1. O le ā le auala e te atiaʻeina ai se faauōga māfana ma se tasi?

E MASANI lava, o le vala muamua i le atiaʻeina o se faauōga māfana ma se tasi e te feiloaʻi i ai, o le faaalu o le taimi e faifaimea faatasi ai ma lenā tagata. E avea oulua ma uō pe a talanoa, faasoa manatu ma mea na tutupu i o oulua olaga. Peitaʻi, e iai luʻi e tatou te fesagaʻia pe a tatou atiaʻeina se faauōga māfana ma Iesu. O ā nisi o na luʻi?

2. O le ā le luʻi muamua o loo feagai ma i tatou?

² O le luʻi muamua, e tatou te leʻi feiloaʻi iā Iesu. E toʻatele Kerisiano i le uluaʻi senituri na feagai ma lenā luʻi. Na taʻua e le aposetolo o Peteru: “E ui e tou te leʻi vāai lava iā te ia, a ua outou alolofa iā te ia. E ui e tou te lē o vāai atu iā te ia i le taimi nei, ae ua outou faatuatua iā te ia.” (1 Pete. 1:8) E mafai la ona iai sa tatou faiā māfana ma Iesu, e ui e tatou te leʻi feiloaʻi iā te ia.

3. O le ā le luʻi lona lua o loo feagai ma i tatou?

³ O le luʻi lona lua, e lē mafai ona tatou talanoa iā Iesu. Pe a tatou tatalo, e tatou te talanoa tuusaʻo iā Ieova. E moni e tatou te tatalo e ala i le suafa o Iesu, ae e tatou te lē talanoa tuusaʻo iā te ia. E lē finagalo Iesu e tatou te tatalo atu iā te ia. Aiseā? Talu ai o le tatalo o se vaega o le tapuaʻiga, ma e na o Ieova e tatau ona tapuaʻi i ai. (Mata. 4:10) E ui i lea tulaga, ae e mafai ona faaalia atu lo tatou alofa mo Iesu.

4. O le ā le luʻi lona tolu, ma o ā mea o le a talanoaina i lenei suʻesuʻega?

 ⁴ O le luʻi lona tolu, e afio Iesu i le lagi, e lē mafai la ona tatou faifaimea faatasi ma ia. Peitaʻi, e tele mea e mafai ona tatou iloa e faatatau iā Iesu e aunoa ma lo tatou faifaimea faatasi ma ia. O le a tatou talanoaina ni vala se fā e mafai ona tatou faia e faamalosia ai la tatou faauōga ma Iesu. Ae muamua, seʻi o tatou iloilo le māfuaaga e tāua ai mo i tatou ona atiaʻeina se faauōga māfana ma Keriso.

5. Aiseā e tatau ai ona avea Iesu ma a tatou uō? (Tagaʻi foʻi i le pusa “ O le Faauō ma Iesu e Mafai ai Ona Avea ma Uō a Ieova” ma le “ Ia Saʻo la Tatou Vaaiga i le Tulaga o Iesu.”)

⁵ E tatau ona avea Iesu ma a tatou uō pe afai e tatou te mananaʻo ia lelei la tatou faiā ma Ieova. Aiseā e moni ai lenā manatu? Seʻi manatu i māfuaaga nei e lua. Muamua, na fetalai Iesu i ona aposetolo: “E alofa faapelepele le Tamā iā te outou, ona ua outou alolofa faapelepele mai iā te aʻu.” (Ioa. 16:27) Na ia faapea atili mai: “E leai se tasi e alu atu i le Tamā pe a lē ui mai iā te aʻu.” (Ioa. 14:6) O le taumafai e avea ma uō a Ieova e aunoa ma le avea ma uō a Iesu, e pei o se tagata o loo taumafai e alu i totonu o se fale e aunoa ma le ui atu i le faitotoʻa. Na faaaogāina e Iesu se talafaatusa talitutusa, ina ua ia fetalai mai, o ia “o le faitotoʻa o mamoe.” (Ioa. 10:7) O le māfuaaga lona lua, ona e atoatoa le auala na faaaʻoaʻo ai Iesu i uiga o lona Tamā. Na ia fetalai atu i ona soo: “O lē ua vaai mai iā te aʻu, ua vaai foʻi o ia i le Tamā.” (Ioa. 14:9) O lea o le auala autū e tatou te iloa lelei ai Ieova, o le suʻesuʻeina lea o le olaga o Iesu. A o tatou aʻoaʻoina le olaga o Iesu, o le a faatuputeleina ai lo tatou alofa māfana mo ia. A o faamalosia  la tatou faauōga ma Iesu, o le a faalolotoina ai foʻi lo tatou alofa mo lona Tamā.

6. O le ā le isi māfuaaga e tatau ai ona iai se faiā ma Iesu? Ia faamatala.

⁶ E tatau ona iai sa tatou faiā ma Iesu ina ia taliina ai a tatou tatalo. O lona uiga e iai nisi gaoioiga e tatau ona tatou faia nai lo o le tau ina faapea atu, “e ala i le suafa o Iesu” i faaiʻuga o a tatou tatalo. E tatau ona tatou iloa le auala e faaaogā ai e Ieova Iesu i le taliina o a tatou tatalo. Na fetalai atu Iesu i le ʻauaposetolo: “O so o se mea foʻi e tou te talosaga atu ai i loʻu igoa, ou te faia lava.” (Ioa. 14:13) E ui e faafofogaina ma tali e Ieova a tatou tatalo, ae ua ia tuuina atu iā Iesu le pule e faataunuu ai Ana faaiʻuga. (Mata. 28:18) O lea, a o leʻi taliina e le Atua a tatou tatalo, e na te silasila mai po ua tatou faatatauina le fautuaga a Iesu. O se faaaʻoaʻoga, na fetalai Iesu: “Afai tou te faamagaloina mea sesē e fai mai e tagata, ona faamagaloina foʻi lea o outou e lo outou Tamā o i le lagi. Ae afai tou te lē faamagaloina mea sesē e fai mai e tagata, e lē faamagaloina foʻi e lo outou Tamā a outou mea sesē.” (Mata. 6:14, 15) Maʻeu le tāua o lo tatou feutagaʻi ma isi i se auala agalelei, e pei ona feutagaʻi o Ieova ma Iesu ma i tatou!

7. O ai e mauaina aogā mai i le taulaga togiola a Iesu?

⁷ E na o i latou e māfana la latou faauōga ma Iesu, o le a maua aogā mai i lana taulaga togiola. E faapefea ona tatou iloa? Na fetalai Iesu o le a ʻfoaʻiina lona ola mo ana uō.’ (Ioa. 15:13) O tagata faamaoni na soifua a o leʻi afio mai Iesu i le lalolagi, e tatau ona aʻoaʻoina i latou ia iloa ma alolofa iā Iesu. O le a toetutū mai na tane ma fafine e pei o Aperaamo, Sara, Mose ma Raava. E oo foʻi i nei auauna amiotonu a Ieova, e tatau ona latou atiaʻe se faauōga ma Iesu ina ia maua ai le ola e faavavau.​—Ioa. 17:3; Galu. 24:15; Epe. 11:8-12, 24-26, 31.

8-9. E pei ona faamatalaina i le Ioane 15:4, 5, o le ā ua mafai ona tatou faia ona o la tatou faiā ma Iesu, ma aiseā e tāua ai?

⁸ Ua tatou olioli e galulue faatasi ma Iesu i le talaʻia ma le aʻoaʻo atu o le tala lelei o le Malo. Na avea Iesu ma faiaʻoga a o iai i le lalolagi. Ae na avea Iesu ma ulu o le faapotopotoga ina ua toe foʻi i le lagi, talu mai lenā taimi, o loo faaauau pea ona ia taʻitaʻia le galuega talaʻi ma le aʻoaʻo atu. E silafia ma talisapaia e Iesu a outou taumafaiga e fesoasoani i le tele o tagata e mafai ai, ina ia latou iloa o ia ma lona Tamā. O le mea moni, ana leai le fesoasoani a Ieova ma Iesu e lē mafai ona tatou faataunuuina lenei galuega.​—Faitau le Ioane 15:4, 5.

⁹ O loo manino le aʻoaʻoina i le Afioga a le Atua le tatau ona iā i tatou o le alofa mo Iesu ma faatumauina pea lenā alofa, ina ia faafiafiaina ai Ieova. O lea, seʻi o tatou iloilo ni vala se fā e tatou te faia ina ia avea ai ma uō a Iesu.

10. O le ā le vala muamua e atiaʻeina ai se faauōga ma Iesu?

¹⁰ (1) Ia iloa lelei Iesu. E tatou te iloa lelei Iesu pe a faitau i tusi o Mataio, Mareko, Luka ma Ioane. Pe a tatou manatunatu loloto i le olaga o Iesu o loo tusia i nei tusi, o le a atiaʻe ai lo tatou alofa ma le faaaloalo mo Iesu, ona o le agalelei o le auala na ia feutagaʻi ai ma tagata. O se faaaʻoaʻoga, e leʻi feutagaʻi Iesu ma ona soo e pei o ni pologa, e ui o ia o lo latou Matai. Nai lo o lea, na ia faailoa atu iā i latou ona manatu ma ona faalogona. (Ioa. 15:15) Ina ua faanoanoa ma fetagisi ona soo, na faanoanoa foʻi ma tagi faatasi Iesu ma i  latou. (Ioa. 11:32-36) E oo foʻi i ona fili, na latou taʻutino mai na avea Iesu ma uō a ē na talia lana feʻau. (Mata. 11:19) O lo tatou faaaʻoaʻo i le auala na feutagaʻi ai Iesu ma ona soo, o le a faaleleia ai la tatou faiā ma isi, faateleina ai le lotomalie ma le fiafia, ma o le a faateleina ai foʻi lo tatou talisapaia o Keriso.

11. O le ā le vala lona lua e avea ai ma uō a Iesu, ma aiseā e tāua ai lenā vala?

¹¹ (2) Faaaʻoaʻo i le auala e mafaufau ma gaoioi ai Iesu. O le tele e tatou te iloa ai Iesu ma faaaʻoaʻo i le auala e mafaufau ai, o le māfana foʻi lenā o la tatou faiā ma ia. (1 Kori. 2:16) E faapefea ona tatou faaaʻoaʻo iā Iesu? Seʻi mātau le faaaʻoaʻoga lenei, na faamuamua e Iesu lona fesoasoani i manaʻoga o tagata nai lo o le faafiafiaina o ia. (Mata. 20:28; Roma 15:1-3) Talu ai sa iā Iesu lenā uiga, na mafai ai la ona iā te ia le agaga faataulaga ma le lotofaamagalo. E leʻi itaitagofie Iesu i tala a tagata e faatatau iā te ia. (Ioa. 1:46, 47) E leʻi manatu foʻi Iesu e lē mafai ona suia uiga o tagata na faia mea sesē i taimi ua teʻa. (1 Timo. 1:12-14) Na fetalai Iesu: “E iloa ai e tagata uma o oʻu soo outou, pe afai ua outou alolofa o le tasi i le isi.” (Ioa. 13:35) Aiseā e te lē fesili ane ai, “Po o oʻu faaaʻoaʻo iā Iesu i le faia o mea uma ou te mafaia, e tausia ai le filemu ma oʻu uso ma tuafāfine?”

12. O le ā le vala lona tolu e avea ai ma uō a Iesu, ma e faapefea ona tatou faatinoina lenā vala?

¹² (3) Ia lagolagosua i uso o Keriso. E silasila Iesu i la tatou lagolagosua mo ona uso faauuina, e pei o loo tatou faia iā te ia. (Mata. 25:34-40) O le auala autū e tatou te lagolagosua ai i uso faauuina, o le faia o se sao atoatoa i le galuega talaʻi o le Malo ma le faia o isi ma soo, e pei ona faatonuina e Iesu ona soo e fai. (Mata. 28:19, 20; Galu. 10:42) E na o le fesoasoani a “isi mamoe,” ua mafai ai e uso o Keriso ona faataunuuina le galuega talaʻi o loo faia nei i le lalolagi aoao. (Ioa. 10:16) Pe afai o oe o se tasi o isi mamoe, o taimi uma e fai ai sou sao i le galuega talaʻi, ua e faaalia ai lou alofa ma lou lagolagosua i le ʻaufaauuina ma Iesu.

13. E faapefea ona tatou faatatauina le fautuaga a Iesu o loo i le Luka 16:9?

¹³ E tatou te faauō foʻi iā Ieova ma Iesu e ala i a tatou foaʻi tauofo e lagolagosua ai le galuega o loo la taʻitaʻia. (Faitau le Luka 16:9.) O se faaaʻoaʻoga, e mafai ona fai a tatou foaʻi tauofo e lagolagoina ai le galuega i le lalolagi aoao. O nei foaʻi tauofo e faatupeina ai le talaʻia o le tala lelei i vaipanoa maotua, le fausiaina ma le tausiaina o maota o loo faia ai le tapuaʻiga moni, ma saunia ai fesoasoani mo i latou e aafia i mala faalenatura. E mafai foʻi ona tatou faia foaʻi tauofo mo a tatou faapotopotoga ma avatu le fesoasoani i ē o loo tatou iloa e manaʻomia. (Faata. 19:17) O nei auala e tatou te lagolagosua ai i uso o Keriso.

14. O le ā le vala lona fā e avea ai ma uō a Iesu, e pei ona aumaia i le Efeso 4:15, 16?

¹⁴ (4) Ia lagolagosua i faatulagaga a le faapotopotoga Kerisiano. E faamalosia la tatou faauōga ma Iesu le ulu o le faapotopotoga, pe a tatou galulue faatasi ma i latou ua tofia e tausia i tatou. (Faitau le Efeso 4:15, 16.) O se faaaʻoaʻoga, o loo tatou taumafai e faamautinoa e faaaogā lelei Maota mo Sauniga. O lea ua tuufaatasi ai nisi faapotopotoga, ma ua toe fetuunaʻi oganuu e talaʻi ai. O lenei faatulagaga, ua mafai ai e le faalapotopotoga ona sefe foaʻi tauofo a uso ma tuafāfine. Ona o lenei tulaga, e manaʻomia ai e nisi o le ʻautalaʻi ona faamasani i na suiga fou. Atonu o nei tagata talaʻi faamaoni na auauna i se  faapotopotoga mo le tele o tausaga, ma ua māfana la latou mafutaga ma uso ma tuafāfine i ina. Ae o lea ua tofia i latou e auauna i se isi faapotopotoga. Maʻeu le fiafia o Iesu i lona silasila mai o loo lagolagoina e nei soo faamaoni lenei faatulagaga!

15. E faapefea ona atili māfana la tatou faauōga ma Iesu i le lumanaʻi?

¹⁵ O i latou ua faauuina e le agaga paia, ua faamoemoe e ola faatasi ma Iesu e faavavau ma pule faatasi ma ia i le Malo o le Atua. O le a latou faatasi ma Keriso, o le a latou vāai iā te ia, talatalanoa ma faifaimea faatasi ma ia. (Ioa. 14:2, 3) O i latou e faamoemoe e ola i le lalolagi o le a latou maua le alofa o Iesu ma o le a ia uaʻi atu iā i latou. E ui o le a lē mafai ona latou vāai iā Iesu, ae o le a atili māfana la latou faauōga ma ia a o olioli i le olaga ua saunia e Ieova ma Iesu mo i latou.​—Isa. 9:6, 7.

16. O ā faamanuiaga ua tatou maua mai i la tatou faauōga ma Iesu?

¹⁶ E tatou te maua faamanuiaga e tele pe a tatou taliaina le valaaulia a Iesu e avea ma ana uō. O se faaaʻoaʻoga, e tatou te tofo i aogā o le alofa ma le lagolagosua o Iesu i le taimi lenei. Ua tuuina mai iā i tatou le avanoa e ola ai e faavavau. Ae e sili atu, o la tatou faauōga ma Iesu o le a tatou maua ai le oloa e sili ona tāua, o se faiā vavalalata ma māfana ma Ieova le Tamā o Iesu. Maʻeu se faaeaga o le avea o i tatou ma uō a Iesu!