Le Tusi Paia​—O se Tusi o Valoaga e Saʻo Aʻiaʻi

Vaega 5

Le Tala Lelei mo Tagata Uma

I lenei mataupu faasolo e valu vaega, o le a talanoaina ai i le “Ala Mai!” se vala mataʻina o le Tusi Paia—o valoaga. O le a fesoasoani mataupu iā te oe ina ia taliina ai fesili nei: Po o valoaga o le Tusi Paia ua na o ni tusitusiga a ni tagata atamamai? Pe e faamaonia na faagaeeina e le Atua nei valoaga? E matou te valaaulia oe ia iloilo faamaoniga.

O LOO i le Tusi Paia le feʻau o le tala lelei a le Atua mo le fanau a tagata. Sa faaaogā e Iesu lona soifuaga e folafola atu ai “le tala lelei o le malo.” (Luka 4:43) Ua taʻua i le Tusi Paia o lenei Malo, o le pulega a le Atua, ma o le a tafiesea pulega piʻopiʻo faaletagata, aumaia le filemu, ma aveesea mea uma e māfua ai mafatiaga o tagata. (Tanielu 2:44; Mataio 6:9, 10) Maʻeu se tala fiafia!

O lenā tala lelei e tatau ona faalauiloa atu i le lalolagi aoao. Peitaʻi ina ua maliu Iesu, e toʻaitiiti ona soo na totoe. Pe na muta ai le faasalalauina atu o le tala lelei? E leai. Sa valoia i le Tusi Paia: (1)  O le a folafola atu le tala lelei i le lalolagi aoao. (2) O le a folafola atu pea e ui i teteega ogaoga. (3) O le a aliaʻe mai Kerisiano faatagāfai ma faasesē i tagata e toʻatele. Seʻi o tatou iloiloina nei valoaga.

E Talaʻia Atu le Tala Lelei i Atunuu Uma

Valoaga: “E ao foʻi ona muaʻi talaʻiina atu le tala lelei i atunuu uma lava.” (Mareko 13:10) ʻE fai outou ma molimau iā te aʻu i Ierusalema, i Iutaia uma ma Samaria, ma tuluʻiga uma o le lalolagi.’—Galuega 1:8.

Faataunuuga: Ina ua faatoʻā mavae le maliu o Iesu i le 33 T.A., ae ua faatumulia e ona soo Ierusalema i le feʻau o le Malo. Sa latou faalauiloa atu le tala lelei i Iutaia ma Samaria. E leʻi atoa le 15 tausaga, ae ua auina atu misionare Kerisiano i isi vaega o le Emepaea o Roma. E oo ane i le 61 T.A., e mafai ona faapea atu ua talaʻia le tala lelei i “tuluʻiga” uma o le lalolagi.

 Faamaoniga mai talafaasolopito:

● Ua faamaonia mai i isi tusitusiga mai i le senituri lona lua, le vave ona salalau atu o le faa-Kerisiano. Ua taʻua e le tusitala o talafaasolopito mai i Roma, o Suetonius, na faavaeina le faa-Kerisiano i Roma i le amatamataga o le 49 T.A. I se tusi a le kovana o Pitunia (lea ua igoa nei o Turkey), o Pliny laʻitiiti, na avatu i le Emeperoa o Trajan i le pe tusa o le 112 T.A., o loo faasino atu ai i le faa-Kerisiano ua pei o se “faamaʻi pipisi” ua “salalau atu e lē gata i aai, ae faapea foʻi i nuu ma faatoʻaga.” I le iloiloina o faamaoniga, na taʻua ai e se tusitala o le talafaasolopito: “E leʻi atoa le selau tausaga talu ona mavae atu taimi o le ʻauaposetolo, ae ua vaaia tapuaʻiga faa-Kerisiano i aai tetele o le Emepaea.”

● Ua taʻua e le Polofesa o Henry Chadwick i le tusi The Early Church: “O le faatupulaʻia o le faa-Kerisiano na foliga mai o ni mea e leʻi faatalitalia o le a mafai ona tutupu. Na foliga mai o le a lē taulau ma e leʻi faatalitalia e se tasi o le tele lea o le a salalau atu ai le faa-Kerisiano.”

Teteega i le Tala Lelei

Valoaga: “O le a tuuina atu outou e tagata i faamasinoga, o le a sasaina outou i sunako, ma o le a tuuina atu outou i luma o kovana ma tupu ona o aʻu, e fai ma molimau iā i latou.”—Mareko 13:9.

Faataunuuga: Sa sauāina Kerisiano e tagata Iutaia ma Roma. Sa puʻeina, faafalepuipui, sasa ma fasiotia i latou.

Faamaoniga mai talafaasolopito:

● Sa faamauina e Flavius Josephus, o se tusitala Iutaia o le talafaasolopito i le uluaʻi senituri, le fasiotia e taʻitaʻi lotu Iutaia o le uso o Iesu, o Iakopo. O loo taʻua i le Tusi Paia Kamalielu, o sē e aloaʻia i le faamasinoga maualuga i Iutaia, na ia fautuaina faamasino ia faaeteete i a latou faaiʻuga faasaga i soo o Iesu, ina ua molia i latou i le faamasinoga. (Galuega 5:34-39) Ua faamaonia mai i suʻesuʻega a tagata atamamai, sa soifua moni lava Kamalielu ma o sē na fetuutuunaʻi i ona manatu.

● Ua taʻua e tusitala o le talafaasolopito, sa tele ina sauāina Kerisiano e emeperoa o Roma, e amata mai iā Emeperoa Nero i le 64 T.A. Sa talanoaina e le Emeperoa o Trajan ma Pliny laʻitiiti, faasalaga e faia i Kerisiano e maumauaʻi i o latou talitonuga.

● Ua taʻua e le Polofesa o Chadwick lea na taʻua muamua: “Na avea sauāga ma itu na faia faalilolilo ai le tapuaʻiga a Kerisiano, peitaʻi sa iai se aafiaga lelei.” Sa sosola Kerisiano mai i nofoaga na lamatia ai o latou ola, ma faailoa atu la latou feʻau i vaipanoa fou na ō atu i ai. (Galuega 8:1) E ui lava sa teena e o latou aiga ma uō, ae na latou finafinau pea. E mataʻina lenei mea ona o soo o Iesu “e leʻi lava ni aʻoaʻoga ma e faatauvaa,” ma e leʻi aafia i faiga faapolotiki. (Galuega 4:13) E ioe tusitala o le talafaasolopito, “sa sili ona faigofie ona faailoa atu le tala lelei i tagata faipisinisi lāiti.”

Ina ua iloiloina le uluaʻi talafaasolopito o Kerisiano, sa maofa tagata atamamai pe na faapefea ona vave ona faasalalau atu le faa-Kerisiano e se vaega toʻaitiiti, e ui i le tele o teteega. Peitaʻi, na muaʻi valoia e Iesu na mea faigatā a o leʻi tutupu. Na taʻua foʻi i le Tusi Paia o le a faalavelavea lenei galuega talaʻi.

 Aliaʻe Mai Kerisiano Faatagāfai

Valoaga: “Ona ō mai lea o luko feʻai iā te outou, ma latou te lē faapelepeleina le lafu, ma e maua foʻi iā te outou ni tane latou te faauiga sesē mea, ina ia fetoso ese ai soo e mulimuli atu iā i latou.” (Galuega 20:29, 30) “O le a faapena foʻi ona iai aʻoaʻo pepelo iā te outou. O i latou lava ia e aumaia faalilolilo i totonu vaevaega e fano ai, . . . e upuleagaina ai le ala o le upu moni ona o i latou.”—2 Peteru 2:1, 2.

Faataunuuga: Sa faaleagaina le faapotopotoga Kerisiano e tagata sauā, faagutugutulua ma lē faamaoni.

Faamaoniga mai talafaasolopito:

● Sa faasolosolo mālie ona taaʻina le faa-Kerisiano moni e tagata atamamai na aliaʻe mai, ma faaleagaina aʻoaʻoga faa-Kerisiano i filosofia faa-Eleni, aemaise lava ina ua maliliu uluaʻi soo o Iesu. E leʻi umi ae faavae se vasega faafaifeʻau ma amata ona faataʻitaʻi i taʻitaʻi faapolotiki i le tulaga pule ma le tamaoaiga. Ua taʻua e tusitala o le talafaasolopito, e oo ane i le taimi ua avea ai le “faa-Kerisiano” ma lotu autū i le Setete o Roma, ae ua matuā ese mai lava i le faapotopotoga Kerisiano i le uluaʻi senituri.

● A o faagasolo senituri, sa faia e nei Kerisiano faatagāfai le tele o amioga sauā ma matapeʻapeʻa. Nai lo o le faamaonia mai o i latou o ni soo o Iesu, sa sauāina e faifeʻau ē na faaaʻoaʻo i le auala na talaʻi ai Iesu, ma ē na taumafai e lomia le Tusi Paia i gagana e tautatala ai tagata.

A o faagasolo senituri, na matuā malosi ai le faa-Kerisiano pepelo, ma na foliga mai e leʻi iai se tasi na toe talaʻia atu le tala lelei. Peitaʻi, na fetalai Iesu o le a toe olaola le tala lelei i aso e gata ai. Sa ia faatusaina lenei vaitaimi i se seleselega, lea o le a tuu eseese ai le vao leaga, o Kerisiano pepelo, mai i le saito, o Kerisiano moni. (Mataio 13:24-30, 36-43) I lenā taimi, o le a matuā faataunuuina ai le valoaga e faatatau i le talaʻiina atu o le tala lelei. (Mataio 24:14) O le a talanoaina i le Vaega 6 lenā valoaga mataʻina.

[Ata i le itulau 26]

Sa faia e Emeperoa Roma o Nero (itu taumatau), Domitian, Marcus Aurelius ma Diocletian, ia sauāga ogaoga i uluaʻi Kerisiano

[Ē Ana le Ata]

Ata na puʻeina i le faatagaga a le British Museum

[Faafanua i le itulau 27]

(Tagaʻi i le lomiga mo le ata atoa)

E oo ane i le pe tusa o le 61 T.A., ua oo atu le feʻau o le Malo i le tele o atunuu

Le Emepaea o Roma

[Ata i le itulau 27]

SEPANIA

ITALIA

Roma

Melita

MAKETONIA

ELENI

Kereta

ASIA ITIITI

Kuperu

MESOPOTAMIA

SAMARIA

IUTAIA

Ierusalema

AIKUPITO

LIPUA

SAMI METITIRANI

Nofoaga na oo atu i ai le tala lelei i le uluaʻi senituri

IUTAIA

Ierusalema

ASIA ITIITI

Kuperu

MAKETONIA

ELENI

Kereta

ITALIA

Roma

Melita

SAMARIA

MESOPOTAMIA

ELAMA

METAI

PATIA

ARAPI

LIPUA

AIKUPITO

AITIOPE