Pe e mafai ona tatou mautinoa o le a faataunuuina folafolaga uma a le Atua? O le manatu lenā sa mautinoa iai Iesu, ma o ana aʻoaʻoga na atiaʻe ai i ē na faalogologo iā te ia le faatuatua. Seʻi iloilo le faataʻitaʻiga na ia taʻua i lana Lauga i luga o le Mauga, e pei ona faamauina i le Mataio 5:18: “E moni ou te fai atu iā te outou, e faigofie ona mavae atu le lagi ma le lalolagi, ae e faigatā ona mavae atu se mataʻitusi po o sina vaega o le Tulafono, seʻia taunuu mea uma.”

O le mataʻitusi pito i sili ona laʻitiiti i le alafapeta Eperu o le י (yod), ma o le mataʻitusi muamua foʻi lea o le Tetakalamatone po o le suafa paia o le Atua, o Ieova. * E lē gata i upu ma mataʻitusi o loo faamauina i le Tulafono a le Atua, ae na matuā faatāua foʻi e le ʻautusiupu ma le ʻau Faresaio “laina uma o se mataʻitusi.”

Na taʻua e Iesu e sili atu ona faigofie ona mavae atu le lagi ma le lalolagi, ae e faigatā ona lē taunuu se vaega itiiti lava o le Tulafono. Peitaʻi, ua faamautinoa mai i Tusitusiga Paia e tumau e faavavau le lagi ma le lalolagi. (Salamo 78:69) O lea la, o le uiga o lenei fetalaiga e leai se vaega o le Tulafono e oo lava i se vaega pito i sili ona laʻitiiti, o le a lē faataunuuina.

Pe e manatu mamafa Ieova i faamatalaga lāiti? Ioe. O se faaaʻoaʻoga: Sa lē tatau i tagata Isaraelu anamua ona gauia se ivi o le mamoe mo le Paseka. (Esoto 12:46) Atonu o se faamatalaga laʻitiiti lenā. Ae pe na latou malamalama i le māfuaaga sa lē tatau ai ona gauia ivi o le mamoe? Atonu e leai. Peitaʻi, na silafia e Ieova o lenei faamatalaga laʻitiiti e iai se sootaga faavaloaga i le Mesia. E leai se ivi se tasi o le Mesia o le a gauia pe a tutuʻiina o ia i luga o le laau e faapuapuagatia ai.​—Salamo 34:20; Ioane 19:31-33, 36.

O le ā e tatou te aʻoaʻoina mai i le fetalaiga a Iesu? E mafai ona tatou matuā mautinoa o le a faataunuuina folafolaga uma a Ieova le Atua, e oo lava i faamatalaga lāiti. O se faamautinoaga sili lea mai i le mataʻitusi pito i sili ona laʻitiiti i le gagana Eperu.