Pogai o Faiga Sauā

E TELE māfuaaga o faiga sauā. E lē na o aumea, faafiafiaga po o le siʻomaga o loo ola ai e māfua ai. E tele nisi mea e aofia ai, e pei o loo mulimuli mai.

Lē mautonu ma le atuatuvale. E māfua ona sauā nisi tagata ona o le faileagaina, faaesea mai i isi, mativa, pe ua lē mafai foʻi ona pulea o latou olaga.

Mimita pe a tumu tagata. E pei ona tatou vaaia i taimi o taaloga, pe a faapotopoto faatasi tagata o se vaega, ona lē amanaʻia lea o aafiaga o a latou amioga lē pulea. Aiseā? Ua taʻua i le tusi Social Psychology, “ua lē amanaʻia a latou tapulaa tau amio, ae ua tali atu i gaoioiga sauā ma faamaualuluga a isi.” O nei ituaiga o tagata ua pei o ni faatagata e leai ni mafaufau, ma ua “lē amanaʻia la latou vaegafai i le sosaiete o tagata.”

ʻInoʻino ma le fuā. O le fasioti tagata muamua lava o loo faamauina i le talafaasolopito, o Kaino. (Kenese 4:1-8) O le ʻinoʻino ma le fuā, na uunaʻia ai Kaino e fasiotia lona uso—e ui na lapataʻia e le Atua ia pulea ona faalogona, ma folafola mai faamanuiaga e na te maua pe a usitaʻi. Ua moni ai upu o le Tusi Paia: “O le mea o iai le lotoleaga ma le faamisa, e iai foʻi le vevesi ma mea leaga uma”!—Iakopo 3:16.

 Faaaogāsesēina o le ʻava malosi ma fualaau faasāina. O le faaaogāsesēina o le ʻava malosi ma fualaau faasāina, e faaleagaina ai le tino, le mafaufau, faapea le tomai e faavasega ai mea. O le iʻuga, ua faigofie ona lolo atu i faiga sauā ma tali atu ma le ita.

Tuai ona fai le faamasinogatonu. Ua taʻua i le Failauga 8:11: “Talu ai e lē vave ona faaoo le faasalaga i le galuega leaga, o le mea lea ua matuā maumauaʻi ai loto o le fanau a tagata e faia mea leaga.” O faamasinoga lē tonu, lē taulau ma piʻopiʻo, e mafai ona faapogaia ai faiga sauā.

Lotu sesē. E masani ona faapogaia e lotu faiga sauā e ala i feeseeseaʻiga i le va o ituaiga lotu eseese ma faiga faatupu faalavelave. Ae e lē na o tagata lotoa, mapolotu ma maelega vālea e tuuaʻia. I taimi o taua e lua a le lalolagi, na toe fefasiotiaʻi ai e sui o lotu autū—o “Kerisiano” ma ē e lē o ni Kerisiano i latou lava, ae sa faamanuia e o latou taʻitaʻi lotu na faiga. O na amioga na faatigā ai i le Atua.—Tito 1:16; Faaaliga 17:5, 6; 18:24.

I le iloaina o le tele o māfuaaga e tutupu ai faiga sauā, pe e mafai la ona avea moni se tasi ma sē e faatupuina le filemu i lenei lalolagi? Ioe, e pei ona o le a tatou iloiloina.

[Ata i le itulau 6]

E POGAI FAIGA SAUĀ I LE TAGATA LAVA IA

E ui e tele mea e māfua ai faiga sauā, ae o le pogai autū o le tagata lava ia. E faapefea? E malamalama lelei Iesu i le loto o le tagata, na fetalai o ia: “E sau mai i le loto o le tagata mafaufauga leaga; o le faitaaga, o le gaoi, o le fasioti tagata, o le mulilua, o le manaʻo tele, o le amioleaga, o le faaʻoleʻole, o le amio matagā, o le matauʻa, o le upuleaga, o le faamaualuga ma le lē mafaufau.” (Mareko 7:21, 22) Pe a faaauau pea ona matamata, faalogologo ma mafaufau i mea leaga, o le a mapuna aʻe ni faanaunauga i mea sesē.—Iakopo 1:14, 15.

I le isi itu, pe a fafaga o tatou mafaufau i mea e atiaʻe ai, e pei ona taʻua i le mataupu i le itulau e 8, o le a aveesea ma “fasiotia” ai faanaunauga leaga, ae atiaʻe faanaunauga lelei. (Kolose 3:5; Filipi 4:8) O le a fesoasoani mai le Atua iā i tatou “ina ia malosi ai le tagata i totonu.”—Efeso 3:16.

[Pusa i le itulau 7]

UA MATUĀ ISO TAGATA ATAMAMAI I LE POGAI O FAIGA SAUĀ

Aiseā ua silia ai i le 60 pasene fasiotiga tagata i isi atunuu nai lo o isi atunuu? Aiseā ua avea ai taua ma isi ituaiga o faiga sauā o se mea masani i le talafaasolopito o tagata? E tele fesili e faigatā ona malamalama i ai, ae e lē lava tali e faamalieina ai.

E manatu nisi tagata suʻesuʻe e māfua faiga sauā ona o le mativa ma le eseese o tulaga o tagata. Ua taʻua i nisi o faamaumauga, e tusa o le 90 pasene o faiga sauā e māfua ai le oti ma le pule i le ola, e tutupu i atunuu e itiiti le tamaoaiga, ma o le tele o faiga solitulafono e tulaʻi mai i aai e matitiva. Ae pe e moni ea e sili atu ona sauā tagata matitiva? Pe e sili atu ona mafatia i latou ona e lē gafatia ni puipuiga faaletulafono i o latou vaipanoa? Seʻi manatu i atunuu e pei o Calcutta i Initia, e faitau miliona tagata e sili ona matitiva o loo nonofo ai. Peitaʻi, o Calcutta o se tasi o atunuu i le lalolagi e pito i sili ona maulalo le aofaʻi o fasiotiga tagata.

E manatu nisi pe a faigofie ona maua e tagata fana, o le a faateteleina faiga sauā i se atunuu. E sili atu ona leaga tagata ma aafia i faiga sauā ona o fana. Ae aiseā e sili atu ai le aofaʻi o tagata sauā i nisi nofoaga? E lē o malamalama lava i ai tagata atamamai.