Auala 1

Saʻili Fautuaga Lelei

Aiseā e tāua ai? O le taimi muamua lava e sii ai e mātua se pepe faatoʻā fanau mai, atonu e faatumulia i laʻua i mafaufauga eseese. Na faapea mai Apete o se tamā e aumau i Peretania, “Sa ou matuā olioli, ae sa ou lagona foʻi le lē mautonu. Sa ou lagona le mamafa o lenei tiute tauave ma ou iloa ou te lē o sauni mo lenei galuega.” Na faapea mai Monika o se tinā e nofo i Anitenitina: “Sa ou popole pe mafai ona ou tausia manaʻoga o si aʻu tama teine. Sa ou mafaufau, ‘Faamata e mafai ona ou aʻoaʻoina o ia e avea ma se tagata matua e taulau manuia?’”

Pe faamata e mafai ona e malamalama i le olioli ma popolega o nei mātua? Ioe, o le tausia aʻe o se tamaitiiti o se tasi ia o galuega e aupito i faigatā ma faavaivailoto, ae mautinoa e faamalieina, ma o se tiute e mafai ona faia e se tasi. E pei ona faamatalaina e se tamā, “e vave ona matutua tamaiti.” Ona o le telē o taaʻiga a mātua i le soifua mālōlōina ma le fiafia o le fanau, e iā te oe la se faanaunauga malosi ia maua ni fautuaga maufaatuatuaina e avea ai o se matua lelei.

Le māfuaaga e faigatā ai: E foliga mai e tofu lava le tagata ma ana fautuaga i le tausiaina o fanau. I taimi ua teʻa, sa faalagolago mātua fou i faaaʻoaʻoga a o latou mātua, po o talitonuga faalelotu e taʻitaʻia i latou. Ae i le tele o atunuu, ua lē o toe malosi le liʻo o le aiga ma ua lē o toe malosi le uunaʻiga a lotu. O lea la, ua tele mātua ua liliu atu i le ʻaufaitofā mo ni fautuaga. O nisi o fautuaga e maua mai e nei tagata e faavae mai i taʻiala aogā. I nisi taimi, o fautuaga e tuuina mai e le ʻaufaitofā e ono iai ni feteenaʻiga, pe e lē umi foʻi lona aogā.

Le auala e faaleleia ai: Ia saʻili atu mo ni fautuaga i Lē e sili lona silafia i le auala e tausi aʻe ai le fanau, o lē na Foafoaina tagata, o Ieova le Atua. (Galuega 17:26-28) O loo maua i le Tusi Paia fautuaga tuusaʻo ma faaaʻoaʻoga aogā e avea ai oe ma matua lelei. Na ia faamautinoa mai: “Ou te faatonu iā te oe, ma ou vaai iā te oe.”—Salamo 32:8.

O ā fautuaga o loo tuuina mai e le Atua i mātua e fesoasoani iā i latou e tausia aʻe ai se fanau fiafia?

[Faamatalaga faaopoopo i le itulau 3]

“Ia e faatuatua iā Ieova ma lou loto atoa; a e aua le faalagolago i lou lava atamai.”—Faataoto 3:5