I mataupu ua mavae ua tatou aʻoaʻoina ai mea e mafai ona fesoasoani iā i tatou e tali ai le fesili, O ai le Atua? Na amata ona tatou iloiloina mai i le Tusi Paia o lona suafa o Ieova, ma o lona uiga autū o le alofa. Na tatou iloiloina ai foʻi mea na ia faia ma mea o le a ia faia, lea e maua ai e tagata uma aogā. E tele isi mea e mafai ona aʻoaʻoina e faatatau iā Ieova, ae e te ono manatu pe e iai se aogā o le aʻoaʻoina e faatatau iā te ia.

Ua folafola mai e Ieova pe “afai e te saʻili iā te ia, ona e maua lea o ia.” (1 Nofoaiga a Tupu 28:9) A o e saʻili ma faasolosolo ona iloa lelei le Atua, o le a e maua ai se faiā faapitoa o se faauōga vavalalata ma ia. (Salamo 25:14) O ā aogā o le iai o se faauōga ma ia?

Maua ai le fiafia moni. Ua faamatalaina Ieova o “le Atua fiafia.” (1 Timoteo 1:11) O le vavalalata atu iā te ia ma faaaʻoaʻo i ona ala o le a mafai ai ona e maua le fiafia moni, lea e te maua ai aogā i le itu tau faalogona, tau i le mafaufau ma tau i le tino. (Salamo 33:12) E mafai foʻi ona e atiaʻe se olaga fiafia, e ala i le ʻalofia o masaniga e faaleagaina ai o tatou ola, atiaʻe ni masaniga lelei, ma faatumauina ni faauōga lelei ma isi. O le a e ioe faatasi ma upu a le faisalamo: “Ou te faalatalata atu i le Atua ou te lelei ai.”—Salamo 73:28.

Maua ai lana tausiga alofa ma lagona ai o loo naunau mai. Na folafola mai e Ieova i ana auauna: “Ou te fautua atu foʻi a o oʻu vaai atu iā te oe.” (Salamo 32:8) O lona uiga e nanau moni Ieova i ana auauna taʻitoʻatasi, ma e na te foaʻi mai e tusa ma mea e latou te manaʻomia. (Salamo 139:1, 2) O le taimi lava e te atiaʻe ai se faiā lelei ma Ieova, o le a e iloa ai e lē o tuulafoaʻia oe e ia.

Maua ai se lumanaʻi matagofie. E faaopoopo atu i le iloaina o le auala autū e te maua ai le fiafia ma se olaga faamalieina i le taimi nei, o loo tatala mai foʻi e Ieova le Atua iā te oe se avanoa mo se lumanaʻi matagofie. (Isaia 48:17, 18) O loo taʻua i le Tusi Paia: “O le ola e faavavau foʻi lenei, ia latou iloa oe, le Atua moni e toʻatasi, atoa ma lē na e auina mai, o Iesu Keriso.” (Ioane 17:3) I lenei taimi sili ona faigatā, ua avea le faamoemoe ua foaʻi mai e le Atua e tai pei o se taula lea e mafai ona “e mautinoa ma mausalī” ai.—Eperu 6:19.

O nisi nei o māfuaaga mai i le tele o māfuaaga tāua e tatau ai ona tatou iloa lelei le Atua ma atiaʻe se faiā vavalalata ma ia. E valaaulia oe e talanoa atu i se tasi o Molimau a Ieova pe asiasi ane i le jw.org mo nisi faamatalaga.