ʻAuā o le finagalo lenei o le Atua ina ia outou faamamao mai i le faia o le faitaaga.’​—1 Tesalonia 4:3.

TALA A TAGATA

E talia e nisi o aganuu le faia o feusuaʻiga a o leʻi faaipoipo. Ae i nisi vaipanoa, e latou te manatu e talafeagai le faia e tagata e leʻi faaipoipo o gaoioiga e faaalia ai le alofa fetosinaaʻi.

LE MANATU O LE TUSI PAIA

O loo faaaogāina i le Tusi Paia le upu “faitaaga,” e faasino atu i isi gaoioiga taufeusuaʻiga i fafo atu o le liʻo o le faaipoipoga. E faatalitalia e le Atua ona tagata tapuaʻi ina ia “faamamao mai i le faia o le faitaaga.” (1 Tesalonia 4:3) E aofia le faitaaga i nisi o agasala matuiā e pei o le mulilua, faiga faaagaga, onā, ifo i tupua, fasioti tagata ma le gaoi.​—1 Korinito 6:9, 10; Faaaliga 21:8.

AISEĀ E TĀUA AI

O se tasi o māfuaaga, ona o loo lapataʻi mai le Tusi Paia “e faamasino e le Atua o ē e faitaaga.” (Eperu 13:4) E sili atu i lenā, o le usitaʻia o ana tulafono e faatatau i amioga mamā taufeusuaʻiga, e faamaonia ai lo tatou alofa mo ia. (1 Ioane 5:3) E faamanuia e Ieova i latou e tausi i ana poloaʻiga.​—Isaia 48:18.

“O le faitaaga, ma amioga lē mamā uma, po o le matapeʻapeʻa, aua lava neʻi taʻua iā te outou.”​—Efeso 5:3.

TALA A TAGATA

E manatu le toʻatele o tagata, e leai se afāina o le faia e i latou e leʻi faaipoipo o isi gaoioiga taufeusuaʻiga.

LE MANATU O LE TUSI PAIA

Pe a taʻua amioga lē mamā taufeusuaʻiga, e lē na o le faitaaga o loo faasino atu i ai le Tusi Paia. E aofia ai foʻi “amioga lē mamā” ma “amioga matagā.” (2 Korinito 12:21) O lea, e inosia e le Atua le faia o isi gaoioiga taufeusuaʻiga a o leʻi faaipoipo.

E manino lava le faamatalaga a le Tusi Paia, e na o ulugalii faaipoipo e tatau ona faia feusuaʻiga. E taʻusalaina i le Tusi Paia “le tuʻinanau o le manaʻo tele i feusuaʻiga.” (1 Tesalonia 4:5) O le ā le uiga o lenā manatu? Seʻi manatu i se faataʻitaʻiga e mafai ona faatatau atu i se alii po o se tamaʻitaʻi. E ono maumauaʻi se tamaʻitaʻi ina ia aua neʻi faia ni feusuaʻiga ma lana uō tama. Peitaʻi, o loo ia faia pea isi gaoioiga e faamalieina ai o la manaʻoga taufeusuaʻiga. O le faia faapea, o loo la tuʻinanau pe manaʻonaʻo atu ai i se mea e lē o laʻua e ana. O lea, ua la nofosala ai i “le tuʻinanau o le manaʻo tele i feusuaʻiga” lea e taʻusalaina i le Tusi Paia.​—Efeso 5:3-5.

“Ia sosola ese i le faitaaga.”​—1 Korinito 6:18.

AISEĀ E TĀUA AI

Pe a fua i le manatu o le Tusi Paia, o i latou e faia feusuaʻiga ae e leʻi faaipoipo, e mafai ona motusia la latou faiā ma le Atua.​—Kolose 3:5, 6.

LE MANATU O LE TUSI PAIA

O loo lapataʻia e le Tusi Paia tagata ina “ia sosola ese i le faitaaga.” (1 Korinito 6:18) O lona uiga, e manaʻomia i se tasi ona faia taumafaiga uma e ʻalofia ai so o se mea e ono maileia ai o ia, i le faia o amioga lē mamā taufeusuaʻiga. (Faataoto 22:3) O se faaaʻoaʻoga, ina ia tumau ona amio mamā se tasi, e tāua ona ia ʻalofia faiā māfana ma i latou e lē amanaʻia mataupu silisili a le Atua e faatatau i feusuaʻiga. Ua lapataʻi mai le Tusi Paia: “O lē e savali ma tagata atamamai, e atamai ai o ia, a o lē e faifaimea faatasi ma tagata vālea, e leaga ai lava o ia.”​—Faataoto 13:20.

O le fafagaina foʻi o o tatou mafaufau i manatu lē mamā, e mafai ona iʻu atu ai i le faia o amioga lē mamā taufeusuaʻiga. (Roma 8:5, 6) O lea, e tāua ai le ʻalofia o musika, vitiō, tusi, ma so o se mea lava e faaalia ai faiga lē mamā taufeusuaʻiga e inosia e le Atua.​—Salamo 101:3.