Pe e Faatupuina e Lotu le Filemu?

UA VIIVIIA e nisi lotu le Falesā o le Holy Sepulchre i Ierusalema, o se falesā e sili ona paia, ae ua avea o se nofoaga o fetauaʻiga ma vesiga. E tusa ai ma uputuu masani, ua talitonu tagata o lenei falesā, atonu o le nofoaga lea na “tanumia ai Keriso ma toetū ai mai le oti.” Peitaʻi, ua avea foʻi lenei ogāeleele paia ma nofoaga o fetauaʻiga. Ua fetauaʻi monike ma faifeʻau o lotu Kerisiano e ono, po o ai tonu e pule i lenei nofoaga. I nai tausaga ua mavae atu, na faateteleina ai nei fetauaʻiga. Ua taumafai malosi leoleo ua faaauupegaina e taofia nei fetauaʻiga, ma latou pulea ai lea nofoaga mo se taimi lē tumau.

Se Talafaasolopito e Tumu i Faiga Sauā

O mea na tutupu i le falesā o le Holy Sepulchre, o se vaega o le talaaga umi o le faamasaatoto ona o le soona mapolotu. I le toe iloiloina o fetauaʻiga i vaega eseese o le lalolagi, ua faapea mai le tusi Violence in God’s Name: “E mai Initonesia e oo i Aialani i Mātū, mai Sasaʻe Tutotonu e oo i Kashmir, mai Initia e oo i Nigeria, le atu Balkans e oo i Sri Lanka, ua taʻutonuina le faaaogā o sauāga e Kerisiano, Puta, Siū, Hinitū, Musalimi ma Sikhs, i le manatu e faapea, o loo puipuia a latou tapuaʻiga ma mea mo lo latou lelei.”

Ae peitaʻi, o le faamoemoe autū o le tele o lotu, o le filemu ma le autasi. A o faagasolo taimi, o faanaunauga lelei e pei o le alofa i tuaoi ma le paia o le ola na matuā lagolagoina e lotu. Pe e lē tatau ai la i lotu ona faaaogā lo latou malosi e uunaʻia ai le filemu? E tatau i ē e tapuaʻi ma le faamaoni ona iloilo lenei fesili.