O LE Ā le mea e sili atu ona leaga i lo o le lē taulau? O le taulau manuia e lē moni. Auā foʻi pe afai e te lē taulau i se mea, e mafai ona e toe faasaʻo lenā mea. E mafai foʻi ona aʻoaʻoina oe mai i le mea na tupu, ma filifili ai e toe faaleleia i le isi taimi.

Peitaʻi, o le taulau manuia e lē moni, e te manatu o loo e taulau, ae o le mea moni e leai. E oo ane i le taimi e te iloa ai ua manaʻomia ona faia se suiga, ae atonu ua tuai.

Seʻi manatu i se faaaʻoaʻoga. Na fetalai Iesu: “O le ā le aogā i le tagata pe afai na te maua le lalolagi uma ae maʻimau ai lona ola?” (Mataio 16:26) E talafeagai lelei lenei manatu iā i latou o loo sulu ma le ulu i le saʻilia o tupe ma mea e faatau ai. O le faaaʻoaʻoga sili lenā o le taulau manuia e lē moni. Na tusi Tom Denham, o se faufautua mo galuega: “E lē mafai ona faamalieina se tasi pe afai e mafaufau tau lava o le siitia o le tulaga i le galuega, le mauaina o nisi tupe ma meafaitino. E lē atamai le fua o le taulau manuia i na o tulaga tau tupe, ma e lagona ai le lē faamalieina mo se taimi umi.”

E manino mai e toʻatele tagata i aso nei e ioe i le manatu ua taʻua i luga. I se suʻesuʻega na faia i le Iunaite Setete, na lona 20 le “mauaina o ni tupe se tele,” i le lisi o mea e 22 e “mafai ona maua ai se olaga taulau manuia.” O mea sa tele ina taʻua e tagata, e aofia ai le soifua mālōlōina lelei, ni faiā lelei ma se galuega e te fiafia i ai.

E mautinoa la e toʻatele tagata e iloa le eseesega o le taulau manuia moni ma le taulau manuia e lē moni, pe a fesili i ai. Peitaʻi, e matuā faigatā ona latou faia filifiliga e atagia mai ai le vaaiga saʻo e faatatau i le taulau manuia.