Le Manatu o le Tusi Paia

Aiseā e Itagia ai Soo Moni o Iesu?

“Ona tuuina atu lea o outou e tagata i puapuaga ma latou fasiotia outou, o le a inosia foʻi outou e nuu uma ona o loʻu igoa.”—MATAIO 24:9.

NA FETALAI Iesu i na upu a o toe o ni nai aso fasiotia faamoʻamoʻa o ia. I le pō a o lumanaʻi lona maliu, na fetalai atu o ia i ona soo faamaoni: “Afai na latou faasauā mai iā te aʻu, e latou te faasauā foʻi iā te outou.” (Ioane 15:20, 21) Ae aiseā e feita ai tagata i ē o loo usiusitaʻi iā Iesu ma taumafai ia pei o ia? O le mea moni lava ia, na faaaogā e Iesu le tele o lona malosi ma le taimi e fesoasoani atu ai i isi, faamāfanafana i ē matitiva, ma avatu le faamoemoe i ē ua mafatia.

Ua faailoa mai i le Tusi Paia māfuaaga patino o le feita o tagata. Pe a tatou iloiloina nei māfuaaga, o le a tatou malamalama ai i le pogai ua feagai ai ē e usiusitaʻi iā Keriso ma le tele foʻi o teteega na feagai ma ia.

E Ono Gaoioi Tagata Tetee Ona o le Lē Iloa

Na faapea atu Iesu i ona soo: “E oo mai le aso e manatu ai so o se tasi na fasiotia outou, ua ia faia se auaunaga paia i le Atua. A ua latou faia nei mea, auā latou te leʻi iloa le Tamā po o aʻu foʻi.” (Ioane 16:2, 3) E moni, ua taʻutino mai le toʻatele o ē e tetee o loo latou auauna i le Atua lava e tasi lea na tapuaʻi i ai Iesu, peitaʻi na taʻitaʻisesēina i latou e talitonuga sesē o lotu ma aganuu. Ioe, ua “latou maelega i le Atua; ae e lē tusa ai ma le poto saʻo.” (Roma 10:2) O se tasi o na tagata tetee, o Saulo o Taso, lea na mulimuli ane avea ma aposetolo Kerisiano o Paulo.

Sa iai Saulo i se vaega na taʻua o le ʻau Faresaio, o se vaega faapolotiki malosi ma o se lotu Iutaia na telē le taaʻiga i le tetee atu i le faa-Kerisiano. Na mulimuli ane faailoa mai e Saulo e faapea: “Sa ou upuleaga muamua ma faasauā, ma o se tagata fiasili.” Na ia taʻua atili e faapea: “Na ou faia faapea i loʻu lē iloa ma loʻu lē faatuatua.” (1 Timoteo 1:12, 13) Peitaʻi, ina ua ia aʻoaʻoina le upu moni e uiga i le Atua ma Lona Alo, na vave lava ona suia ona ala.

O le tulaga lava lenā i aso nei ua oo iai nisi sa tetee muamua. O le mea moni, i le pei o Paulo ua avea foʻi nisi o i latou na ma taulaʻiga o teteega. Peitaʻi e latou te leʻi taui atu le leaga i le leaga, ae e mulimuli i le apoapoaʻiga a Iesu: “Ia alolofa atu pea i o outou fili ma tatalo pea mo ē ua sauāina outou.” (Mataio 5:44) E taumafai malosi Molimau a Ieova ina ia utagia na upu, ma e faamoemoe o le a suia loto o nisi o ē e tetee e pei ona faia e Saulo.

E Matauʻa Nisi o Tagata Tetee

E toʻatele na tetee iā Iesu ona o le matauʻa. O le mea moni, e oo lava i le kovana o Roma o Ponotio Pilato, sa “ia iloa ona o lo latou [ʻaufaitaulaga sili] matauʻa ua tuuina atu ai o ia [Iesu]” ina ia fasiotia. (Mareko 15:9, 10) Aiseā na matauʻa ai taʻitaʻi lotu Iutaia iā Keriso? O se tasi o māfuaaga, ona sa fiafia iā te ia tagata lautele, o ē na vaai maulalo i ai taʻitaʻi lotu. Na muimui le ʻau Faresaio e faapea: “Ua mulimuli atu le lalolagi ia te ia.” (Ioane 12:19) Ina ua talileleia foʻi e tagata le talaʻiga a soo o Keriso, ona “tumu lea o i latou [taʻitaʻi lotu tetee] i le lotoleaga,” ma ua ō atu ma sasa i faievagelia Kerisiano.—Galuega 13:45, 50.

E lē fiafia nisi fili i amioga lelei a auauna a le Atua. Na tusi le aposetolo o Paulo i uso Kerisiano: “Auā ua outou lē toe taufetuli ma i latou [o ē e leaga] i lenei lava ala e tasi, i le faia o amioga e sili ona matagā ma inosia, ua faateʻia i latou  ma faia tala leaga e uiga iā te outou.” (1 Peteru 4:4) E mafai foʻi ona vaaia i aso nei lenei uiga lē lelei. O le mea moni, a o taumafai Kerisiano moni e ʻalofia amioga leaga, e latou te lē o faaalia se uiga faafiaamiotonu ma fiasili. E lē faa-Kerisiano lenā mea, auā e agasala uma lava tagata ma manaʻomia le alofa mutimutivale o le Atua.—Roma 3:23.

Itagia Ona “E Lē o ni Tagata o le Lalolagi”

Ua faapea mai le Tusi Paia: “Aua le manaʻo i le lalolagi po o mea o iai i le lalolagi.” (1 Ioane 2:15) O lē fea lalolagi sa faasino atu i ai le aposetolo o Ioane? O le lalolagi o tagata ua vavaeese mai i le Atua ma ua gauaʻi atu iā Satani, o ia lea o le “atua o le lalolagi nei.”—2 Korinito 4:4, O le Tusi Paia Samoa-Lomiga o le 1969; 1 Ioane 5:19.

O le mea e faanoanoa ai, ona o le toʻatele o ē e fiafia i le lalolagi ma ona ala leaga, e latou te tetee i ē o loo taumafai e ola e tusa ai ma aʻoaʻoga o le Tusi Paia. Na faapea atu Iesu i ona aposetolo: “Afai o ni tagata o le lalolagi outou, e alofa mai le lalolagi iā te outou auā o ona tagata. A o lenei, e lē o ni tagata o le lalolagi outou, a ua ou filifilia outou mai i le lalolagi, o le mea lea e ʻinoʻino ai le lalolagi iā te outou.”—Ioane 15:19.

E matuā faanoanoa lava ona o le itagia e tagata o auauna a Ieova, mo lo latou lē taliaina o se lalolagi ua tumu i amioga leaga, le lē faamasinotonu, o faiga sauā ma o loo pulea e Satani. E toʻatele tagata faamaoni o ē e taumafai e faia le lalolagi ma nofoaga lelei, ae e lē mafai ona latou faaleleia aafiaga leaga mai i le pule lē vaaia o le lalolagi. Ua na o Ieova le Atua e mafai ona liaʻieseina Satani—ma o le a ia faia faapea e ala i le faaumatiaina o Satani i le afi!—Faaaliga 20:10, 14.

O lenā faamoemoe matagofie, o se tasi o autū tāua i le “tala lelei o le malo” lea e faalauiloa atu e Molimau a Ieova i le lalolagi aoao. (Mataio 24:14) Ioe, ua talitonu Molimau, ua na o le Malo o le Atua ma lana pulega e ala mai iā Keriso, e mafai ona aumaia le filemu tumau ma le fiafia moni i le lalolagi. (Mataio 6:9, 10) O lea, o le a faaauau pea ona latou faalauiloa atu lenā Malo, ona e latou te iloa e sili atu le tāua o le mauaina o le finagalo malie o le Atua nai lo o tagata.

PO O E TAUMĀNATU EA I NISI TAIMI?

● Aiseā na tetee ai Saulo o Taso i soo o Keriso?—1 Timoteo 1:12, 13.

● O le ā le uiga leaga na uunaʻia ai nisi o fili o Iesu?—Mareko 15:9, 10.

● O le ā le vaaiga a Kerisiano moni i le lalolagi?—1 Ioane 2:15.

[Ata i le itulau 23]

I le 1945, na sauāina ai e se vaega o tagata feita ia Molimau a Ieova i Quebec, i Kanata ona o lo latou talaʻia o le tala lelei o le Malo o le Atua

[Ē Ana le Ata i le itulau 23]

Courtesy Canada Wide