O le toʻatele o tagata i le lalolagi o loo manaʻomia meaʻai ma fale e nonofo ai. O isi o loo manaʻomia se mea e tulimataʻia i le lumanaʻi. E faapefea i a tatou taumafaiga ia fesoasoani iā i latou, ona latou maua ai le finagalo malie o le Atua ma ana faamanuiaga?

“O lē e faaalia le agalelei i lē e lē taualoa, ua nonō atu iā Ieova, ma o le a toe tauia o ia e Ia e tusa ma ana gaoioiga.” ​—FAATAOTO 19:17.

Na faamatala e Iesu se tala e faatatau i se tamāloa na osofaʻia e tagata faomea ma na toetoe a oti. (Luka 10:29-37) Na tau ane i ai se tagata loto fesoasoani ma na ia tausia o ia. Na ia faia faapea e ui i le eseese o o la atunuu.

E lē gata na vave ona gaoioi lenei tamāloa agalelei e avatu le fesoasoani ma saunia le tausiga faaletino, ae na ia faamāfanafana foʻi ma avatu i ai le mapusaga mai i ona mafatiaga.

O le ā e tatou te aʻoaʻoina mai i lenei tala? Na faailoa mai e Iesu e tatau ona tatou fesoasoani atu i ē o loo manaʻomia le fesoasoani i so o se auala. (Faataoto 14:31) O loo aʻoaʻo mai i le Afioga a le Atua, o le a aveesea e le Atua le mativa ma mafatiaga. E tatou te ono taumānatu, pe faapefea ma o afea o le a faia ai faapea e le Atua? I le mataupu o loo sosoo mai, o le a talanoaina ai faamanuiaga e maua mai i Lē na foafoaina i tatou.