E leʻi maua lava e se tasi le tali o lenā fesili mo le faitau afe o tausaga, ma ua faitau piliona tagata ua maliliu ona o faamaʻi pipisi. E ui i lea, na iloa e saienitisi le mea moni. Na maua i a latou suʻesuʻega ma faailoa mai o faamaʻi e māfua mai i siama po o meaola ninii e taʻua o vairusi. O le iloaina o lenā mea moni na fesoasoani i tagata e puipuia ma togafitia ai le tele o faamaʻi, ma na mafai ona mālōlōina ma umi ai le ola o le faitau piliona o tagata.

Ae faapefea isi fesili tāua? E faapefea i le saʻilia o upu moni e faatatau i fesili o loo mulimuli mai ona aafia ai oe?

• O ai le Atua?

• O ai Iesu Keriso?

• O le ā le Malo o le Atua?

• O le a faapeʻī le lumanaʻi?

Ua faaleleia olaga o le faitau miliona o tagata ona o le mauaina o tali i nei fesili, ma e mafai foʻi ona e maua ai aogā.

E te ono taumānatu: ʻPe e mafai ona e iloa le mea moni e faatatau i so o se mea?’ Ua faasolo ina matuā faigatā le saʻilia o le mea moni e faatatau i so o se mataupu. Aiseā?

O le toʻatele o tagata ua lē maufaatuatuaina faigāmalo, o pisinisi po o tagata faasalalau e faailoa atu iā i latou le mea moni. Ua faigatā i tagata ona latou iloa po o taʻua e isi le mea moni, po o latou taʻua na o latou manatu, nanā isi faamatalaga pe pepelo foʻi. Talu ai ua lē maufaatuatuaina e le tasi le isi ma o le tele lava o faamatalaga e sesē, ua lē talitonu ai tagata i le mea moni lava ma lona aogā mo i latou.

E ui e iai luʻi, ae e mafai lava ona maua tali maufaatuatuaina o fesili e sili ona tāua i le olaga. E faapefea? E ala i le faaaogāina o ou tomai lea e faaaogā i aso faisoo.

O aso uma lava e fai ai au saʻiliʻiliga faaopoopo mo le mea moni. Mātau le tulaga o Jessica. Na ia faapea mai: “Na matuā tugā le pata o le tino o laʻu tama teine i le pinati. E oo lava i sina vaega o le pinati e na te taumafaina, e mafai lava ona uma ai lona ola.” Na manaʻomia ona iloa lelei e Jessica le meaʻai o le a ia faatauina, ina ia faasao ai le ola o lana tama. “O laʻu mea muamua lava e fai, o le faitau lea ma iloilo lelei faamatalaga o le meaʻai po o iai se pinati. Na fai isi aʻu saʻiliʻiliga faaopoopo e ala i le faafesootaʻi o le kamupani, ina ia faamautinoa e lē o iai se pinati i le oloa o loo oʻu faatauina. Ou te faafesootaʻi foʻi le vaega o le soifua mālōlōina, ina ia faamautinoa pe e iai se talaaga lelei o le kamupani i le tausisia o le mamā i le auala o loo gaosi ai a latou oloa.”

Atonu e lē o le auala lea e te saʻili ai i aso faisoo mo le mea moni, ae i le pei o Jessica, atonu e te faaaogāina vala o loo mulimuli mai e saʻili ai tali o fesili o loo e tuufesili ai:

• Ia maua faamatalaga saʻo.

• Ia fai ni saʻiliʻiliga faaopoopo.

• Ia faamautinoa e maufaatuatuaina mea o loo aumai ai au faamatalaga.

O le auala lava foʻi lenā e mafai ona fesoasoani iā te oe, ina ia maua tali maufaatuatuaina o fesili tāua i le olaga. E faapefea?

Na faaaogā e Jessica le auala lava lea na ia saʻiliʻili ai mo meaʻai e pata ai le tino o lana tama teine, ina ia saʻili ai tali o fesili tāua i le olaga. Na ia faapea mai: “O le faitauina o le Tusi Paia ma iloiloga filigā, na fesoasoani iā te aʻu e maua ai tali maufaatuatuaina.” I le pei o Jessica, e faitau miliona tagata ua latou aʻoaʻoina faamatalaga mai i le Tusi Paia e faatatau i fesili nei:

• Aiseā ua tatou iai i inei?

• O le ā e tupu i le tagata pe a oti?

• Aiseā ua tatou mafatia ai?

• O le ā o loo faia e Ieova ina ia faaiʻuina ai mafatiaga o tagata?

• E faapefea ona e maua se aiga fiafia?

E mafai ona e maua tali maufaatuatuaina o nei fesili ma isi fesili, e ala i le faitauina o le Tusi Paia ma faia ni saʻiliʻiliga faaopoopo i le www.dan124.com/sm.