O ā Tulaga Faigatā o Feagai ma Talavou?

O le ā sou manatu? Pe faamata ua sili atu ona faigatā luʻi o loo feagai ma talavou i aso nei i lo talavou i aso la? Atonu e te tali mai e leai, ona ua e manatu ua sili ona faamanuiaina talavou i aso nei i lo o se isi lava taimi.

I le tele o atunuu, ua mafai ona puipuia talavou mai faamaʻi sa afāina ma maliliu ai, ona o togafitiga faafomaʻi. E ala i le poto faasaienisi, e tele mea fou eseese ua iai sa lē manatu e mafai ona maua. Ma ua faaleleia le tulaga faaletino o le faitau miliona o aiga ona o le siitia o le tamaoaiga. O le mea moni, ua galulue malolosi le toʻatele o mātua ina ia maua e a latou fanau olaga ma aʻoaʻoga latou te leʻi maua.

E mautinoa lava le tele o aogā ua maua e talavou i aso nei. Ae e tele foʻi luʻitau ua latou feagai. O se māfuaaga ua faigatā ai, ona ua tatou ola i le vaitaimi ua taʻua e le Tusi Paia o le “taufaaiʻuiʻuga o le faiga o mea a le lalolagi.” (Mataio 24:3) Na valoia ma le saʻo e Iesu o le a faailogaina lenei vaitaimi i tulaga fesouaʻiina o tagata. (Mataio 24:7, 8) Ua taʻua foʻi e le Tusi Paia lea vaitaimi o “aso e gata ai,” ma “e sili ona faigatā.” (2 Timoteo 3:1) Seʻi o tatou iloiloina ni tulaga faigatā o loo feagai ma talavou i aso nei.

Tulaga Faigatā 1

Ua Faateleina le Faaesea o i Latou Lava

I tifaga, i TV, ma mekasini, ua faaata mai ai talavou e faapea e tele a latou uō e latou te feola aʻe ma aʻoʻoga faatasi, ma e uō lava seʻia oo ina matutua. Ae, e lē o le tulaga lenā e iai le toʻatele o talavou.

Na iloiloina e tagata suʻesuʻe o Barbara Schneider ma David Stevenson ni faatalatalanoaga na faia ma le faitau afe o talavou i Amerika ma iloa ai, e “toʻaitiiti lava talavou aʻoʻoga na tumau pea a latou uō masani.” Na taʻua e  Schneider ma Stevenson, “E leai ni uō māfana a le toʻatele o talavou, ma e tau leai ni talavou e iai ni uō lelei e talatalanoa i ai i o latou faafitauli ma fetufaaʻi o latou manatu.”

Afai e iai ni uō a se talavou, e lē o taimi uma e faatasitasi ai ma i latou. O se suʻesuʻega tele na faia i Amerika na iloa ai, o le toʻatele o talavou e na o le 10 pasene o o latou taimi e faatasitasi ai ma uō, a o le 20 pasene o o latou taimi e faifaimea ai na o i latou, e sili atu i lo o le taimi e faatasitasi ai ma uō ma aiga. E ʻai na o ia, fealuaʻi na o ia, ma faafiafia na o ia.

E toʻatele talavou e faifaimea na o i latou lava ona ua tele mea fou faaonapōnei. O se faataʻitaʻiga, i le 2006, na taʻua ai i le mekasini o le Time e faapea, a fua i ai, o talavou i Amerika e i le va o le 8 ma le 18 tausaga, e tusa ma le ono ma le ʻafa itula i le aso e faaalu e matamata ai i le TV, pe faalogologo i pese, ma fai taaloga vitiō po o le komepiuta. *

Ae e lē o le tupulaga lea na muamua faia lea amio o le faaalu o le taimi o nofonofo ma faalogologo i musika pe taalo i taaloga vitiō. (Mataio 11:16, 17) Peitaʻi, e lē lelei pe a tele le taimi e faaalu i taaloga vitiō ae lē faifaimea faatasi ma le aiga. Ua fai mai Schneider ma Stevenson: “Ua taʻua e talavou lo latou lē fiafia iā i latou lava, leai se fiafia, lē maua se fiafia i mea e fai, ma e lē fia faia ni mea pe a na o i latou.”

Tulaga Faigatā 2

Faaosooso e Faia Feusuaʻiga

Ua matuā faaosoosoina lava talavou ma tamaiti e faia feusuaʻiga. Ua fai mai Nathan, o se talavou e nofo i Ausetalia: “O le toʻatele o tamaiti i laʻu aʻoga na faia feusuaʻiga, e i le va o le 12 ma le 15 tausaga le matutua. Na taʻua e se tamaʻitaʻi talavou mai Mekisikō e igoa iā Vinbay, e masani ona faia e talavou feusuaʻiga e ui e lē māfana i lē o la feusuaʻi. Na fai mai o ia: “O ē e lē faia faapea, e vaai i ai e ese lava i latou.” Ae na fai mai Ana, o se talavou mai i Pasili e 15 ona tausaga: “Ona o le taatele o le feusuaʻi solo o laʻu tupulaga, e lē lava le faatasi ona fai atu, e leai. E manaʻomia pea ona e fai i ai, e leai.”

I le United Kingdom, na faia ai e ni tagata suʻesuʻe se saʻiliʻiliga i talavou e toʻaafe mai  siʻomaga eseese, e i le va o le 12 ma le 19 tausaga. Na iloa ai e i latou, e toetoe lava 50 pasene o talavou e faia e lē aunoa feusuaʻiga po o isi amioga lē mamā. E sili atu ma le 20 pasene o nei talavou e na o le taʻi 12 tausaga! Na taʻua e lē na taʻitaʻia nei saʻiliʻiliga, o Dr. Dylan Griffiths: “Ua lē toe amanaʻia faasāsāga a mātua, le Lotu ma isi faalapotopotoga, ma ua matuā afāina ai lava talavou.”

Pe moni ua matuā afāina lava talavou o loo faia feusuaʻiga? I se lipoti na lomia i le 2003, na taʻua ai e tagata suʻesuʻe o Rector, Noyes, ma Johnson le sootaga o le feusuaʻi o talavou, ma lagona mafatia, ma le faateleina o talavou e taumafai e pule i o latou ola. Na iloiloina e i latou ni faatalanoaga na faia ma teine talavou e 6,500 ma iloa ai, “e faatoluina taimi e ono afāina ai teine e faia feusuaʻiga, i le mafatia o le mafaufau, i lo o teine e lē faia faapea.” A o tama, “o ē e faia feusuaʻiga, e faaluaina taimi e ono afāina ai i le mafatia o le mafaufau, i lo o tama e lē faia faapea.”

Tulaga Faigatā 3

Aiga Malepelepe

Ua tele aafiaga ua oo i talavou i Amerika ona o suiga i aiga ma mea e latou te faatāua. Ua taʻua i le tusi e faatatau i talavou ma mea o latou mananaʻo ai, The Ambitious Generation—America’s Teenagers, Motivated but Directionless: “I le faitau sefulu o tausaga ua tuanaʻi, ua matuā suia olaga o tagata ma ua aafia ai foʻi ma talavou. Ua ausage aiga i Amerika, ma ua lē toʻatele ni tei o se talavou. A o faasolo ina faateleina ulugalii e teteʻa, ua faateleina foʻi tamaiti e na o le toʻatasi le matua e latou te nonofo. Ma o le tele o talavou e i lalo o le sefuluvalu tausaga, e faigaluega o latou tinā ma ua tau leai ni mātua e nofofale.”

Pe toʻatasi pe toʻalua ni mātua o nonofo ma se talavou, ae e lē o māfana le toʻatele o  talavou i o latou mātua. Peitaʻi o le taimi tonu lea ua sili ona latou manaʻomia ai le fesoasoani a mātua. Na iloa mai se suʻesuʻega na faia i talavou e toʻa 7,000 a o faagasolo tausaga, o le manatu o le toʻatele, e alolofa ma malamalama o latou mātua. Ae ui i lea, “e na o le tasi vaetolu na fai mai e manatu mamafa atu o latou mātua ma fesoasoani atu pe a iai se faafitauli.” E lē gata i lea, “o taimi e tutupu ai faafitauli i talavou, o taimi na e faalēano atu ai mātua ma fesoasoani atu.”

I Iapani, ua tauau ina mou atu le māfana o aiga ona o le naunau ia sologa lelei le olaga faaletino. Na faapea mai Yuko Kawanishi, o sē suʻesuʻe i tū ma aga a tagata: “I aso nei, o le toʻatele o mātua e iai fanau talavou, o i latou ia na soifua mai ina ua mavae le Taua Lona Lua a le Lalolagi, i le vaitaimi na faamuamua ai le saʻilia o meafaitino.” O ā mea na faatāua e na mātua? Ua fai mai Kawanishi: “O le toʻatele o mātua i aso nei, e faatāua le taulau o fanau i aʻoga. A toʻaʻaga lava fanau e suʻesuʻe, e lē afāina po ā a latou mea e fai i le fale.”

Ua faapefea ona afāina talavou ona o le faatāua o meafaitino ma aʻoaʻoga? I Iapani, e masani ona taʻua i faasalalauga le faafuaseʻi ona faalētonu o mafaufau o talavou ona o le tele o omiga mai aʻoga ma mātua. Ua fai mai Kawanishi: “Afai e foliga ua faalētonu mafaufau o fanau, atonu ona ua latou lagona, e lē o maua mai i o latou mātua aʻoaʻiga e latou te manaʻomia.”

O le Auala e Faaleleia Ai

E moni ua tatou ola i “aso e sili ona faigatā.” (2 Timoteo 3:1) Peitaʻi, e lē gata ina valoia e le Tusi Paia le faateleina o faigatā e feagai ma tagata i lenei vaitaimi, ae ua aʻoaʻoina ai foʻi ma isi mea.

Ua iai i le Tusi Paia fautuaga aogā i le auala e faalelei ai olaga o talavou. O le faanaunauga o Ieova le Atua Lē e ana le Tusi Paia, ia aʻoaʻoina talavou i le auala e feagai ai ma tulaga faigatā. (Faataoto 2:1-6) O lona finagalo ia lelei o latou olaga. E avatu e Lana Afioga “i ē ua leai se poto masani le utaga mamao, ia avatu ai foʻi i le tauleʻaleʻa le poto ma le mafaufau lelei.” (Faataoto 1:4) Seʻi iloilo le fesoasoani e maua mai taʻiala a le Tusi Paia.

[Faaopoopoga i lalo]

[Faamatalaga faaopoopo i le itulau 5]

E tusa ai ma se iloiloga, e faatoluina taimi e ono afāina ai teine e faia feusuaʻiga, i le mafatia o le mafaufau, i lo o teine e lē faia faapea

[Pusa/Ata i le itulau 6]

Faaleaga e i Latou Lava o Latou Tino

I se lipoti a le malo o Peretania i le 2006, na faaalia ai, e faaluaina le aofaʻi o talavou i le va o le 11 ma le 15 tausaga ua tagofia le fualaau faasāina o le cocaine. E tusa ma le 65,000 talavou na fai mai ua latou tagofia le cocaine. I Holani, e sili atu ma le 20 pasene o talavou i le va o le 16 ma le 24 tausaga e ola faalagolago i le ʻava malosi, pe ua mamaʻi ai.

Ae ua sili ona leaga le auala o loo faaalia ai e le toʻatele o talavou lo latou lē mautonu, ona e latou te selei, gali, ma susunu o latou tino. Ua taʻua e tagata suʻesuʻe o Len Austin ma Julie Kortum: “E tusa ma le tolu miliona tagata Amerika e nonofo ma faaleaga o latou tino, ma e toʻatasi le talavou mai talavou e 200 e masani ona faia faapea.”

[Ata i le itulau 3]

E tele talavou e leai ni uō māfana e talatalanoa i ai i mea o i o latou loto