1, 2. (a) O ā mataupu na laualuga i mafaufau o tagata i taimi o le aposetolo o Paulo, ma aiseā? (e) O ai le Puna o le saʻolotoga moni na faauaʻi i ai e Paulo tagata?

NA MITAMITA tagata i le Emepaea o Roma lea na ola aʻe ai uluaʻi Kerisiano ona o lo latou faasilisilia o tulafono, le faamasinogatonu, ma le saʻolotoga o tagata. Peitaʻi, o le tele o le malosi ma le tulaga mamalu o le Emepaea o Roma, na faalagolago i galuega mamafa a pologa. I se tasi taimi, e pe tusa ma le 30 pasene o ē na nonofo i le Emepaea o Roma o pologa. E lē taumatea na laualuga i mafaufau o tagata lautele e aofia ai ma Kerisiano, mataupu e faatatau i le avea ma pologa ma le saʻolotoga.

² Na tele ina tusi le aposetolo o Paulo e faatatau i le saʻolotoga. Peitaʻi, e leʻi taulaʻi lana faiva i le faaleleia o tulaga o tagata lautele po o faigāmalo, lea na moomoo i ai tagata i lenā taimi. Nai lo o le faalagolago atu i se pule faaletagata po o faalapotopotoga mo le saʻolotoga, na galulue malolosi Paulo ma ona uso Kerisiano e aʻoaʻo isi i le tala lelei o le Malo o le Atua, ma aogā e lē mafaatusalia o le taulaga togiola a Keriso Iesu. Na  faauaʻi atu e Paulo ona uso talitonu i le Puna o le saʻolotoga moni. O se faaaʻoaʻoga, na ia taʻua manino i lana tusi lona lua i Kerisiano i Korinito: “O Ieova o le Agaga; ma o le mea e iai le agaga o Ieova, e iai le saʻolotoga.”​—2 Kori. 3:17.

3, 4. (a) O le ā na taʻua e Paulo i fuaiupu na muamua atu o le 2 Korinito 3:17? (e) O le ā e tatau ona tatou faia ina ia o tatou olioli ai i le saʻolotoga mai iā Ieova?

³ I lana tusi lona lua i Kerisiano i Korinito, na taʻua ai e Paulo le pupula o fofoga o Mose ina ua alu ifo mai i le mauga o Sinai lea na ia tulaʻi ai i luma o se agelu a Ieova. Ina ua iloa atu e tagata Mose, ona fefefe ai lea o i latou ma na ufiufi ai loa e Mose ona foliga. (Eso. 34:29, 30, 33; 2 Kori. 3:7, 13) Peitaʻi na taʻua e Paulo: “Ae afai e liliu atu iā Ieova, ona aveesea lea o le ufiufi.” (2 Kori. 3:16) O le ā le uiga o upu a Paulo?

⁴ E pei ona tatou aʻoaʻoina i le mataupu ua mavae, o Ieova o Lē na foafoaina mea uma lava, e na o ia e iai le saʻolotoga atoatoa ma e leai ni tapulaa o lona saʻolotoga. O lona uiga, e iai le saʻolotoga i luma o Ieova ma “le mea e iai le agaga o Ieova.” E ui i lea, ina ia o tatou olioli i lenā saʻolotoga, e tatau ona tatou “liliu atu iā Ieova” pe ia maua se faiā lelei ma ia. A o iai tagata Isaraelu i le toafa, na faaletino la latou vaaiga i le auala na feutagaʻi ai Ieova ma i latou. Na faamaaa o latou loto ma mafaufau e pei ua ufiufi i se ʻie, ma na mananaʻo e faaaogā lo latou saʻolotoga mai i Aikupito e faamalie ai o latou manaʻoga faaletino.​—Epe. 3:8-10.

5. (a) O le ā le saʻolotoga e maua mai i le agaga o Ieova? (e) E faapefea ona tatou iloa e mafai ona maua e se tasi le saʻolotoga mai iā Ieova e ui i le nofo pologa i le itu faaletino? (i) O ā fesili e ao ona tatou iloiloina?

⁵ O le saʻolotoga lea e maua mai i le agaga o Ieova, e sili atu nai lo o le saʻoloto mai i le nofo pologa i le itu faaletino. E na o le agaga o Ieova e mafai ona tuusaʻoloto ai tagata mai i le nofo pologa i le agasala ma le oti, faapea tapuaʻiga sesē ma mea uma e aofia ai. (Roma 6:23; 8:2) Maʻeu se saʻolotoga matagofie! E mafai lava e se tagata ona olioli i lenā saʻolotoga e tusa lava po o faafalepuipui pe faapologaina. (Kene. 39:20-23) E faamaonia lenei manatu i mea na tutupu i le tuafafine o Nancy Yuen * ma le uso o Harold King, o ē na faafalepuipui mo le tele o tausaga ona o lo la faatuatua. E mafai ona e maimoa a o la faamatala mai mea na tutupu iā i laʻua i luga o le TV i le Initaneti a Molimau a Ieova. (Tagaʻi i le vaega FAATALANOAGA MA MEA NA TUTUPU > ONOSAʻIA O TOFOTOFOGA.) O fesili tāua la: E faapefea ona tatou faatāua lo tatou saʻolotoga? E faapefea ona tatou faaaogā ma le atamai lo tatou saʻolotoga?

6. Na faapefea ona faaalia e tagata Isaraelu le leai o se lototalisapaia mo le saʻolotoga na tuuina atu e Ieova iā i latou?

⁶ Pe a tatou iloa le tāua o se meaalofa taugatā, o le a uunaʻia ai i tatou e faaalia atu le lotofaafetai i lē na aumai ai le meaalofa. E leʻi talisapaia e tagata Isaraelu le saʻolotoga na tuuina atu e Ieova ina ua ia laveaʻiina i latou mai i le nofo pologa i Aikupito. I ni nai masina talu ona laveaʻiina i latou, na toe moomoo i latou i meaʻai na latou maua i Aikupito, faitio i le tausiga a Ieova, ma mananaʻo e toe foʻi i Aikupito. Seʻi mafaufau i ai! Na sili atu lo latou naunau i ʻiʻa, kukama, meleni, liki, aniani ma kaliki,’ nai lo o lo latou saʻolotoga ina ia tapuaʻi i le Atua moni, o Ieova. E lētioa a matuā toʻasā Ieova i ona tagata. (Nu. 11:5, 6, 10; 14:3, 4) O se lesona tāua lenā mo i tatou!

7. Na faapefea ona gaoioi Paulo e tusa ai ma lana fautuaga i le 2 Korinito 6:1, ma e faapefea ona tatou faia foʻi faapea?

 ⁷ Na uunaʻia e le aposetolo o Paulo Kerisiano uma e aua le manatu māmā i le saʻolotoga ua tuuina mai ma le agalelei e Ieova, e ala mai i lona Alo o Iesu Keriso. (Faitau le 2 Korinito 6:1.) Na tigā ma ōia le lotofuatiaifo o Paulo ona o le nofo pologa i le agasala ma le oti. E ui i lea, na ia taʻutino mai ma le lotofaafetai: “Ia faafetaia le Atua ona o lo tatou Alii o Iesu Keriso!” Aiseā? Na ia faamatala atu i ona uso Kerisiano: “Auā ua aumaia e le tulafono a lenā agaga le ola i le autasi ma Keriso Iesu, lea ua faasaʻolotoina ai oe mai i le tulafono a le agasala ma le oti.” (Roma 7:24, 25; 8:2) I le pei o Paulo, e lē tatau foʻi ona tatou manatu māmā i le faasaʻolotoina o i tatou e Ieova mai i le nofo pologa i le agasala ma le oti. E ala i le togiola, ua mafai nei ona tatou auauna iā Ieova ma ni lotofuatiaifo mamā ma maua ai le fiafia.​—Sala. 40:8.

8, 9. (a) O le ā le lapataʻiga a le aposetolo o Peteru e faatatau i le faaaogāina o lo tatou saʻolotoga? (e) O ā luʻi o loo tatou fesagaʻia i aso nei?

⁸ E lē gata i le faaalia o le lototalisapaia, ae e tatau foʻi ona tatou mataala ina neʻi o tatou faaaogā sesē lo tatou saʻolotoga tautele, o le saʻolotoga lea e filifili ai. Na lapataʻi mai le aposetolo o Peteru e faatatau i le faaaogā o lo tatou saʻolotoga e avea ma faamolemolega e faamalie ai tuʻinanauga faaletino. (Faitau le 1 Peteru 2:16.) Pe e lē faamanatu mai e lenei lapataʻiga le mea na tupu i tagata Isaraelu i le toafa? O loo iai pea lenei lamatiaga i aso nei ae ua sili atu ona faateteleina. Ua ofo mai e Satani ma lana lalolagi le tele o mea faatosina e tatou te filifili ai e tusa ai o laʻei ma teuga, o meaʻai ma meainu, faigāmālōlōga ma faafiafiaga, ma le tele o isi mea. O ē e atamamai i faasalalauga faapisinisi, e masani ona latou faaaogā ni tagata foliga aulelei e faaauiluma ai a latou oloa ma faapea mai e tatou te manaʻomia moni na oloa, ae o le mea moni e leai. Pagā le faigofie ona tatou lolo atu i na mailei ma faaaogā sesē ai lo tatou saʻolotoga!

⁹ O le fautuaga a Peteru e faatatau atu foʻi i vala tāua o le olaga e pei o le filifiliga a se tasi i aʻoaʻoga ma galuega. O se faataʻitaʻiga, ua matuā uunaʻia talavou i aso nei ina ia auai i iunivesite e sili ona lelei. Ua faatalitonuina i latou e faapea o le maualuluga o aʻoaʻoga a se tasi e iʻu atu ai i le mauaina o ni galuega taualoa, ma e masani ona saunia mai faamaumauga o le eseesega o totogi o i latou na faauu mai i iunivesite, ma ē e leʻi oo i ni iunivesite. E ono avea nei mea ma faatosinaga mo talavou, a o feagai ma nei filifiliga e mafai ona aafia ai o latou olaga atoa. O le ā e tatau ona manatua e talavou ma o latou mātua?

10. O le ā e tatau ona tatou manatua pe a faaaogā lo tatou saʻolotoga e faia ai filifiliga e fitoitonu iā i tatou lava?

¹⁰ Talu ai o filifiliga e faatatau i nei mataupu e fai e le tagata lava ia, ua manatu nisi e latou te saʻoloto e filifili le mea e talafeagai ma o latou lotofuatiaifo. Atonu o loo latou manatua upu a Paulo i Kerisiano i Korinito e faatatau i meaʻai: “Aiseā e faamasinoina ai fua loʻu saʻolotoga e le lotofuatiaifo o le isi tagata?” (1 Kori. 10:29) E moni ua tatou maua le saʻolotoga e faia ai filifiliga e fitoitonu iā i tatou lava e pei o aʻoaʻoga ma galuega, ae e tatau ona tatou manatua e faatapulaa lo tatou saʻolotoga ma e iai āuga o a tatou filifiliga uma. O le māfuaaga lea na amata ai le faamatalaga a Paulo i le faapea atu: “E taga mea uma lava; ae e lē o mea uma e aogā. E taga mea uma lava; ae e lē o mea uma e atiaʻe ai.” (1 Kori. 10:23) E fesoasoani lenā manatu e tatou te iloa ai e iai mataupu e sili atu ona tāua nai lo o mea e tatou te mananaʻo i ai, e tusa ai ma le faaaogāina  o lo tatou lava saʻolotoga i vala uma o le olaga.

11. O le ā le māfuaaga ua tuusaʻoloto ai i tatou e Ieova?

¹¹ Na taʻua foʻi e Peteru le māfuaaga na ia lapataʻia ai i tatou e faatatau i le faaaogā sesē o le saʻolotoga. Na ia uunaʻia i tatou ina ia faaaogā lo tatou saʻolotoga e avea ai o “ni pologa a le Atua.” O lea, o le māfuaaga autū ua tuusaʻoloto ai i tatou e Ieova e ala iā Iesu mai i le tulafono a le agasala ma le oti, ina ia mafai ai ona tatou ola o “ni pologa a le Atua.”

12. O le ā le lesona e tatou te aʻoaʻoina mai i le faaaʻoaʻoga a Noa ma lona aiga?

¹² O le auala sili e tatou te ʻalofia ai le faaaogā sesē o lo tatou saʻolotoga ma toe nofo pologa ai i sini ma tuʻinanauga o le lalolagi, o le uaʻi atoatoa atu lea i mea faaleagaga. (Kala. 5:16) Seʻi mātau le faaaʻoaʻoga a le augātamā o Noa ma lona aiga. Na ola aʻe i latou i se lalolagi na tumu i le sauā ma faiga lē mamā. E ui i lea, na faaauau pea ona lē aafia i latou i tuʻinanauga ma gaoioiga a tagata na siʻomia ai i latou. Aiseā? Na latou pisi e faia mea uma na poloaʻia ai i latou e Ieova e pei o le fausia o le vaa, faaputu meaʻai mo i latou ma manu, ma faailoa atu le lapataʻiga i isi. “Ua faia e Noa mea uma lava e pei ona poloaʻi mai ai le Atua iā te ia. Ua faapea lava ona ia faia.” (Kene. 6:22) O le ā na iʻu i ai? Na faasaoina Noa ma lona aiga ina ua faaumatia lenā lalolagi.​—Epe. 11:7.

13. O le ā le tofiga na maua e Iesu lea na ia tuuina mai i ona soo?

¹³ O le ā ua poloaʻia i tatou e Ieova e fai i aso nei? I le avea ai ma soo o Iesu, ua tatou malamalama lelei i lo tatou tofiga mai i le Atua. (Faitau le Luka 4:18, 19.) O le toʻatele o tagata i aso nei ua faatauasoina e le atua o lenei faiga o mea ma o loo nofo pologa i faiga faalotu, le tamaoaiga, ma tulaga aloaʻia o lenei lalolagi. (2 Kori. 4:4) O se faaeaga mo i tatou le mulimuli i le faaaʻoaʻoga a Iesu, o le fesoasoani lea i tagata ia o latou iloa Ieova le Atua o le saʻolotoga  ma tapuaʻi iā te Ia. (Mata. 28:19, 20) E lē faigofie lenei galuega ma e tele luʻi e aofia ai. I nisi o atunuu, ua faasolo ina lē ano mai tagata ma o nisi e matuā feita mai. E tatau iā i tatou taʻitoʻatasi ona fesili ifo, ʻPe e mafai ona ou faaaogā loʻu saʻolotoga e lagolago atili ai le galuega o le Malo?’

14, 15. O le ā le tali mai a tagata o Ieova e tusa ai ma le galuega talaʻi? (Tagaʻi i ata i luga aʻe o le matua.)

¹⁴ O se mea e faalaeiauina ai ona ua iloa e le toʻatele le faanatinati o le taimi ua tatou ola ai, ma ua faafaigofie o latou olaga ina ia faia ai so latou sao i le faiva faataimi atoa. (1 Kori. 9:19, 23) O nisi o i latou o loo galulue i oganuu i o latou lava vaipanoa, ae o isi ua siitia atu i le mea o loo tele ai le manaʻoga. Ua faaalia mai i faamaumauga le faatupulaʻia o paeonia sauatoa i le lima tausaga ua teʻa lea ua silia ma le 1,100,000, ma e sili atu ma le 250,000 ua faaopoopo i le ʻautalaʻi faataimi atoa. Maʻeu se iʻuga mataʻina o le faaaogāina ma le atamai o le saʻolotoga e auauna ai iā Ieova!​—Sala. 110:3.

¹⁵ O le ā na fesoasoani i nei uso ma tuafāfine ina ia faaaogā ai ma le atamai lo latou saʻolotoga? Seʻi manatu iā John ma Judith o ē ua silia i le 30 tausaga o auauna i le tele o atunuu. E la te manatua le taimi na amata ai le Aʻoga mo le Auaunaga Paeonia i le 1977, lea na faamamafa ai le lotomalilie e siitia atu e auauna i le mea o loo tele ai le manaʻoga. Ua faapea mai John e tele taimi na suia ai ana galuega ina ia faaauau ai ona la ola i se olaga faigofie, ma taulaʻi atu ai pea i lo la sini. Mulimuli ane ina ua la taunuu i se isi atunuu, na la iloa ai o le tatalo iā Ieova ma faalagolago iā te ia na fesoasoani iā i laʻua e fesagaʻia ai luʻi e pei o le aʻoaʻoina o se gagana fou, ma le faamasani i se aganuu fou ma le suiga o le tau. O ā ni o la lagona e faatatau i na tausaga o la laʻua auaunaga? Ua faapea mai John: “O le galuega sili lea ua ou tofo i ai. Ua ou iloa lelei ai Ieova, e pei o se tamā alofa. O lea ua ou malamalama atili ai i le uiga o le Iakopo 4:8: ʻIa outou mafuta vavalalata atu i le Atua, ona mafuta vavalalata mai lea o ia iā te outou.’ Ua ou mauaina le mea na ou saʻilia, o se olaga e faamalieina ai.”

16. Na faapefea ona faaaogā ma le atamai e le faitau afe o uso ma tuafāfine lo latou saʻolotoga?

¹⁶ E ese mai i le tulaga o John ma Judith, o nisi ua mafai ona auauna faataimi atoa mo se taimi puupuu ona o o latou tulaga. E ui i lea, e toʻatele ua latou faaaogā le avanoa e tauofo ai i galuega faufale o le Malo i le lalolagi aoao. O se faataʻitaʻiga, ina ua fausia le ofisa ulu i Warwick i Niu Ioka, e pe tusa ma le 27,000 uso ma tuafāfine na tauofo atu e galulue ai i le va o le lua vaiaso seʻia oo i le tausaga pe sili atu foʻi. O le toʻatele o i latou na faataulaga lo latou taimi ina ia auai ai i lenā galuega. Maʻeu se faaaʻoaʻoga matagofie o le faaaogāina o lo latou saʻolotoga mai i le Atua e viia ma faamamaluina ai Ieova, le Atua o le saʻolotoga!

17. O le ā le lumanaʻi matagofie o loo tulimataʻia e ē o loo faaaogā ma le atamai lo latou saʻolotoga mai i le Atua?

¹⁷ E tatou te lotofaafetai ona ua tatou iloa Ieova ma olioli i le saʻolotoga e maua mai i le tapuaʻiga moni. Tau ina ia faailoa i a tatou filifiliga o loo tatou faatāua lo tatou saʻolotoga. Nai lo o le faaaluvale pe faaaogā sesē lo tatou saʻolotoga, ia faaaogā e auauna ai iā Ieova i le mea sili e tatou te mafai. O le faia faapea, o le a mafai ai ona tatou tulimataʻia faamanuiaga ua folafola mai e Ieova pe a faataunuuina le valoaga lenei: ʻO le a saʻoloto le foafoaga mai i le faapologaina i mea leaga, ma maua ai le saʻolotoga mamalu o le fanau a le Atua.’​—Roma 8:21.