Se Parataiso i le Lalolagi Fou ua Lata Mai!
Na foafoaina e le Atua le lalolagi ina ia ola ai e faavavau tagata amiotonu. (Salamo 37:29) Na ia faia se faatoʻaga matagofie i Etena ma tuu i ai le uluaʻi ulugalii o Atamu ma Eva. Na ia tuuina atu foʻi iā i laʻua ma a la fanau se tiute tauave, o le galueaʻiina ma tausia lelei le lalolagi.—Kenese 1:28; 2:15.
E matuā ese lava le lalolagi i aso nei, mai le lalolagi Parataiso na folafola mai e le Atua. Peitaʻi, e lē o suia ai le fuafuaga a le Atua. O le a faapefea ona ia faataunuuina lona finagalo na iai i le amataga? E pei ona faailoa mai i mataupu ua mavae, o le a lē faaumatia e le Atua le lalolagi paneta. Nai lo lea, o le a ola ai tagata faamaoni. Pe a faataunuuina le folafolaga a le Atua, o le ā le tulaga o le lalolagi o le a iai?
Le faigāmalo e pulea le lalolagi aoao
Ua toeitiiti ona pule mai lea o le faigāmalo a le Atua i le lagi, i le lalolagi. I lenā taimi, o le a avea le lalolagi ma nofoaga e maua ai e tagata le fiafia ma le filemu, faia ai galuega lelei ma faamalieina. Ua tofia e le Atua Iesu Keriso e avea ma pule o le lalolagi. E ese mai i le tele o pule o loo iai i le taimi lenei, o le a faia e Iesu mea lelei mo ona tagatānuu. O lana pulega e faavae i le alofa, ma o le a avea o ia o se tupu agalelei, alofa mutimutivale ma faamasinotonu.—Isaia 11:4.
Autasi tagata uma i le lalolagi aoao
O le a lē toe faaeseesea tagata i le lalolagi fou i o latou atunuu ma aganuu, ae o le a autasi uma. (Faaaliga 7:9, 10) O le a alolofa tagata uma i le Atua ma o latou tuaoi, ma galulue faatasi ma le filemu e faataunuu le fuafuaga a le Atua na iai i le amataga, ina ia tausia lelei le lalolagi.—Salamo 115:16.
Tausia lelei le siʻosiʻomaga
Pe a pulea e le Malo o le Atua le lalolagi, o le a faatonutonuina e Lē na foafoaina mea le tau, ina ia iai i se tulaga paleni. (Salamo 24:1, 2) A o iai Iesu i le lalolagi, na ia faaāta mai mea e mafai ona ia faia e ala i le mana o le Atua, ina ua ia faatoʻafilemu se matagi. (Mareko 4:39, 41) I le pulega a Keriso, o le a lē toe fefe se isi i mala faalenatura. O le a toe faafoʻisia e le Malo o le Atua le filemu i le va o tagata ma manu, ma e lē toe faaleagaina foʻi le laueleele.—Hosea 2:18.
Soifua mālōlōina lelei atoatoa ma le anoanoaʻi o taumafa
O le a olioli tagata i se soifua mālōlōina lelei atoatoa. O le a lē toe iai se tasi e maʻi, tino matua pe oti. (Isaia 35:5, 6) O le a olioli tagata i se siʻomaga matagofie ma mamā, lea na olioli ai le uluaʻi ulugalii i le faatoʻaga o Etena. I le lalolagi fou, o le a fau ma soloi meaʻai mo i latou uma o le a nonofo ai, e pei lava o le faatoʻaga o Etena. (Kenese 2:9) E pei lava o le nuu o le Atua o Isaraelu anamua, o le a aai tagata uma i le Parataiso “i a [latou] meaʻai ma maoona ai.”—Levitiko 26:4, 5.
Filemu ma le saogalemu moni
I le faigāmalo a le Atua, o le a olioli tagata uma i le filemu ma feutagaʻi i se auala alofa ma faamasinotonu. O le a lē toe iai ni taua, e lē toe faaaogāsesēina le pule, ma o le a maua e tagata mea uma e latou te manaʻomia. Ua folafola mai i le Tusi Paia: “E taʻitoʻatasi i latou ma nofo i lalo o lona vine ma lalo o lona mati, e leai foʻi se tasi e faamataʻu iā i latou.”—Mika 4:3, 4.
Fale fou ma galuega e faamalieina ai
O le a nonofo aiga uma i o latou fale e aunoa ma le fefefe neʻi tutuliesea i latou, ma o le a tauia a latou galuega mamafa uma. Ua faapea mai le Tusi Paia, “o le a lē galulue fua i latou” e ola i le lalolagi fou a le Atua, pe iʻuvale a latou galuega.—Isaia 65:21-23.
Aʻoaʻoga sili ona lelei
Ua folafola mai e le Tusi Paia: “O le a tumu le lalolagi i le poto e uiga iā Ieova.” (Isaia 11:9) O i latou e ola i le pulega a le Malo o le Atua, o le a aʻoaʻoina i le atamai o Ieova, ma mea e matagofie na ia foafoaina. O le a latou lē toe fausiaina meatau, pe faaleagaina isi tagata. (Isaia 2:4) Nai lo lea, o le a latou aʻoaʻoina le auala e tausia ai le filemu ma isi tagata, ma le auala e tausia ai le lalolagi.—Salamo 37:11.
Ola e faavavau
Na foafoaina e le Atua le lalolagi ma mea uma o iai, ina ia tatou olioli ai i le olaga i aso taʻitasi. E finagalo o ia ina ia ola e faavavau tagata i le lalolagi. (Salamo 37:29; Isaia 45:18) Ina ia faataunuu lona finagalo, “o le a faaumatia e ia le oti e faavavau.” (Isaia 25:8) Ua folafola mai e le Tusi Paia, o le a “lē toe iai se oti, po o se faanoanoa, po o se tagiauē, e lē toe iai foʻi se tigā.” (Faaaliga 21:4) O le a tuuina atu e le Atua i tagata o le a faasaoina mai i le faaumatiaga o lenei lalolagi, ma i latou o le a toe faatutūina mai, le avanoa e ola ai e faavavau.—Ioane 5:28, 29; Galuega 24:15.
E faitau miliona i latou i le taimi lenei ua sauni e ola i le Malo o le Atua ua lata mai. E ui e lē lelei atoatoa, ae ua latou faia taumafaiga ina ia avea ma ituaiga tagata e talia e le Atua i lana lalolagi fou. E faapefea? E ala i le aʻoaʻo e faatatau iā Ieova le Atua, ma lē na ia auina mai, o Iesu Keriso.—Ioane 17:3.
Ia aʻoaʻo atili pe faapefea ona faasaoina oe mai le iʻuga o lenei lalolagi, ma ola i se lalolagi sili ona lelei ua lata mai. Talia se talanoaga faale-Tusi Paia e aunoa ma se totogi ma se tasi o Molimau a Ieova, e faaaogā ai le tusi Se Olaga Fiafia e Faavavau!
E te Ono Fiafia Foʻi
LE OLOMATAMATA
O le ā o le a Faataunuuina e le Malo o le Atua?
Na silafia lelei e Iesu e na o le Malo o le Atua le faigāmalo e mafai ona foʻia faafitauli o le lalolagi. O ā mea ua faataunuuina e lenā Malo lea e faamalosia ai lo tatou mautinoa?
LE OLOMATAMATA
Malo o le Atua—O se Malo e Lē Iai ni Faiga Piʻopiʻo
Vala e ono o le Malo o le Atua e faamaonia ai o le a lē iai ni faiga piʻopiʻo.
