Pe e Alofa Mai le Atua?

I LE taeao o Novema 1, 1755, na matuā lūlūina ai le aai o Lisbon i Potukali i se mafuiʻe. Na sosoo ai ma se sunami ma se afi lea na faaleagaina ai le tele o vaega o le aai, ma fasiotia ai le faitau afe o tagata.

Ina ua uma le mafuiʻe i Haiti i le 2010, na taʻua ai e le nusipepa a Kanata o le National Post e faapea: “O mala mataʻutia uma nei ua tofotofoina ai le faatuatua o tagata i se tasi e sili atu lona malosi. Ae e pei o le mala na tupu i Lisbon, o mafuiʻe i aso nei e pei o lea na lūlū i Haiti, ua matuā tofotofoina ai faatuatua o isi nai lo o isi tofotofoga.” Na faaiʻu mai le lipoti e faapea: “Atonu ua tuulafoaʻi Haiti e le Atua.”

Ona o Ieova le Atua “o Lē e ona le malosi uma lava,” e lē gata mai la lona mana e aofia ma le agavaa e faamuta ai puapuaga. (Salamo 91:1) E sili atu i lenā, e tatou te mautinoa e alofa mai o ia. Aiseā?

O Le Ā e Tatou te Iloa e Uiga i le Atua?

E alofa mai le Atua i tagata o loo puapuagatia. Ina ua faapologaina tagata Isaraelu i Aikupito ma faileagaina e ē na puʻea i latou, ona fetalai mai lea o le Atua iā Mose: “Ua ou iloa lava le sauāina o loʻu nuu o loo i Aikupito, ma ua ou faalogo i lo latou ōi ona o ē e tutuli faamalosi i latou e faia galuega; ua ou iloa puapuaga o loo mafatia ai i latou.” (Esoto 3:7) O le ā ua faaalia i lenei mea? Ua faaalia ai le alofa mai o le Atua i tagata o loo puapuagatia. I senituri mulimuli ane, na tusi ai le perofeta o Isaia e uiga i tagata Isaraelu e faapea: “Na mafatia o ia i taimi o o latou mafatiaga.”—Isaia 63:9.

“E tonu ona ala uma.” (Teuteronome 32:4) E lē faailogatagata le Atua i mea uma e na te faia. “E na te leoleoina . . . le ala o ona tagata faamaoni,” ae o le a “ia taui atu ai puapuaga i ē . . . faapuapuagatiaina” tagata amiotonu. (Faataoto 2:8; 2 Tesalonia 1:6, 7) E lē faailogatagata auā “e lē sili atu lona manatu mamafa i le tamālii nai lo o le tagata faatauvaa, auā o i latou uma lava o galuega a ona aao.” (Iopu 34:19) Ua silafia foʻi e le Atua le auala sili e foʻia ai puapuaga o tagata. Peitaʻi o vaifofō ua aumaia e tagata, e faatusa atu i le togafitia o se manuʻa tugā e ala i le tuu i ai o sina mea e faapipii ai manuʻa. Atonu e mafai ona pupuni ai le manuʻa, ae e itiiti lava se aogā o lenā mea ma e lē faaitiitia ai le mafatia o le tagata manuʻa.

O le Atua e “alofa mutimutivale ma alofa fua . . . [ma] e tele lona alofa faamaoni.” (Esoto 34:6) O le upu “alofa mutimutivale” e pei ona faaaogāina i le Tusi Paia, o loo faaalia ai le tigā alofa lea e uunaʻia ai se tagata ina ia fesoasoani i se tasi. O le upu Eperu ua faaliliuina i le “alofa fua,” ua faamatala ai “se tagata ua uunaʻia e lona loto, ina ia fesoasoani atu i se tasi o loo manaʻomia se mea.” E tusa ai ma le tusi Theological Dictionary of the Old Testament, o le upu ua faaliliuina i le “alofa faamaoni,” e aofia ai le “faalaa ane mo se lelei o se tasi o loo mafatia i se tulaga lē lelei po o ni  mafatiaga.” E lē gata e tigā le finagalo o Ieova pe a puapuagatia tagata, ae e uunaʻia foʻi o ia e lona alofa mutimutivale, alofa fua, ma lona alofa faamaoni ina ia fesoasoani atu. E tatou te mautinoa la, o le a faaiʻua puapuaga o tagata.

Na iloiloina i le mataupu ua teʻa ia māfuaaga autū e tolu, ua faateteleina ai puapuaga o tagata i aso nei ma o na māfuaaga uma e lē māfua mai i le Atua. Seʻi o tatou tilofaʻia la mea o loo i tua o na māfuaaga autū.

Filifiliga a le Tagata Lava Ia

Na pulea muamua Atamu e le Atua. Peitaʻi ina ua maua le avanoa e fai ai lana filifiliga, na filifili o ia e teena le pulega a le Atua ma tofotofo i iʻuga o le fiatutoʻatasi mai le Atua. Na ia lē amanaʻia le lapataʻiga a Ieova o loo i le Kenese 2:17: “E te oti ai lava.” O le lē taulau i le gauaʻi atu i tulafono lelei atoatoa a le Atua, na iʻu ai i le agasala ma le lē lelei atoatoa. Ua faamatala mai i le Tusi Paia: “Ona oo mai [lea] o le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma auā ua agasala uma lava.” (Roma 5:12) Ae o le a aveesea e le Atua aafiaga o le agasala.

O Mea e Tutupu Faafuaseʻi

E pei ona taʻua i luga, na teena e le uluaʻi tamāloa o Atamu le taʻitaʻiga a le Atua—o le taʻitaʻiga lea e manaʻomia e saogalemu ai tagata—lea e oo lava i le puipuia mai i mala faalenatura. O lana filifiliga ua faatusaina i se tagata maʻi o lē ua teena le tausiga a se fomaʻi, e agavaa ma ua lava le poto masani. Pe afai e lē iloa e le tagata maʻi le ogaoga ma le matuiā o lona maʻi lea e iloa e le fomaʻi, e ono iʻu atu la o ia i le puapuagatia ona o le lē amanaʻia ma le loto iai o le fomaʻi. I se tulaga tutusa, o le faaaogā sesē e tagata o le laueleele—e aofia ai fale e leaga fausaga, ma le lē amanaʻia o taʻiala e tusa ai ma malosiaga faalenatura—o māfuaaga autū ia o mala faalenatura. Peitaʻi, o le a lē faatagaina e le Atua nei tulaga ina ia faaauau pea.

“[O] le Pule o Lenei Lalolagi”

Aiseā ua faataga ai e le Atua ia Satani ina ia pulea le lalolagi ina ua uma ona fouvale o ia? Na taʻua i se puna o faamatalaga, “o so o se faigāmalo lava e fou mai, e masani ona latou tuuaʻia le faigāmalo ua mavae atu mo ni faafitauli ua tulaʻi mai.” Pe afai e aveesea faamalosi e Ieova ia le “pule o lenei lalolagi,” ona tuuaʻia loa lea e Satani ona vaivaiga i luga o le Pule ua mavae atu, o le Atua. (Ioane 12:31) Peitaʻi, o le faatagaina o Satani ina ia faaalia atoatoa lana pule mo se vaitaimi, ua faaalia ai lona lē taulau i le avea ma pule. Ae o loo tumau pea le fesili: E faapefea ona tatou mautinoa o le a faaiʻuina ia puapuaga?

[Ata i le itulau 14]

Pe e faaaogā e se fomaʻi sina mea faapipii manuʻa e togafitia ai se manuʻa tugā?