O le ā e Faatatau i ai le Tusi Paia?

UA VAAI nisi i le Tusi Paia o se tusi o talafaasolopito, ona o loo faamau ai faamatalaga o le faitau afe o tausaga o feutagaʻiga a le Atua ma tagata. Ae ua manatu nisi o se tusi mo taʻiala o amioga tatau. O loo latou faasino atu i le silia ma le 600 tulafono ma aiāiga lea na tuuina atu e le Atua i le nuu o Isaraelu e faatatau i faamasinoga, aiga, amioga, ma tapuaʻiga. E ui i lea, o loo manatu pea nisi o le Tusi Paia o se tusi taʻiala faaleagaga lea e faaalia mai ai mafaufauga o le Atua.

O le mea moni, e saʻo uma nei faamatalaga. O loo faapea mai le Tusi Paia: “O Tusitusiga Paia uma e mai le agaga o le Atua, ma e aogā e aʻoaʻo ai, e aʻoaʻi ai, e faasaʻo ai mea, e faatonu ai i le amiotonu, ina ia matuā agavaa ai le tagata o le Atua, e lava saunia mo galuega lelei uma.” (2 Timoteo 3:16, 17) O lea la, o mea uma i le Afioga a le Atua, lea e aofia ai talafaasolopito, tulafono, ma fautuaga faaleagaga, e aogā uma lava.

Peitaʻi, e tele atu mea aogā o loo i le Tusi Paia nai lo ni faamatalaga e aoao mai. E mataʻina le Tusi Paia ona o loo faaali mai ai e Ieova le Atua mea iā i tatou. O loo maua ai ni fautuaga ua faagaeeina e le Atua ma e aogā i aso taʻitasi o le olaga. Ua faaalia mai ai le fuafuaga a Ieova mo le lalolagi ma tagata, aemaise le faaalia mai o le auala o le a ia aveesea ai le pogai o mafatiaga. E sili i nei mea uma, o loo faamatala e le Tusi Paia le auala ua tuuaʻia sesē ai le Atua, ma o loo faamatala ai le auala o le a ia faasaʻo ai lenei luʻi.

Ua Taʻua le Atua e Pepelo ma o se Taʻitaʻi Leaga

Ua faapea mai le Tusi Paia, na faia e le Atua le uluaʻi tagata, o Atamu ma Eva, ma na lelei atoatoa i laʻua i le mafaufau ma le tino ma na tuuina i laʻua i se nofoaga matagofie. Na ia avatu iā i laʻua le matafaioi o le vaavaaia o le lalolagi ma meaola. (Kenese 1:28) Ona o i laʻua o le fanau a le Atua, na maua e Atamu ma Eva le avanoa e ola ai e faavavau i le lalolagi, pe a faaauau pea ona la usiusitai i lo la Tamā o i le lagi. Ae na o le tasi se faasāsāga na ia tuuina atu iā i laʻua. “O laau uma o i le faatoʻaga e te ʻai ai. A o le laau e iloa ai le lelei ma le leaga, aua e te ʻai ai; auā o le aso e te ʻai ai e te oti ai lava.”—Kenese 2:16, 17.

Peitaʻi, o se foafoaga agaga malosi o loo faaalia mai i le Tusi Paia o Satani le Tiapolo, na ese le mea na ia fai atu ai: “Lua te lē oti lava.” (Kenese 3:1-5) Ona o lona tetee atu i le Atua, e lē gata ina faapea atu Satani e pepelo Lē na foafoaina mea, ae toe sesē foʻi le auala o loo Ia pule ai, ma e mafai ona ola pea le tagata e aunoa ma le Atua. Na mafai e Satani ona faatalitonuina Eva, o le lē usiusitai i le Atua o le a saʻoloto ma pule ai lava o ia i amioga tatau. Na faapea atu Satani iā Eva o le a e ‘pei o se Atua’! Na faaleagaina e Satani le suafa lelei o Ieova ma ana fuafuaga.

E matuiā āuga o lenā talanoaga. O le matua o le Tusi Paia, o le fuafuaga lea a Ieova e toe taʻumamā ai lona suafa ma lona tulaga taʻuleleia. O loo aotele lenei manatu i le tatalo na faataʻitaʻi mai e Iesu, lea e taʻua o le Tatalo a le Alii. Na aʻoaʻo e Iesu ona soo e tatalo: “Ia faapaiaina lou suafa. Ia oo mai lou malo. Ia faia lou finagalo i le lalolagi.”—Mataio 6:9, 10.

Le Auala e Taʻumamāina ai e le Atua Lona Suafa

O le luʻi a Satani na tulaʻi mai ai ni mataupu e tāua tele: O ai na tautala i le mea moni, o Ieova po o Satani? Po o lelei ma tonu le pule a Ieova i ana foafoaga? Pe e iai sana aiā e faatalitalia ai  tagata e usiusitai iā te ia? Pe e sili atu ona pulea e tagata i latou lava? Ina ia taliina nei fesili, ua faataga e Ieova sina taimi puupuu e pule ai tagata iā i latou lava.

O le ā le iʻuga? Talu mai le uluaʻi pepelo i Etena, ua faatumulia le talafaasolopito o tagata i tigā ma mafatiaga, ma ua faamaonia ai o Satani o se matuā pepelo lava, ma o le tutoʻatasi mai le Atua ua na o le malaia lava e oo i ai. Peitaʻi, ona o le alofa ma lona poto tele, ua ia finagalo ai e aveesea ia faafitauli uma na amata mai Etena. O le a ia faia lenā mea e ala i le Malo o le Mesia. O le ā lenā Malo?

Le Malo, o le Vaifofō Lea a le Atua

E faitau miliona tagata ua masani ona fai faatauloto le Tatalo a le Alii. Aiseā e te lē faaalu ai se taimi e mafaufau ai i lona uiga? Seʻi mafaufau i upu nei: “Ia oo mai lou malo.” (Mataio 6:10) E lē uiga atu lenā mea i le loto, e pei ona talitonu i ai le toʻatele. Nai lo lea, o le faaupuga “Tupu,” o loo faaalia ai o se malo, e i luga i le lagi i aao o Iesu Keriso, o ia o le “Tupu o tupu.” (Faaaliga 19:13, 16; Tanielu 2:44; 7:13, 14) O loo aʻoaʻo e le Tusi Paia e faapea, o le a ia pule i le lalolagi aoao, o le a ia faatumauina le filemu ma le autasi i tagata uma, ma aveesea le amioleaga mai le lalolagi. (Isaia 9:6, 7; 2 Tesalonia 1:6-10) I le faia faapea, o le a faataunuu ai e le Malo o le Atua ae lē o malo a tagata, ia fetalaiga a Iesu: “Ia faia lou finagalo i le lalolagi.”

Ina ia taunuu na fetalaiga, na tuuina mai e Iesu lona ola e fai ma togiola, ina ia laveaʻi mai ai suli o Atamu mai le agasala ma le oti. (Ioane 3:16; Roma 6:23) O lea la, i lalo o le pulega a le Malo o le Atua, o i latou uma e faatuatua i le togiola a Keriso, o le a latou mātauina le aveesea o āuga o le agasala a Atamu, ae faasolosolo ona agaʻigaʻi atu i le lelei atoatoa. (Salamo 37:11, 29) O le a lē toe iai se maʻi lea tatou te aafia ai, aemaise lava pe a oo mai le tino matua. O le a lē toe iai foʻi ni faalogona tigā e aumai e le maʻi ma le oti, auā o le a “mavae atu mea muamua.”—Faaaliga 21:4.

E faapefea ona tatou mautinoa o le a faataunuu e le Atua ana folafolaga? E tele valoaga o loo i le Tusi Paia ua uma ona faataunuuina. (Tagaʻi i le itulau e 9.) O lea la, o le faatuatua i le Tusi Paia, e lē o se mea e fesiligia po o ni moomooga faivavale, ae e faavae mai i le tele o faamaoniga.—Eperu 11:1.

Fautuaga Aogā i o Tatou Aso

E lē gata e maua ai se faavae mautū mo lo tatou faamoemoe i le lumanaʻi, ae e fesoasoani le Tusi Paia iā i tatou e maua ai le fiafia i aso nei. O se faataʻitaʻiga, e tele fautuaga aogā o loo i le Tusi Paia mo faaipoipoga, olaga faaleaiga, faiā a tagata, mauaina o le fiafia, ma le tele o isi mataupu. Seʻi tagaʻi i nisi nei o faataʻitaʻiga.

▪ Mafaufau muamua a o leʻi tautala. “O i ai lē soona tautala, e pei o tutuʻi i le pelu; a o laulaufaiva o ē popoto e mālōlō ai.”—Faataoto 12:18.

▪ ʻAlofia le matauʻa. “O le loto lelei, o le ola lea o le tino; a o le matauʻa, o le mea e pala ai ivi.”—Faataoto 14:30.

▪ Ia aʻoaʻo lau fanau. “Aʻoaʻo ia i le tama e tusa ma lona ala; a oo ina toeaina lava o ia, e lē teʻa ese ai.” “O le tama ua tuulafoaʻiina, e tupu ai le mā o lona tinā.”—Faataoto 22:6; 29:15.

▪ Ia faamagalo. Na faapea mai Iesu: “E fiafia o ē alolofa mutimutivale, auā e faaalia i ai le alofa mutimutivale.” (Mataio 5:7) Na tusi le tupu poto o Solomona: “O le alofa e ufiufi ai solitulafono uma lava.” (Faataoto 10:12) Pe afai e matuiā se agasala a se tasi iā te oe ma ua faigatā ai ona e faamagalo ma faagalo, o loo fautua mai le Tusi Paia: “Ia e alu lua te talanoa na o oulua e faaali i ai lana mea sesē.”—Mataio 18:15.

▪ ʻAlofia le manaʻo i tupe. ‘Auā o le manaʻo tele i tupe o le pogai lea o mea leaga eseese uma, ma o le manaʻo tele i ai ua tuia ai i latou e i latou lava i le tele o tigā.’ (1 Timoteo 6:10) Mātau e lē o faapea mai le Tusi Paia e leaga le tupe, a o le “manaʻo tele i tupe” e leaga lea.

O se “Tusi” Mai lo Tatou Tamā o i le Lagi

E tele mataupu eseese o loo i le Tusi Paia. O loo faaautū atu i le Atua ma lona finagalo. Ae e faatatau foʻi iā i tatou, i le auala e mafai ai ona  tatou ola fiafia i le taimi nei ma i le faavavau i lalo o le pulega o le Malo o le Atua. Ua pei le Tusi Paia o se tusi mai lo tatou ‘Tamā o i le lagi’ o Ieova. (Mataio 6:9) I le Tusi Paia atoa, o loo faailoa mai e Ieova ona manatu tāua iā i tatou, aemaise lona finagalo ma ona uiga mataʻina.

E ala i le faitauina o le Tusi Paia ma mafaufau loloto i ai, ua amata ai ona tatou “iloa” atu le ituaiga o Atua e iai o ia. E tosina atu ai o tatou loto iā te ia ma maua ai se faiā lelei ma ia. (Iakopo 4:8) Ina ia tatou mautinoa, o le Tusi Paia e lē faapea na o talafaasolopito, valoaga, ma tulafono. E aofia ai foʻi la tatou faiā ma le Atua. O le māfuaaga lenā e tutasi ma tāua ai lenei tusi.—1 Ioane 4:8, 16.

[Faamatalaga faaopoopo i le itulau 19]

O le matua o le Tusi Paia o loo taaofaʻi i uluaʻi fuaiupu o le o le tatalo na faataʻitaʻi mai e Iesu

[Pusa/Ata i le itulau 21]

LE AUALA E FAITAU AI LE TUSI PAIA

E mataʻina le Tusi Paia i le faitau. O le tele o tala ma lesona i amioga tatau, e lē gata ina lausilafia ae ua tele ina tusia i tusi i le tele o gagana. Ua fesoasoani le Tusi Paia ina ia tatou iloa Lē na Foafoaina mea, o Ieova le Atua. O se tasi lea o puna autū o le poto. O loo faapea mai le faataoto a le Tusi Paia: “O le poto o le mea sili lea, ia maua le poto; o mea uma e te maua ia maua mai ai le atamai.” (Faataoto 4:7) E faapefea ona tele se aogā e te maua mai lau faitauga Tusi Paia?

Taumafai e fai lau faitauga i le taimi e sili ona e mataala ai. Aua le faatopelauina lau faitau. O lou sini ina ia faatumulia lou mafaufau i mafaufauga o le Atua ma malamalama i ai. Pe a uma sau faitauga, ia manatunatu i mea na e faitau i ai, ma faatusatusa i mea ua e iloa. O le a faaloloto ai lou malamalama ma lou loto talisapaia.—Salamo 143:5.

Atonu e mafaufau nisi, ‘O fea o le Tusi Paia o le a amata ai laʻu faitauga?’ E mafai ona e amata mai le amataga. Peitaʻi, o isi faatoʻā faitau i le Tusi Paia, e faigofie pe a amata i Evagelia, o Mataio, Mareko, Luka, ma Ioane, e faatatau i le olaga o Iesu ma lana auaunaga. Ona faasolo atu lea i tusi e mataʻina lona tusiaina faafatusolo e tumu i le poto—o le Salamo, Faataoto, ma le Failauga. A māeʻa lenā, ua tatau ona faaosofia lou naunau mo isi vaega o le Tusi Paia. (Tagaʻi i lalo.) Aua neʻi faasesēina i le manatu faapea e na o le Feagaiga Fou e tatau ona faitauina. Ia mātau, “O Tusitusiga Paia uma e mai le agaga o le Atua, ma e aogā.”—2 Timoteo 3:16.

O se tasi o auala e vave ma faigofie e suʻesuʻeina ai le Tusi Paia o le mataupu i le mataupu. O se faaaʻoaʻoga, o le tusi O ā Aʻoaʻoga Moni a le Tusi Paia? lea e faaaogā e Molimau a Ieova i la latou talaʻiga, ma e tele mataupu talafeagai i le taimi nei e pei o “Le Auala e Fiafia ai o Tatou Aiga,” “Le Tapuaʻiga e Talia e le Atua,” ma “O Fea o Iai Ē ua Maliliu?”

[Pusa i le itulau 21]

FAITAUINA O LE TUSI PAIA E TUSA AI MA MATAUPU

Le amataga o le olaga ma le paʻū atu o tagata i le agasala Kenese

Le faavaeina o Isaraelu anamua Esoto i le Teuteronome

Tala mataʻina Iosua i le Eseta

Solo ma pese faagaeeloto Iopu, Salamo, Pese a Solomona

Mauaina o le poto mo le olaga Faataoto, Failauga

Valoaga ma taʻiala i amioga tatau Isaia i le Malaki ma le Faaaliga

Soifuaga ma aʻoaʻoga a Iesu Mataio i le Ioane

O le faavaeina ma le salalau atu o le faa-Kerisiano Galuega

O tusi i faapotopotoga Roma i le Iuta