O LE tulaga e ofo ai: E ui i le tulaga faamataʻu o loo feagai ma tagata e pei o le aveesea o a latou galuega, o fale, e oo lava i penisione, ae o loo latou pupū atu pea i le saʻilia o so o se mea e mafai ona faatauina i tupe.

O na ituaiga o tagata e faigofie ona faasesēina e le ʻaufaasalalau oloa, o ē faapea mai e tatau ona iai ni o tatou fale tetelē, taavale taugatā, faapea lāʻei taugatā o loo aʻe mai. E latou te faapea mai foʻi, aua le popole pe a leai sau tupe, e mafai lava ona e aitalafu! O le toʻatele e faafoliga mai o loo tele a latou tupe, ae o le mea moni e tele a latou aitalafu.

Peitaʻi, e lē tumau ai pea lenā tulaga. Ua faapea mai le tusi The Narcissism Epidemic: “O le aitalafuina o oloa taugatā ina ia faafoliga atu ai o loo e maua ni mea, e tai pei o le ulaina o le fualaau faasāina ina ia lelei ai ou faalogona. E foliga mai e lelei ma taugofie pe a aitalafu oloa taugatā, ae e mo na o sina taimi. Ae a o faagasolo taimi, o le a leai sau tupe ma o le a e lotovaivai ai.”

O loo taʻua i le Tusi Paia le lē atamai o “le faalialiavale o meafaitino a se tasi.” (1 Ioane 2:16) O le pupū atu i le saʻilia o meafaitino, e mafai ona galo ai mea e sili ona tāua lea e lē mafai e tupe ona faatauina. Seʻi iloilo nei mea e tolu.

Na manatu Penina, * o se talavou mai i Amerika, ua alu uma le taimi o lona tamā i lana galuega ina ia maua mai ai ni tupe. Na ia faapea mai: “E sili atu mea na matou maua nai lo o mea e manaʻomia, ae e lē taitai ona iai loʻu tamā i le fale ona e malaga i taimi uma. Ou te iloa ona o le pisi i lana galuega, ae ou te manatu e iai foʻi lana matafaioi i lona aiga!”

Seʻi manatu: O ā ni faalogona e ono oo i le tamā o Penina i se taimi mulimuli ane? E faapefea ona aafia lana faiā ma lona afafine ona o le faamuamua o meafaitino? O le ā le mea e sili ona manaʻomia e lona aiga mai iā te ia nai lo o tupe?

Iloilo taʻiala a le Tusi Paia:

• ʻO le manaʻo tele i tupe o le pogai lea o mea leaga eseese uma, ma o le manaʻo tele i ai ua tuia ai i latou e i latou lava i le tele o tigā.’​—1 Timoteo 6:10.

• “E sili atu ona ʻai i fualaau faisua faatasi ma i latou e te alofa i ai, nai lo o le ʻai o le aano o le manufasi e sili ona lelei ae o loo iai le ʻinoʻino.”​—Faataoto 15:17, Good News Translation.

Manatu autū: E lē mafai e tupe ona aumaia le autasi i le aiga. E pau le auala e maua ai le autasi o le faaalu o le taimi faatasi ma i latou, ma faaalia i ai le alofa ma le manatu mamafa.​—Kolose 3:18-21.

Na faapea mai Sara, e 17 ona tausaga: “E fai mai lava loʻu tinā e tatau ona ou faaipoipo atu i se alii e tele ana tupe, ma e tatau ona ou aʻoaʻoina se matātā ina ia maua ai saʻu galuega lelei ou te ola ai. E pau le mea o loo i lona mafaufau, po o fea se isi mea e maua mai ai sana tupe.”

Seʻi manatu: Pe a mafaufau e faatatau i le lumanaʻi, o ā ni mataupu e te popole ai? Ae o le ā le taimi e avea ai na mataupu ma mea e soona popolevale ai? E faapefea ona paleni le vaai a le tinā o Sara e faatatau i le saʻilia o se lumanaʻi manuia?

Iloilo taʻiala a le Tusi Paia:

• “Aua tou te toe faaputuina mo outou ʻoa o le lalolagi, auā o loo iai mogamoga ma le ʻele e faaumatia ai, o loo iai foʻi tagata gāoi e osofaʻi atu ma gaoia.”​—Mataio 6:19.

• “E tou te lē iloa le mea o le a tupu iā te outou a taeao.”​—Iakopo 4:14.

Manatu autū: O le faaputuina o tupe e lē mafai ona e maua ai se lumanaʻi manuia. Auā o le mea moni, e mafai ona gaoia tupe, ma e lē mafai ona aveesea ai faamaʻi faapea ma le oti. (Failauga 7:12) O loo aʻoaʻoina i le Tusi Paia, o le lumanaʻi manuia e maua mai lea i le iloaina o le Atua ma lana fuafuaga.​—Ioane 17:3.

Na faapea mai Tania e 24 ona tausaga: “Na tausia aʻu e oʻu mātua ina ia faafaigofie le auala e ola ai. Sa ma maua ma loʻu uso masaga le fiafia a o ma tuputupu aʻe, e ui e na o mea na manaʻomia na ma mauaina.”

Seʻi manatu: Aiseā e ono faigatā ai ona lotomalie i le mauaina na o mea e manaʻomia? O le ā le faaaʻoaʻoga o loo e faataatia mo lou aiga pe a oo mai i tulaga tautupe?

Iloilo taʻiala a le Tusi Paia:

• “Afai ua iai ni a tatou meaʻai, o mea e oofu ai, ma mea e nonofo ai, ia tatou lotomalilie i nei mea.”​—1 Timoteo 6:8.

• “E fiafia o ē e naunau i mea faaleagaga.”​—Mataio 5:3.

Manatu autū: E iai mea e sili atu i le olaga nai lo o tupe ma mea e mafai ona faatauina mai ai. Ua faapea mai le Tusi Paia: “Auā e lē ola se tasi i le tele o ana mea ua iā te ia.” (Luka 12:15) O le mea moni, o le faamalieina sili i le olaga e maua mai i le taliina o nei fesili:

• Aiseā ua tatou iai i inei?

• O le ā lo tatou lumanaʻi?

• E faapefea ona ou faamalieina oʻu manaʻoga faaleagaga?

E fiafia i latou na lomia lenei mekasini, o Molimau a Ieova, e fesoasoani iā te oe e saʻili tali i na fesili.