou liaʻi ma le saito pe a outou vele ese le titania. Tuu ia, ia tupu lua pea seʻia oo i le seleselega; a oo atu i ona pō e selesele ai, ou te fai atu ai i ē selesele, Ia outou muaʻi faapotopoto mai le titania, ma outou fusia i fusi e susunu ai; a o le saito, tou te faaputuina lea i loʻu fale saito.”—Mataio 13:24-30.

Na toe faamatala e Iesu i lana faataoto e faapea, o ia lea na lūlūina le saito i lona fanua, ae o le saito, o loo faatatau i Kerisiano moni. O le fili na lūlūina le titania i totonu o saito, o le “Tiapolo” lea. Ua faatusaina titania i tagata liliu ese e lē pulea, o ē fai mai o auauna a le Atua. (Mataio 13:36-42) Na faamatala atili e Paulo le mea e tupu. Fai mai o ia: “Auā o aʻu  nei, ua ou iloa lenei mea, pe a mavae ona ou alu, e oo mai iā te outou luko sauā o ē lē faasaoina le lafu mamoe. E tupu mai foʻi iā te outou lava tagata e tautala mai i mea faapiʻopiʻo, e fetoso ese ai le ʻau soo ia mulimuli iā i latou.”—Galuega 20:29, 30.

Faaleagaina o le Faa-Kerisiano

Pe na taunuu mea na valoia e Iesu ma Paulo? Ioe. Na oo ina pulea le faapotopotoga lea na faavae e Iesu e tagata fia pupule, ma faia e tusa ma o latou manaʻo. Na fetalai Iesu i ona soo: “E lē ni o le lalolagi outou.” (Ioane 15:19) Peitaʻi ane, na faia e tagata fia pupule sootaga ma taʻitaʻi, ma avea ma lotu autū a le Malo, ma na tele lo latou paoa ma oloa na maua ai. Na latou aʻoaʻoina “mea faapiʻopiʻo.” O se faataʻitaʻiga, na latou aʻoaʻo tagata ia tapuaʻi i le Malo ma ia ō atu e tau i taua. Na faapena ona auai le tele o ē ua fai mai o Kerisiano i Taua Paia, ma fasiotia ai tagata e lē fia liulotu. Na latou auai foʻi i taua a le lalolagi ma iʻu ai ina latou fasiotia o latou lava uso tapuaʻi mai isi atunuu. O le mea moni, latou te leʻi solitū ma alolofa i o latou tuaoi, e pei ona sa tatau ona faia e Kerisiano moni.—Mataio 22:37-39; Ioane 15:19; 2 Korinito 10:3-5; 1 Ioane 4:8, 11.

Ua manino la, o lotu ua au senituri o faapea mai o Kerisiano, ua na ona faafoliga mai e Kerisiano. E pei ona taʻua i mataupu muamua, o le māfuaaga lea ua tele ai le mau lotu eseese ma lotu mavae, o loo auai i faiga faapolotiki, ma ua latou lē amanaʻia tulafono a le Atua. O nei fua leaga, e pogai mai le Faa-Kerisiano pepelo lea na amata e le Tiapolo, ae lē o le Faa-Kerisiano moni. O le ā o le a tupu i tapuaʻiga sesē? E pei ona taʻua e Iesu i lana faataoto, e lē faapea o le a mou atu ona ua leai nisi e lagolagoina, ae o le a faasalaina ma faaumatia.

Avea Kerisiano Moni ma Pupula i le Pogisa

Na taʻua i le faataoto a Iesu se isi mea o le a tupu a o leʻi aoina “titania,” po o le Faa-Kerisiano pepelo, ma faaumatiaina. Na faigatā ona iloa le “saito” po o le Faa-Kerisiano moni ona o le lauolaola o le “titania,” po o le Faa-Kerisiano e lē moni. Ae na fai mai Iesu o le a ao ese le saito mai le titania i le taimi o le “seleselega,” lea na ia faatatauina i le “gataaga o lenei lalolagi.” Na ia fetalai atili: “Ona pupula ai lea o ē amiotonu e pei o le lā.” (Mataio 13:39-43) Ua faamaonia o loo tatou ola i le taimi o le iʻuga o lenei faiga o mea, talu le Taua Muamua a le Lalolagi, lea ua ova atu ma le 90 tausaga  talu ona tupu. (Mataio 24:3, 7-12) Po ua taunuu ea lenei vaega o le faataoto faavaloaga a Iesu?

O lea ua vavaeeseina Kerisiano moni mai le “titania,” po o lotu ua fai mai e Kerisiano. Ma ua pei ai Molimau a Ieova, o ni ē ‘pupula e pei o le lā,’ a o latou fesoasoani i isi ia iloa le Atua moni, o Ieova. E lē manatu faatauvaa Molimau a Ieova i ana tapulaa. O lea la, o ē ua avea ma Molimau, e ao ona tele ni suiga i o latou olaga ina ia tusa ma aʻoaʻoga faavae o loo i le Tusi Paia.

E leai ni faafiafiaga e faia i sauniga a Molimau a Ieova, ae e faia fua aʻoga faale-Tusi Paia. E latou te fealofani ma fefaauōaʻi, o ni uiga ua latou aʻoaʻoina a o latou suʻesuʻeina le Tusi Paia. Ua latou talitonu o le a faia e le Atua le lalolagi ia avea ma parataiso, e nonofo ai ē agamalu, o lana fuafuaga lea i le amataga. Ae o le a muamua ona faamamā ese aafiaga mai lotu sesē, lea o loo taʻu e le Tusi Paia o Papelonia le aai tele. E tusa ma valoaga o le Tusi Paia, ua toeitiiti ona aumaia lea e Ieova na suiga tetele.—Mataio 5:5; Faaaliga 18:9-10, 21.

A oo loa ina saʻoloto tagata mai faiga taufaasesē a lotu sesē, o le a autasi tagata uma i le lalolagi ona o le tapuaʻiga moni. E ese le matagofie o le lumanaʻi o le Faa-Kerisiano moni, lea na faavaeina e Iesu! O le a toe maua se parataiso e pei ona sa iai i Etena, i se lalolagi e filemu e aunoa ma lotu fevaevaeaʻi!

[Ata i le itulau 7]

‘Ona alu ane lea o lē ua ita iā te ia, ua lūlūina le titania.’—Mataio 13:25

[Ata i le itulau 8, 9]

Susū mai i le Maota mo Sauniga a Molimau a Ieova, o loo fai fua ai aʻoga o le Tusi Paia

[Ata i le itulau 9]

“A o le saito, tou te faaputuina lea i loʻu fale saito.”—Mataio 13:30