Togafitiga e Sui ai Tuigātoto

IĀ ME 20-22, 2011, na auai tagata atamamai faapitoa mai i atunuu e silia i le 40 i Moscow, mo le Iupelī lona 60 o le Fonotaga Faavaomalo a Europa mo Taotoga o le Fatu ma Alātoto. Na taʻua e se tusitala o se TV a Rusia: “Ua faatusaina e fomaʻi lenei faatasiga i se Olimepeka mo tagata taaalo.”

Sa auai ai le Auaunaga o Faamatalaga Faafomaʻi a Molimau a Ieova. Na matuā tosina atu ē na auai i le itu sa iai Molimau a Ieova, ona o le tele o faamatalaga aogā e faatatau i togafitiga faafomaʻi e sui ai tuigātoto. Na ave e fomaʻi le faitau selau o faila o faamatalaga, tusi ma DVD e faatatau i lenei mataupu tāua, aemaise lava le DVD e taʻua Transfusion-Alternative Strategies—Simple, Safe, Effective. *

 O le toʻatele o nei fomaʻi na ioe e manaʻomia ona faasaoina le toto i taimi o taotoga. Na taʻua e se fomaʻi mai i Italia e faia taotoga o le fatu i lana lauga i lea fonotaga, e masani lelei o ia i Molimau a Ieova, ma e tusa ma le 70 Molimau na ia faia taotoga o fatu e aunoa ma le tuiina o le toto. Na ia taʻua foʻi e masani ona faia taotoga i lana falemaʻi e aunoa ma le tuiina o le toto. Sa ave e se polofesa o le German Heart Institute Berlin se kopi o le DVD mo ia, ma se isi kopi mo sana uō. Sa ia taʻu atu i le aofia, sa ia faia taotoga o pepe mai i le 5.5 pauna [2.5 kg] ma lalo ifo, e aunoa ma le tuiina o le toto.

Ina ua mavae le masina talu le fonotaga i Moscow, na auai fomaʻi mai i atunuu eseese i le Fonotaga lona fā, a Fomaʻi e Tuiina Tui Faagase ma Faia Taotoga Faapitoa o Maʻi Tigāina, na faia i le aai o Arkhangel’sk i Rusia. Na auai foʻi Molimau a Ieova (HIS), ma na matuā tosina atu i ai ē na auai. Ina ua vaai i tusi ma DVD na faaalia, na faapea mai se fomaʻi mai i St. Petersburg, “O le mea tonu lava lea o loo matou manaʻomia!” Sa faaalia lona faanoanoa ona ua fai ma masani a fomaʻi le tuiina o le toto i maʻi e aafia i mū. Sa ia faapea atu ma le naunau: “O a outou tusi ma DVD o le a aogā tele i le togafitia o maʻi e aafia i mū o le a faia i St. Petersburg.”

Ua iloa e fomaʻi i le lalolagi atoa le aogā o vailaau faapea taotoga e lē faaaogāina ai le toto. O le a iai le taimi e avea ai lenei faiga o se taʻiala tāua i le lalolagi aoao i togafitiga faafomaʻi.

[Faaopoopoga i lalo]

[Ata i le itulau 23]

Sa auai le Auaunaga o Faamatalaga Faafomaʻi a Molimau a Ieova i lenei fonotaga. E toʻatele fomaʻi na ō ma ave le faitau selau o faila o faamatalaga, tusi, ma DVD i mataupu faafomaʻi

[Ata i le itulau 24]

E taulau manuia taotoga e lē faaaogāina ai le toto, pe a lelei ona tuufaatasi auala, masini ma vailaau e faasaoina ai le toto i taimi o togafitiga ma taotoga o maʻi