TAGATA

Manatu o le Tusi Paia: E leʻi “foafoaina fua [e le Atua] le lalolagi, ae na ia faia ina ia ʻainā.”—ISAIA 45:18.

LALOLAGI PANETA

Manatu o le Tusi Paia: “E mavae atu le tasi tupulaga ae e sau le isi tupulaga, a o le lalolagi e tumau lea e faavavau.”—FAILAUGA 1:4.

LE UIGA: E tusa ai o le Tusi Paia, o le a lē faaumatiaina le lalolagi ma o le a nonofo ai pea tagata. O le ā la e uiga i ai le iʻuga o le lalolagi?

IA MĀTAU: O loo faatusa i le Tusi Paia le oo mai o le iʻuga o lenei lalolagi, i le mea na tupu i aso o Noa. Na “tumu le lalolagi i faiga sauā” i lenā taimi. (Kenese 6:13) Peitaʻi, na avea pea Noa ma tagata amiotonu. O lea, na faasaoina e le Atua Noa ma lona aiga, ae faaumatia tagata leaga i se lolo. Ua taʻua i le Tusi Paia le mea na tupu: ʻNa oo le faaumatiaga i le lalolagi i lenā taimi, ina ua lofia i le vai.’ (2 Peteru 3:6) E leʻi faaumatiaina ai le lalolagi i lenā taimi. Ae o le ā na faaumatia? O tagata amioleaga, ae lē o le lalolagi paneta. Pe a taʻua la i le Tusi Paia le iʻuga o le lalolagi, e lē faasino atu i le faaumatiaga o le lalolagi paneta. Nai lo lea, o loo faasino atu i le faaumatiaga o tagata amioleaga o loo i le lalolagi, ma mea o loo latou faia.

FAAFITAULI MA MEA LEAGA

Manatu o le Tusi Paia: “Ua toeitiiti lava ona lē toe iai lea o le tagata amioleaga; e te vaai atu i le mea sa iai o ia, ae ua leai lava. A o ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.”—SALAMO 37:10, 11.

LE UIGA: E leʻi aveesea atoatoa e le Lolo i aso Noa le amioleaga. Ina ua uma le Lolo, na toe faia e tagata amioleaga gaoioiga na aafia ai tagata uma. Ua toeitiiti ona faaiʻuina lea e le Atua o le amioleaga. E pei ona taʻua e le faisalamo: ʻO le a lē toe iai le tagata amioleaga.’ O le a aveesea e le Atua le amioleaga e ala i lona Malo, o se faigāmalo e pule mai i le lagi, i tagata amiotonu i le lalolagi.

IA MĀTAU: Pe o le a lagolagoina e i latou o loo pulea le lalolagi i le taimi lenei, le pulega a le Malo o le Atua? Ua faailoa mai e le Tusi Paia, e latou te lē lagolagoina le Malo o le Atua, ae o le a latou teena. (Salamo 2:2) O le ā le iʻuga? O le a suia e le Malo o le Atua faigāmalo uma a tagata, ma “e tumau lea malo e faavavau.” (Tanielu 2:44) Ae aiseā e tatau ai ona faaiʻuina pulega a tagata?

Manatu o le Tusi Paia: “E lē o i le tagata lona ala. E lē o i le tagata foʻi e savali ona faatonuina le mea e ui ai o ia.”—IEREMIA 10:23.

LE UIGA: E leʻi foafoaina tagata ina ia pulea e i latou i latou lava. E lē lelei le auala e latou te pulea ai isi tagata, ma foʻia o latou faafitauli.

IA MĀTAU: Ua taʻua i le tusi o le Britannica Academic, e lē mafai e faigāmalo ona “foʻia faafitauli i le lalolagi aoao, e pei o le mativa, fia ʻai, faamaʻi, mala faalenatura, taua, ma isi faiga sauā.” Ua faapea atili mai: “E . . . talitonu nisi seʻiloga e pulea le lalolagi atoa e se faigāmalo e tasi, ona mafai loa lea ona aveesea na mea leaga.” Peitaʻi e tusa lava pe autasi faigāmalo uma, ae e pulea lava le lalolagi e tagata lē lelei atoatoa, o ē e le mafai ona foʻia faafitauli pei ona taʻua. E na o le Malo o le Atua e iai le mana e aveesea atoatoa ai faafitauli o le lalolagi.

E tusa ai la o le Tusi Paia, o le iʻuga o le lalolagi po o le faiga leaga o mea o loo iai nei, e lē o se mea e tatau ona fefefe ai tagata lelei. Ae o se mea e tatou te tulimataʻia, auā o le a suia e le Atua lenei lalolagi i se lalolagi fou matagofie!

O afea o le a tupu ai lenei mea? O le a faamatala i le mataupu sosoo ai le tali mai i le Tusi Paia.