E ui lava i lenā, e finagalo Ieova e tatou te faatalitali ma le onosaʻi i lana taimi atofaina e gaoioi ai. Aiseā e finagalo ai Ieova e tatou te faia faapea? O le ā e fesoasoani iā i tatou e maua ai le fiafia a o tatou faatalitali?

AISEĀ E FINAGALO AI IEOVA IA TATOU FAATALITALI?

Ua faapea mai le Tusi Paia: “O le a faatalitali pea ma le onosaʻi Ieova ina ia agalelei atu iā te outou, o le a tulaʻi foʻi o ia ina ia alofa mutimutivale iā te outou. Auā o Ieova o le Atua e faamasinotonu. E fiafia i latou uma o ē e faatalitali iā te ia.” (Isa. 30:18) Na patino upu a Isaia i tagata Iutaia lotomaaa. (Isa. 30:1) Ae na iai nisi o tagata Iutaia faamaoni, na latou maua le faamoemoe mai i nei upu. Ua maua foʻi e auauna faamaoni a Ieova i aso nei le faamoemoe mai i na lava upu.

O lea la, e tatau ona tatou faatalitali ma le onosaʻi, auā o loo faatalitali foʻi ma le onosaʻi Ieova. Ua iai lana taimi atofaina e faaoo mai ai le iʻuga o lenei faiga o mea, ma o loo ia faatalitali i le aso ma le itula e oo mai ai. (Mata. 24:36) I lenā taimi, o le a matuā faamaonia ai le sesē o tuuaʻiga a le Tiapolo faasaga iā Ieova ma Ana auauna. O le a tafiesea e Ieova Satani ma so o se tasi e ʻau faatasi ma ia, ae o le a Ia ʻalofa mutimutivale mai iā i tatou.’

E ui e lē aveesea e Ieova o tatou faafitauli i le taimi nei, ae ua ia faamautinoa mai e mafai ona tatou fiafia a o tatou faatalitali atu iā te ia. E pei ona taʻua e Isaia, e mafai ona tatou fiafia a o tatou naunau pe faamoemoe mo se mea lelei o le a tupu. (Isa. 30:18) E faapefea ona tatou maua lenā fiafia? E fā vala e mafai ona fesoasoani iā i tatou.

E FAAPEFEA ONA MAUA LE FIAFIA A O FAATALITALI?

Ia taulaʻi i mea lelei o loo tutupu i lou olaga. E tele mea leaga na vaaia e le tupu o Tavita i lona olaga atoa. (Sala. 37:35) Peitaʻi na ia tusi: “Ia filemu pea i luma o Ieova ma ia matuā faatalitali atu iā te ia. Aua neʻi e tigā ona o le tagata o loo taulau i le faataunuuina o ana faufauga.” (Sala. 37:7) Na faatatau e Tavita lenā fautuaga, e ala i le uaʻi atu i lona faamoemoe i le faaolataga. Na ia mātauina foʻi faamanuiaga uma na ia maua mai iā Ieova. (Sala. 40:5) Pe a  tatou uaʻi atu i mea lelei nai lo o mea lē lelei o loo tutupu, o le a faigofie foʻi ona tatou faatalitali iā Ieova.

Ia faaaogā so o se avanoa e vivii ai iā Ieova. E foliga mai o Tavita na tusia le Salamo e 71, ma na ia faapea atu iā Ieova: “Ou te faatalitali atu pea; ou te faaopoopo atu i ou viiga.” (Sala. 71:14) Na faapefea ona ia vivii atu iā Ieova? Na ia talanoa atu i isi e faatatau iā Ieova ma usu pese o viiga iā te Ia. (Sala. 71:​16, 23) I le pei o Tavita, e mafai ona tatou maua le olioli a o tatou faatalitali iā Ieova. E tatou te vivii atu iā te ia e ala i le talaʻiga, talanoaga i aso faisoo, ma le usuina o pese o viiga. Pe a e toe usuina pese o viiga, aiseā e te lē mafaufau loloto ai i le feʻau faamāfanafanaloto o loo aumaia ai?

Ia maua faalaeiauga mai i uso ma tuafāfine. Ina ua feagai Tavita ma luʻi, na ia faapea atu iā Ieova: “I luma o ē e faamaoni iā te oe, ou te faamoemoe i lou suafa.” (Sala. 52:9) E mafai ona tatou maua faalaeiauga mai i o tatou uso tapuaʻi faamaoni i taimi o sauniga, talaʻiga, faapea foʻi faatasitasiga faasamasamanoa.—Roma 1:​11, 12.

Ia faamalosia lou faamoemoe. Ua faapea mai le Salamo 62:5: “Ou te faatalitali ma le filemu i le Atua, auā e mai iā te ia loʻu faamoemoe.” E tāua lo tatou matuā mautinoa i lo tatou faamoemoe, aemaise pe afai e lē vave ona oo mai le iʻuga o lenei faiga o mea nai lo o le mea na tatou faatalitalia. E tatau ona tatou mautinoa e taunuu moni folafolaga a Ieova, e tusa po o le ā le umi e tatou te faatalitali ai. E mafai ona faamalosia lo tatou faamoemoe e ala i le suʻesuʻeina o le Afioga a le Atua, e aofia ai valoaga, le autasi o manatu o loo iai, ma faamatalaga ua faailoa mai e Ieova e faatatau iā te ia. (Sala. 1:​2, 3) E manaʻomia foʻi ona faaauau ona tatou “tatalo i le taʻitaʻiga a le agaga paia,” ina ia faatumauina ai la tatou faiā lelei ma Ieova, a o tatou faatalitali i le faataunuuina o lana folafolaga o le ola e faavavau.—Iuta 20, 21.

I le pei o le tupu o Tavita, ia tatou mautinoa o loo silasila mai Ieova i ē o loo faatalitali iā te ia, ma e na te faailoa mai Lona alofa faamaoni iā i latou. (Sala. 33:​18, 22) Ia faaauau pea ona tatou faatalitali ma le onosaʻi iā Ieova, e ala i le taulaʻi atu i mea lelei o loo tutupu i o tatou olaga, vivii atu iā te ia, maua faalaeiauga mai i o tatou uso tapuaʻi, ma faamalosia pea lo tatou faamoemoe tautele.