Ua faapea mai tagata Saina e atamamai i tulafono, e matuā lamatia fanau i le faaleagaina pe afai e lē aʻoaʻo e o latou mātua mai lava a o lāiti, e faatatau i lamatiaga ma aafiaga o faiga taufeusuaʻiga. I le 2010 i le 2013, na taulima ai e lōia i Saina le pe ā ma le 8,000 moliaga e faatatau i le faaleagaina o tamaiti i faiga taufeusuaʻiga. Ua taʻua e se polofesa i mataupu tau tulafono i le Beijing Normal University, “e faigofie ona taaʻina ma osofaʻia tamaiti. O le aʻoaʻoina o le auala sili lea e puipuia ai mai i le faaleagaina i feusuaʻiga.”

LE MANATU O LE TUSI PAIA: O mātua e atamamai e aʻoaʻo a latou fanau i auala e puipuia ai i latou lava “mai i le tagata e tautala pepelo.”​—Faataoto 2:1, 10-12.

E tusa ai ma se suʻesuʻega, i le fua faatatau o teineiti lāiti i Filipaina na feoti i le tausaga talu ona mavae se afā malosi, pe ā ma le 15 taimi e toʻatele atu ai nai lo o tagata na maliliu i matagi malolosi. O nisi o māfuaaga atonu e aofia ai le leai o ni galuega ina ua mavae le afā, le taugatā o le toe fausiaina o fale, ma le auala na faasoa atu ai fesoasoani i teineiti lāiti, e aofia ai meaʻai ma le tausiga tau soifua mālōlōina.

LE MANATU O LE TUSI PAIA: ʻIa vaevae au meaʻai i lē ua fia ʻai, aumai i lou fale ē ua puapuagatia ma ē ua leai se mea e nonofo ai. Afai foʻi e te vaai atu i se isi e lē lavalavā, ia e faaofu iā te ia.’​—Isaia 58:7.

I le 2011, e silia i le kuata o tagata na pule i ola i Korea i Saute, o tagata e 65 tausaga ma matutua atu. Ua tuuaʻia e nisi tagata suʻesuʻe le suia o le vaaiga e faatatau i le tausia o ē ua matutua ma le faalētonu o le tamaoaiga, auā e toetoe 50 pasene o tagata matutua i Korea i Saute e matitiva. E itiiti ifo i le ʻafa o tagata i Korea i Saute e manatu e tatau i fanau ona tausia o latou mātua ua matutua.

LE MANATU O LE TUSI PAIA: “Ia e āva i lou tamā ma lou tinā.”​—Efeso 6:2.