“O le mea lea, ia faaauau ai ona outou mataala, auā tou te lē iloa le aso po o le itula.”—MATAIO 25:13.

“Ia vaavaai pea, ia mataala pea, auā tou te lē iloa le taimi atofaina.”—MAREKO 13:33.

O lea, e lē iloa e se tasi po o afea e oo mai ai le iʻuga o lenei faiga o mea. Peitaʻi ua iai le “taimi atofaina” a le Atua, po o le ʻaso ma le itula’ e oo mai ai le iʻuga. (Mataio 24:36) Po o lona uiga e tatou te matuā leiloa lava le taimi e lata mai ai le iʻuga? E leai. Na taʻu atu e Iesu i ona soo le tele o mea o le a tutupu, e iloa ai ua latalata mai le iʻuga.

O nei mea o le a tutupu, o le faailoga lenā o le “taufaaiʻuiʻuga o le faiga o mea a le lalolagi.” Na fetalai Iesu: “O le a siitaua atu isi atunuu i isi atunuu, ma isi malo i isi malo, o le a iai foʻi oge ma mafuiʻe i lea mea ma lea mea.” (Mataio 24:3, 7) Na ia faapea mai foʻi o le a iai “faamaʻi.” (Luka 21:11) Po ua e vaaia faailoga na valoia mai e Iesu?

Ua matuā mafatia tagata i aso nei i taua, oge, mafuiʻe ma le tele o faamaʻi. Mo se faataʻitaʻiga, i le 2004, na lulu ai se mafuiʻe tele i le Vasa Initia ma māfua ai se sunami lea na fasiotia ai le 225,000 tagata. Na maliliu le pe tusa ma le 6.9 miliona tagata i le faamaʻi o le KOVITI-19, i totonu o le tolu tausaga. Na taʻua e Iesu, o nei mea uma ua tutupu e iloa ai ua lata mai le iʻuga o lenei faiga o mea.

Ua taʻua i le Tusi Paia le vaitaimi a o leʻi oo mai le iʻuga, o “aso e gata ai.” (2 Peteru 3:3, 4) O loo faamatalaina i le 2 Timoteo 3:1-5 le paʻū maulalo o tapulaa tau amio a tagata, lea e iloa ai aso e gata ai. (Tagaʻi i le pusa “ A o Lata Mai le Iʻuga o le Lalolagi.”) Po o e vaaia i aso nei tagata e faaalia uiga manatu faapito, manaʻo tele, sauā, ma le leai o se alofa i isi? Ua faamaonia ai, ua lata mai lava le iʻuga o le lalolagi.

O le ā le umi o aso e gata ai? Ua taʻua i le Tusi Paia “ua puupuu lona taimi.” Ua toeitiiti ona faaumatia lea e le Atua o i “latou o loo faaleagaina le laueleele.”—Faaaliga 11:15-18; 12:12.

Ua uma ona atofaina e le Atua le aso ma le itula, o le a ia faaoo mai ai le iʻuga o lenei faiga leaga o mea. (Mataio 24:36) Ae e iai se tala lelei. “E lē finagalo [le Atua] e faaumatia se tasi.” (2 Peteru 3:9) Ua ia tuuina mai i tagata le avanoa e aʻoaʻo ai e faatatau i lona finagalo ma usiusitaʻi iā te ia. Aiseā? Talu ai e finagalo o ia e faasaoina i tatou mai le iʻuga o lenei lalolagi, ma ola i lana lalolagi fou pe a suia e avea ma parataiso.

Ua faamaopoopo e le Atua se polokalame tau aʻoaʻoga i le lalolagi aoao, e aʻoaʻoina ai tagata i le auala e avea ai ma vaega o le lalolagi fou i le pulega a lona Malo. Na faapea mai Iesu o le a talaʻiina atu le tala lelei o le Malo o le Atua i “atunuu uma.” (Mataio 24:14) O loo faaalu e Molimau a Ieova i le lalolagi aoao le faitau piliona o itula, e talaʻi atu ai ma aʻoaʻo tagata i le feʻau o le faamoemoe mai i le Tusi Paia. Na faapea mai Iesu o le a faataunuuina lenei galuega talaʻi i le lalolagi aoao, a o leʻi oo mai le iʻuga.

Ua toeitiiti lava faaiʻuina pulega a tagata. Ae o le tala lelei, e mafai ona faasaoina oe mai le iʻuga o le lalolagi, ma avea ma vaega o le lalolagi Parataiso ua folafola mai e le Atua. O le a talanoaina i le mataupu o sosoo mai, le auala e mafai ai ona e sao atu i lenā lalolagi fou.