Auala 2​—Ia Tausi Lelei Manaʻoga o le Tino

“E leai se tasi e ita i lona lava tino: ae e na te fafaga ma tausi i ai.” (Efeso 5:29, The New English Bible) E faaleleia atili lou soifua mālōlōina, pe a faia auala faigofie e tausia ai oe lava.

Ia Lava le Mālōlō. “E sili le luuga e tasi o le mālōlō, nai lo o luuga e lua o galuega mamafa ma le ʻai a le matagi.” (Failauga 4:6) Ona o le pisi tele o le olaga i aso nei, ua itiiti ai taimi e tatau ona momoe ai tagata. Ae e tāua tele le moe mo le soifua mālōlōina lelei. Ua faaalia i suʻesuʻega, a o momoe, e toe faafouina e o tatou tino ma mafaufau i latou lava, ma e aogā i o tatou manatunatuga ma faalogona.

O le moe, e faamalosia ai le tino e tetee i faamaʻi ma faaitiitia ai le aafia o i tatou i siama, le maʻi suka, pē o se itutino, maʻi fatu, kanesa, lapoʻa tele, lotomafatia, ma atonu foʻi ma le maʻi o le galogalo o mea (Alzheimer). Nai lo o le fai o isi auala e faateʻa ai le fia moe, e pei o le inu o mea suamalie, mea o loo iai le caffeine, po o isi mea e faaala ai mata, a lagona loa le fia moe, ua tatau loa ona moe. O tagata matutua, e tatau ona fitu i le valu itula e momoe ai i pō uma, ina ia malolosi ma lelei ai o latou faalogona ma gaoioiga. Ae e sili atu itula e tatau ona momoe ai talavou. O talavou e lē lava le moe, e tele ina aafia i faafitauli o le mafaufau, ma e tautulemomoe a o ave le taavale.

E tāua tele le moe pe a tatou mamaʻi. A lava le moe ma tele le vai e inu, e mafai e o tatou tino ona tetee atu i faamaʻi e pei o le fulū.

Ia tausia lelei ou nifo. O le toʻaga e fufulu ou nifo pe a uma ona ʻai, aemaise a o leʻi moe, e fesoasoani e puipuia ai ou nifo mai le pala, mamaʻi o tainifo ma le toʻulu o nifo. E lē aogā atoa a tatou meaʻai e ʻai, pe a leai ni nifo. Ua taʻua e faapea, e lē mamate elefane ona ua matutua, ae ona o le fia aai, ona ua leai ni o latou nifo e lamu lelei ai meaʻai. O tamaiti e aʻoaʻo ia fufulu o latou nifo pe a uma ona aai, o le a fiafia i se soifua mālōlōina lelei a o talavou, ma le olaga atoa.

Vaai le fomaʻi. Afai ua e maʻi, ia vaai se fomaʻi. O le vave ona iloa o le maʻi, e vave ai foʻi ona maua se togafitiga, ma faaitiitia ai tupe alu. O lea, afai ua e lagona e te lē o malosi, saʻili se fesoasoani e iloa ai le pogai ma maua se togafitiga, nai lo o le tau ina saʻili o se auala e mapu ai mai i āuga o le maʻi.

Pe a siaki e lē aunoa e se fomaʻi tomai, e pei ona siaki e se fomaʻi agavaa se fafine i le taimi e tō ai, * o le a aveesea ai le tele o faafitauli matuiā. Ae ia manatua, e lē faia e fomaʻi ni vavega. O le a faamālōlōina atoatoa o tatou maʻi, pe a faia “ia fou mea uma lava” e le Atua.​—Faaaliga 21:4, 5.

[Faaopoopoga i lalo]