Auala e ʻAlofia ai Faalavelave Tau Taavale

O LE iʻī o paʻu, faalogoina se taavale ua lavea, le taʻei o tioata, le feʻei o tagata . . . Atonu ua masani se tagata na aafia i se faalavelave tau taavale i nei leo. Ua lipotia mai e le Faalapotopotoga o le Soifua Mālōlōina i le Lalolagi e faapea, “i se fuafaatatau, e 1.2 miliona tagata e feoti ona o faalavelave tau taavale i tausaga taʻitasi, ma e tusa ma le 50 miliona e lavevea.”

Peitaʻi, o le uaʻi atu i le saogalemu ma le mafaufau lelei, e mafai ona ʻalofia ai le tele o faalavelave tau taavale. Seʻi o tatou vāai pe faapefea.

Le Saoasaoa o Taavale, Fusipaʻu o Taavale, ma le Faia o Text (Feʻau Tusitusia i le Telefoni)

I isi auala atonu e foliga mai e lē talafeagai le saosaoa ua faatapulaaina mo taavale. Peitaʻi, e tusa lava pe e te alu i le saosaoa faatapulaaina pe e leai foʻi, e masani lava ona leai se eseesega tele i le taimi lea e te taunuu ai i le mea o loo e agaʻi i ai. O se faataʻitaʻiga, pe afai e faateleina le saoasaoa o le taavale mai i le 65 maila (104 km) i le itula i le 80 maila (129 km) i le itula mo le mamao e 50 maila (80 km), pe tusa ma le iva minute e te vave taunuu ai. Pe e iai se aogā o lenā taimi itiiti ae e lamatia ai le ola i se faalavelave?

Ua fuafuaina fusipaʻu o taavale mo lou saogalemu. Na taʻua i le faaiʻuga o se suʻesuʻega na faia e se ofisa o le malo o le Iunaite Setete, e silia atu i le 72,000 tagata o lenā lava atunuu na faasaoina o latou ola ona o le faaaogāina o fusipaʻu o taavale, mai i le tausaga 2005 e oo i le 2009. Pe e sili atu le aogā o le taga ʻea (airbag) e puipuia mai ai i faalavelave tau taavale, i lo o le faaaogāina o le fusipaʻu o taavale? E leai. E tele atu le puipuiga e maua mai i le taga ʻea pe afai o loo e faaaogā le fusipaʻu o le taavale. Ae pe afai e lē faaaogāina le fusipaʻu, e itiiti foʻi la le aogā o lenei taga ʻea, ma e mafai ona lamatia ai le ola. O lea la, ia fai ma masani le faia o lou fusipaʻu pe a ave le taavale, ma ia faapena foʻi ona faia e i latou o loo outou faimalaga faatasi. O se isi lapataʻiga: Aua le taumafai e faitau pe faia ni text a o ave le taavale.

Tulaga o Auala ma le Tausia o le Taavale

E sesee paʻu o le taavale pe a susū, pefua, oneonea, pe e maamaʻā foʻi le auala. Afai e alu lemū le taavale, o le a lē faigofie la ona sesee le taavale pe a e faaaogā taofi. I nisi atunuu, afai e masani ona ō taavale i auala e ufitia i le kiona po o auala aisā, o se mea lelei ona faaaogā paʻu taavale ua faia faapitoa mo ia auala, lea e lē faigofie ona sesee ai le taavale.

O se lamatiaga mo ave taavale uma ia magāala. Ua fautua mai se tagata e tomai i le aʻoina o le ave taavale: Pe a mumū molī lanu meamata o le auala, e ao ona e faatali a o leʻi sopoʻia le magāala. O lou faatali mo sina taimi, atonu o le a ʻalofia ai le lavea o lau taavale i se isi taavale o loo sau mai i se isi magāala, ae e leʻi tū ina ua mumū molī lanu mūmū.

E tāua le siaki o le tulaga o lau taavale, ina ia ʻalofia ai faalavelave. Seʻi mafaufau i le mea e tupu pe afai e aveina lau taavale ae o loo leaga taofi. E masani ona ave e nisi a latou taavale e siakiina e se inisinia tomai, ina ia ʻalofia ai ni mea leaga o le taavale. I le isi itu, e iai ave taavale e mafai e i latou lava ona faaleleia isi vaega o le taavale e faigofie  ona fai. Po o le ā lava lau auala e faaaogā e tausia ai lau taavale, ae ia faamautinoa e siaki ma toe faaleleia le taavale pe a manaʻomia.

Inuina o le ʻAva Malosi ma Ave le Taavale

E ono aafia i se faalavelave tau taavale se ave taavale faatuatuaina, pe a inu i le ʻava malosi a o leʻi aveina le taavale. I le tausaga 2008, e silia ma le 37,000 tagata i le Iunaite Setete na maliliu ona o faalavelave tau taavale. E tusa ma le tasi vaetolu o nei faalavelave na māfua ona o le inu ʻava malosi a o leʻi aveina le taavale. E iai aafiaga i lou aveina o le taavale, e tusa lava pe itiiti se ʻava malosi e te inuina. Ua filifili nisi e lē tagofia le ʻava malosi pe afai o le a aveina le taavale.

E mafai ona puipuia lou ola ma ola o isi tagata pe afai e usitaʻia tulafono o le auala, faaaogā le fusipaʻu, tausia lelei totoga o le taavale, ma le ʻalofia o le aveina o le taavale pe a inu le ʻava malosi. O le faatatauina o nei fautuaga, o le a fesoasoani ai iā te oe e ʻalofia se faalavelave tau taavale.

[Pusa i le itulau 19]

AUA LE AVEINA LE TAAVALE PE A LAGONA LE FIA MOE

“E tatau ona manatua e tagata e tutusa le aveina o le taavale a o fia moe, ma le onā a o aveina se taavale.” O le faamatalaga lenā a se tasi mai i le U.S National Sleep Foundation, e faaalia ai lamatiaga e oo iai pe a aveina se taavale a o lagona le fia moe. O nisi nei o faailoga e iloa ai e lē o saogalemu ona e aveina se taavale: *

● E lē o alu le mafaufau i le aveina o le taavale, emoemo mata po ua faigatā foʻi ona pupula

● Ua faigatā ona ea i luga lou ulu

● Le māvava soo

● Lē manatua le auala sa uia e lau taavale

● Ua misia auala sa tatau ona afe i ai, po o faailoilo o le auala

● Ua tele lau taavale i le isi laina, pipii tele le taavale i le isi taavale o loo i luma, po o le alu i luga o laina tau patupatu i autafa o auala tetele (shoulder rumble strips), lea e faailoa mai ai i le ave taavale ua alu i tua ma le auala

Afai e aafia oe i nei faailoga, tuu atu le taavale e ave e se isi tagata, po o le paka o le taavale i se nofoaga saogalemu ina ia fai sina mālōlōga. E tāua lou saogalemu, ma le saogalemu o isi, nai lo o le vave taunuu i se nofoaga!

[Faaopoopoga i lalo]