MATAUPU AUTŪ
Faamoemoe mo Tagata Matitiva ma Leai ni Mea e Nonofo Ai
O Joe o se tasi na iai i le vaegaʻau a le Iunaite Setete. E pe ā ma le 18 tausaga o leai se mea e nofo ai, ona o faafitauli na feagai ma ia ma lona aiga. I se tasi tausaga, na amata ai ona asiasi atu o ia i se faletusi, ma o nisi taimi e la te talanoa ai ma se fafine e faigaluega i le faletusi. O na talanoaga na suia ai lona olaga.
Sa lagona e Martín, o se tauleʻaleʻa i Anitenitina, e leʻi iai se la faiā ma le Atua. Sa foliga mai e leai se uiga o le olaga iā te ia. Sa ia tuua lona aiga ae alu e saʻili po o le ā le uiga moni o le olaga, ma na iʻu ane ua nofo i se matafaga. Peitaʻi, e na te leʻi mauaina ni tali ae na matuā mafatia. Sa tagi ma ʻaiʻoi atu i le Atua: “Faamolemole, afai o loo e soifua, fesoasoani mai ina ia ou maua oe.” O le ā le iʻuga? Seʻi o tatou vāai i ai.
E ESEESE māfuaaga ua leai ai ni mea e nonofo ai tagata. O nisi e pei o Joe, e māfua ona o latou lava faafitauli. O isi e pei o Martín, e māfua ona e filifili e lē fia ola i le olaga e masani ai, ona e manatu e leai se uiga o le olaga. Peitaʻi, o isi e māfua ona o le mativa, o mala faalenatura, sauāga i aiga, le faaaogā sesē o fualaau faasāina ma le ʻava malosi, maʻi o le mafaufau, lē gafatia tau o fale, po o le leai o ni galuega.
O le leai o ni mea e nonofo ai, o se faafitauli sa manatu e na o atunuu tau atiaʻe, po o atunuu o loo tau ai taua pe lē lelei le tamaoaiga e maua ai. Peitaʻi ua faapea mai le polofesa o le mafaufau ma amioga, o Paul Toro, “ua avea foʻi o se faafitauli autū i atunuu o loo lelei le tamaoaiga.” * O nisi o māfuaaga atonu e aofia ai tulafono a le malo e tusa ai o fesoasoani e tuu atu i aiga e lima vaivai, ma le telē o le eseesega o totogi o tagata.
E toʻatele tagata o loo popole e faatatau i le lumanaʻi. Peitaʻi, ua faaitiitia le popole o nisi e ala i le iloiloina o manatu o le Tusi Paia e faatatau i le lumanaʻi, ma o le a mulimuli ane tatou talanoaina lenei mataupu. E mafai foʻi ona fesoasoani le Tusi Paia iā i tatou i le taimi nei. O loo aumaia ai mataupu silisili e fesoasoani e faaleleia ai lo tatou tulaga tau tamaoaiga ma le itu tau faalogona,
e pei foʻi ona fesoasoani iā Joe ma Martín.SUIA E LE TUSI PAIA LONA OLAGA
O Cindi o se Molimau a Ieova sa faigaluega i le faletusi lea sa masani ona asiasi ai Joe. Na faapea mai Cindi, “O Joe e foliga mai e atamai, lelei ona uiga, ma lotomaulalo.” Sa tuu atu e Cindi iā Joe ni kopi o le Olomatamata ma le Ala Mai!, ma valaaulia o ia e auai i se sauniga o le Faamanatuina o le Maliu o Iesu. I inā, sa agalelei ma faaaloalo tagata iā Joe, ma o lea na ia auai ai e lē aunoa i sauniga. Na talia foʻi e Joe le ofo a se tasi o tane i le faapotopotoga e la te suʻesuʻeina le Tusi Paia.
O le suʻesuʻega faale-Tusi Paia a Joe ua fesoasoani e lelei ai ona faalogona e faatatau iā te ia lava
Sa matuā faamāfanafanaina Joe i mea na ia aʻoaʻoina, ma amata loa ona faatatau aʻoaʻoga a le Tusi Paia, e ui lava sa manaʻomia ai ona faia ni suiga tetele i lona olaga. O se faaaʻoaʻoga, ua ia aʻoaʻoina o le ola o se meaalofa mai i le Atua e tatau ona faatāua, ma e faaleagaina le tino i le tapaa. (Salamo 36:9) O lea, e leʻi toe ulaula o ia i le ōgatusa ai ma le mataupu silisili o loo i le 2 Korinito 7:1: ʻSeʻi o tatou faamamā iā i tatou mai i mea uma e faaleagaina ai le tino.’ O le filifiliga a Joe, e lē gata ua aogā i lona soifua mālōlōina, ae ua sefe ai foʻi ana tupe.
Ina ia faatatau le fautuaga a le Tusi Paia e faapea e tatau ona fai le mea e mafai ina ia tausia ai o tatou manaʻoga faaletino, na amata ai loa ona suʻe se galuega a Joe. * (1 Tesalonia 4:11, 12) Ua taʻua i le Failauga 2:24: “E leai se mea e sili i le tagata nai lo o le ʻai ma inu, ma iloa e ia mea lelei ona o lana galuega mamafa.” Pe a tatou galulue faamaoni, o le a faamamaluina i tatou, lagona le fiafia ona o loo lelei o tatou faalogona e faatatau iā i tatou lava, ma mafai ai ona tatou fesoasoani atu i ē o loo manaʻomia se fesoasoani.—Efeso 4:28.
Ua taʻua e Cindi, “sa talia fiafia e le faapotopotoga” Joe ona o lona faamaoni, ma “sa fesoasoani nisi e talosaga se fale talafeagai mo ia ma isi fesoasoani e mafai ona ia mauaina.” Sa faaauau ona agaʻigaʻi i luma Joe ma mulimuli ane papatiso o se Molimau a Ieova. Ua mafai nei ona faalaeiau e Joe isi ia saʻili le atamai mai i le Atua lea o loo i le Tusi Paia, e pei foʻi ona sa tupu iā te ia.—Faataoto 3:13, 14.
UA IAI SE FUAFUAGA O LONA OLAGA
Na amata ona saʻili e Martín le fuafuaga moni o le olaga, ina ua 20 ona tausaga. Ua ia faapea mai: ʻSa ou suʻesuʻeina mataupu e faatatau i lotu ma filosofia, ma faaaogā fualaau faasāina, ma le faamoemoe o le a faamalieina ai loʻu faanaunauga ia maua se faiā ma le Atua, peitaʻi e leʻi taulau.’ Sa nofo Martín i Kalifonia i Amerika mo sina taimi, ona alu atu lea i Hawaii. Ua ia faapea mai: “Sa ou manatu ua ou maua le parataiso.” Peitaʻi e leʻi mafai e nei vaaiga matagofie ona faamalieina ai lona faanaunauga. Ua ia taʻua: “Sa matuā lofitūina aʻu i le mafatia, ma ou tau pule ai i loʻu ola.” O le taimi lenā na matuā tagi masūsū ai o ia ma ōle atu i le Atua, “Faamolemole, afai o loo e soifua, fesoasoani mai ina ia ou maua oe.”
Ua iai nei se vaaiga saʻo a Martín e faatatau i le olaga
Sa manatua e Martín, e leʻi leva tele atu na vaai ai i se faailoilo e faapea “Maota mo Sauniga a Molimau a Ieova.” Sa ia filifili e alu atu i inā ina ia auai i se sauniga faa-Kerisiano. Na ia taʻua: “Sa ou savali atu i totonu ma loʻu ulu uumi, o laʻu ʻava, ma oʻu ofu sa ofu mo le tele o masina. E ui i lea, sa faafeiloaʻi ma le māfana aʻu.” Sa talia e Martín se suʻesuʻega faale-Tusi Paia, ma e masani ona savali mai i le matafaga lea sa nofo ai e agaʻi i le taulaga, ina ia fai ai lana suʻesuʻega faale-Tusi Paia.
O lea faatoʻā maua e Martín tali faamalieloto i ana fesili. O le iʻuga, sa mou atu lona mafatia ma tofo i le olioli lea sa taʻua e Iesu ina ua fetalai: “E fiafia o ē e naunau i mea faaleagaga.”—Mataio 5:3.
“Ua matuā maofa tagata i suiga ua ou faia”
E leʻi umi ae manino mai le suia o le vaaiga a Martín e faatatau i le olaga, a o ia faatatauina mataupu silisili lea foʻi sa fesoasoani iā Joe. Sa teuteu e Martín ona foliga vaaia, ma o le fesoasoani a Molimau na maua ai lana galuega ma se fale e nofo ai. Ua ia faapea mai: “I le taimi muamua, sa iloa aʻu i le taulaga o sē e leai se mea e nofo ai, ae ua matuā maofa tagata i le taimi nei i suiga ua ou faia.”
Mulimuli ane na toe foʻi Martín i Anitenitina, ma papatiso ai o se Molimau a Ieova. Ua ia matuā faatāua le faaeaga o le fesoasoani atu i isi o loo galala faaleagaga, ina ia maua tali o fesili tāua e faatatau i le olaga.
LE TAIMI O LE A LĒ TOE MATITIVA AI TAGATA MA IAI MEA E NONOFO AI
O Ieremia o se auauna anamua a le Atua sa ola i se vaitaimi o le tele o puapuaga. Sa osofaʻia e se fili sauā lona atunuu ma ave faapagota ma faapologa le toʻatele o ona tagata. (Auega 1:3) Sa faasaoina o ia, ae na aveesea le tele o ana mea. Sa matuā mafatia o ia ma ōle atu i le Atua: “Ia e manatua oʻu mafatiaga ma le leai o se mea ou te nofo ai.”—Auega 3:19.
Peitaʻi, e leʻi faavaivai ai Ieremia ona o puapuaga, auā sa ia iloa e lē tuulafoaʻia o ia e Ieova. (Ieremia 1:8) E lē gata i lea, sa ia suʻesuʻeina Tusitusiga Paia lea e taʻua ai se taimi o le a aveesea ai le mativa ma puapuaga, ae suia i le filemu moni ma le saogalemu.—Salamo 37:10, 11.
E lē mafai e tagata ona fai nei mea, peitaʻi o le a faataunuuina e ala mai i le pulega lelei atoatoa a le Malo o le Atua. (Tanielu 7:13, 14) O le Tupu o lenā Malo o Iesu Keriso, o lē sa matuā alofa mutimutivale i tagata matitiva a o iai i le lalolagi. (Luka 7:22; 14:13) I lana pulega, “e tupu olaola ai lē e amiotonu, e tele foʻi le filemu . . . E laveaʻi e ia le tagata mativa o loo tagi mai mo se fesoasoani, atoa foʻi ma lē ua mafatia ma lē ua leai sona fesoasoani. E laveaʻiina e ia i latou mai i le pule sauā ma faiga sauā.”—Salamo 72:7, 12, 14.
“O le a latou fausia fale ma nonofo ai.”—Isaia 65:21
Sa taulaʻi atu aʻoaʻoga a Iesu i le Malo o le Atua. (Luka 4:43) Sa ia aʻoaʻoina foʻi tagata ia tatalo e faapea: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:9, 10) O le a faapeʻī le olaga i le lalolagi pe a pulea atoatoa e le Malo o le Atua? Ua taʻu mai i le Tusi Paia iā i tatou nisi o mea matagofie e faatatau i le lumanaʻi. O se faaaʻoaʻoga, ua faapea mai e faatatau i tagata o le a pulea e le Malo o le Atua:
-
“O le a latou fausia fale ma nonofo ai; e latou te totō foʻi togāvine ma latou aai i ona fua. O le a latou lē fausia ae e nonofo ai isi; o le a latou lē totō ae e aai ai isi. . . . O le a matuā fiafia uma oʻu tagata ua filifilia i galuega a o latou lima.”—Isaia 65:21, 22.
-
“Ae e taʻitoʻatasi ma nofo i lalo o lona vine ma lalo o lona mati, e leai foʻi se tasi e faamataʻu iā i latou; auā ua faapea ona tulei mai ai le fofoga o Ieova o ʻau.”—Mika 4:4.
O lenei faamoemoe mautinoa e mafai ona faamalosia ai i tatou i taimi o faigatā. E mafai foʻi ona fesoasoani mataupu silisili o le Tusi Paia iā i tatou ina ia ola i ni olaga fiafia ma faamalieina i le taimi nei, e pei foʻi o Joe, Martín ma le toʻatele o isi. O lea, ua faamautinoa mai Ieova le Atua, o Lē na faia i tatou: “O lē e faalogo mai iā te aʻu, o le a saogalemu ma lē fefe i so o se puapuaga.” (Faataoto 1:33) Tau ina ia faamaonia i lou olaga le moni o nei upu!
^ pala. 6 O feteenaʻiga ma sauāga, ua ō ese faamalosi ai le faitau miliona o tagata mai i o latou fale, ma avea ai o ni tagata sulufaʻi i isi atunuu pe i totonu o o latou lava atunuu.
^ pala. 11 O nisi tagata e fia galulue ae ua lē mafai, ona atonu e lē atoatoa le malosi o le tino, o ni maʻi po o le soifua matua. E inosia e le Atua le tagata “e lē fia galue.”—2 Tesalonia 3:10.