1-2. (a) O le ā le aafiaga o le feʻau o loo i le Isaia 41:10 i le tuafafine o Yoshiko? (e) O ai e mafai ona mauaina aogā mai i le feʻau a Ieova o loo i le Isaia 41:10?

NA MAUA e se tuafafine faamaoni e igoa iā Yoshiko se tala faanoanoa. Na faailoa i ai e lana fomaʻi e lē o toe tele ni masina o totoe o lona ola. O le ā le auala na ia tali atu ai? Na manatua e Yoshiko le mau e fiafia ai, o le Isaia 41:10. (Faitau.) Na toʻa o ia ma fai i le fomaʻi, e lē fefe ona o loo uuina e Ieova lona lima. * O le feʻau faamāfanafana o loo i lenā mau, na fesoasoani i lo tatou tuafafine pele ina ia maufaatuatuaina atoatoa ai Ieova. E mafai foʻi ona fesoasoani iā i tatou e toʻafilemu ai pea pe a feagai ma tofotofoga faigatā. Ina ia malamalama i le uiga o lenā manatu, seʻi o tatou iloiloina muamua le māfuaaga na avatu ai e Ieova lenā feʻau iā Isaia.

² I le taimi muamua, na faagaeeina e Ieova Isaia e tusia nei upu ina ia faamāfanafanaina ai tagata o Iuta o le a faaaunuua i Papelonia. Peitaʻi, na faasaoina e Ieova lenā feʻau e lē gata mo tagata o Iuta na faaaunuua, ae faapea foʻi isi ana auauna na soifua talu mai lenā taimi. (Isa. 40:8; Roma 15:4) I aso nei, ua tatou ola i “aso e sili ona faigatā,” ma ua sili atu ona tatou manaʻomia faalaeiauga o loo maua i le tusi o Isaia.​—2 Timo. 3:1.

3. (a) O ā folafolaga o loo maua i le Isaia 41:10? (e) Aiseā e tatou te manaʻomia ai faamautinoaga o loo aumaia i nei folafolaga?

³ I lenei mataupu, o le a taulaʻi atu i folafolaga e tolu a Ieova e fesoasoani e faamalosia ai lo tatou faatuatua, lea o loo i le Isaia 41:10, le mau o le tausaga mo le 2019: (1) E faatasi  Ieova ma i tatou, (2) o ia o lo tatou Atua, ma le (3) o le a ia fesoasoani mai iā i tatou. E pei o Yoshiko, e tatou te manaʻomia nei faamautinoaga * ona e tatou te feagai foʻi ma faigatā. E tatou te feagai foʻi ma faafitauli mai i lenei lalolagi leaga. O nisi o i tatou o loo onosaia sauāga mai i faigāmalo malolosi. O lea, seʻi o tatou iloiloina nei faamautinoaga.

4. (a) O le ā le faamautinoaga muamua o le a tatou iloiloina? (Tagaʻi foʻi i le faaopoopoga i lalo.) (e) O ā faalogona o Ieova e faatatau iā i tatou? (i) O le ā se aafiaga o lou iloa o faalogona o Ieova e faatatau iā te oe?

⁴ O le faamautinoaga muamua lenei a Ieova: “Aua e te fefe, auā ou te faatasi ma oe.” * Ua faailoa mai e Ieova lona faatasi ma i tatou, e ala i le uaʻi atoatoa mai iā i tatou ma alofa faapelepele mai. Seʻi mātau le auala ua faailoa mai ai ona faalogona loloto ma māfana e faatatau iā i tatou. Na fetalai Ieova, “Ua pele oe iā te aʻu, ua taʻua oe e mamalu, ma ua ou alofa iā te oe.” (Isa. 43:4) E matuā leai lava se mea e mafai ona aveesea le alofa o Ieova mai iā i latou o loo auauna iā te ia; e lē maluelue foʻi lona faamaoni iā i tatou. (Isa. 54:10) O lona alofa ma lana faauōga e tatou te maua ai le lototele. O le a ia puipuia i tatou e pei ona ia faia i lana uō o Aperamo (Aperaamo). Na ia fetalai: “Aperamo e, aua e te fefe. O aʻu o lou talita.”​—Kene. 15:1.

5-6. (a) E faapefea ona tatou iloa e naunau Ieova e fesoasoani mai pe a tatou feagai ma faafitauli? (e) O le ā le lesona e tatou te aʻoaʻoina mai i le faaaʻoaʻoga a Yoshiko?

⁵ E tatou te iloa e naunau Ieova e fesoasoani mai pe a tatou feagai ma faafitauli, auā na ia folafola mai i ana auauna: “O le a ou faatasi ma oe pe a e sopoʻia vai; ma pe a e sopoʻia vaitafe, e lē lofia ai oe. Pe a e savali i le afi, e te lē mū ai pe susunuina oe i le mumū o le afi.” (Isa. 43:2) O le ā le uiga o na upu?

⁶ E leʻi folafola mai e Ieova o le a ia aveesea faafitauli faigatā o le olaga. Peitaʻi, e na te lē faatagaina na faafitauli e pei o ni  “vaitafe” e lofia ai i tatou, po o tofotofoga e pei o se “afi” e faapogaia ai ni aafiaga tumau iā i tatou. Ua ia folafola mai o le a ia faatasi ma i tatou ina ia mafai ona tatou “sopoʻia” na faafitauli. O le ā o le a faia e Ieova? O le a ia faatoʻafilemu o tatou faalogona popole ina ia mafai ona tatou faamaoni pea iā te ia, e tusa lava pe e oo ai iā i tatou le oti. (Isa. 41:13) Na faamaonia e Yoshiko lea na taʻua i le amataga le moni o lenā manatu. Ua faapea mai lana tama teine: “Na matou maofa i le toʻafilemu o lo matou tinā. E matou te mautinoa na foaʻi e Ieova le filemu o le mafaufau iā te ia. E oo lava i le aso na maliu ai, e talanoa lava o ia i fomaʻi ma tausimaʻi e faatatau iā Ieova ma ana folafolaga.” O le ā e tatou te aʻoaʻoina mai i le faaaʻoaʻoga a Yoshiko? Pe a tatou maufaatuatuaina le folafolaga a Ieova, “O le a ou faatasi ma oe,” o le a tatou maua foʻi le lototele ma le malosi a o tatou onosaia tulaga faigatā.

7-8. (a) O le ā le faamautinoaga lona lua o le a tatou iloiloina, ma o le ā lona uiga? (e) Aiseā na fetalai ai Ieova i tagata o Iuta na faaaunuua: “Aua e te atuatuvale”? (i) O ā upu o loo i le Isaia 46:3, 4 na faatoʻafilemu ai loto o tagata o le Atua?

⁷ Ia mātau le faamautinoaga lona lua na faamauina e Isaia: “Aua e te atuatuvale, auā o aʻu o lou Atua.” O le ā le uiga o lenā faamatalaga? I lenei fuaiupu, o le upu i le uluaʻi gagana mo le “atuatuvale,” e uiga atu i le “fai ma vaai i tua ona o le fefe neʻi iai se tasi e osofaʻia oe po o se mea e faamanuʻalia ai,” po o le “matuā popole ona o se tulaga lamatia.”

⁸ Aiseā na fetalai atu ai Ieova i tagata o Iuta o le a faaaunuua i Papelonia ina ia aua le “atuatuvale”? Talu ai na silafia e Ieova o le a fefefe tagata o lenā atunuu. Aiseā? Pe a lata ina faaiʻu tausaga e 70 e faaaunuua ai tagata o Iuta, o le a osofaʻia Papelonia e ʻautau malolosi a Metai ma Peresia. O le a faaaogā e Ieova lenā ʻautau e faasaʻoloto ona tagata mai i le nofo pologa i Papelonia. (Isa. 41:2-4) Ina ua iloa e tagata Papelonia ma atunuu na lata ane o le a osofaʻia i latou e le fili, na latou taumafai ina ia lototetele e ala i le faapea ane o le tasi i le isi: “Ia faamalosi.” Na latou faia isi tupua e tapuaʻi ai, ona na latou manatu e puipuia ai i latou. (Isa. 41:5-7) Peitaʻi, na faatoʻafilemu e Ieova loto o tagata o Iuta na faaaunuua e ala i le fetalai atu: “O oe Isaraelu e, [e lē pei o nuu tuaoi] o laʻu auauna . . . Aua e te atuatuvale, auā o aʻu o lou Atua.” (Isa. 41:8-10, NWT) Mātau, na fetalai Ieova: “O aʻu o lou Atua.” O na upu na faamautinoa atu ai e Ieova i ona tagata faamaoni e na te lē o faagaloina i latou, o lona uiga o loo avea pea o ia ma o latou Atua, ma avea i latou ma ona tagata. Na ia fetalai atu iā i latou: ʻOu te tauave ma laveaʻi iā te oe.’ O lenā faamautinoaga na faamalosia ai tagata o Iuta na faaaunuua.​—Faitau le Isaia 46:3, 4.

9-10. Aiseā e lē tatau ai ona tatou fefefe? Ia faataʻitaʻi.

⁹ Ua matuā faapopoleina tagata i aso nei ona o le faasolo ina leaga o le tulaga o le lalolagi. O le mea moni, o faafitauli foʻi na o loo tatou aafia ai. Peitaʻi, e lē tatau ona tatou fefefe. Ua fetalai mai Ieova: “O aʻu o lou Atua.” Aiseā e avea ai lenā faamatalaga o se māfuaaga malosi e tatou te maua ai pea le toʻafilemu?

¹⁰ Seʻi mafaufau i le faataʻitaʻiga lenei: O loo malaga Simi ma Peni i se vaalele na taia e matagi malolosi. A o lūlūina e matagi le vaalele, ae fai loa e le pailate le faasilasilaga: “Fusimau tou fusipaʻu. O le a tatou fetaiaʻi ma matagi malolosi mo sina taimi.” Na fefe Simi. Ae na toe faapea mai le pailate: “Aua tou te fefefe. O le tou pailate lenei.” Na lē fiafia Simi ma faapea ifo: “O ā  nei ituaiga o faamatalaga faapenei?” Peitaʻi, na ia mātauina e leai ma se fefe o Peni. O lea na ia fesili atu ai iā Peni: “Aiseā e te lē fefe ai?” Na toʻafilemu Peni ma fai mai iā te ia: “Ona ou te iloa lelei le pailate. O ia o loʻu tamā!” Na toe faapea mai Peni: “Seʻi oʻu tago e faamatala atu loʻu tamā. Ou te mautinoa pe a e malamalama iā te ia ma ona tomai, o le a e lē fefe foʻi.”

11. O ā lesona e tatou te aʻoaʻoina mai i le faataʻitaʻiga i ē na malaga i le vaalele?

¹¹ O ā lesona e tatou te aʻoaʻoina mai i lenei faataʻitaʻiga? E pei o Peni, e tatou te maua foʻi le toʻafilemu ona e tatou te iloa lelei lo tatou Tamā o Ieova. E tatou te iloa e na te taʻitaʻia ma le saogalemu i tatou a o tatou feagai ma faafitauli e pei o ni matagi malolosi, a o faagasolo aso e gata ai o lenei faiga o mea. (Isa. 35:4) O lo tatou maufaatuatuaina o Ieova, o le a tatou maua ai pea le toʻafilemu a o matuā matataʻu tagata o le lalolagi. (Isa. 30:15) O le a tatou pei foʻi o Peni, pe a tatou faailoa atu i tuaoi māfuaaga e tatou te maufaatuatuaina ai Ieova. O le a mafai ai ona latou mautinoa, e tusa po o ā luʻi e latou te fesagaʻia, o le a fesoasoani Ieova iā i latou.

12. (a) O le ā le faamautinoaga lona tolu o le a tatou iloiloina? (e) O le ā e faamanatu mai iā i tatou i le faaupuga o le “aao” o Ieova?

¹² O le faamautinoaga lona tolu lenei na faamauina e Isaia: “Ou te faamalosi iā te oe. Ou te matuā fesoasoani iā te oe.” Na faamatala e Isaia le auala e faamalosia ai e Ieova ona tagata e ala i le faapea mai: “O le a afio mai . . . Ieova e pei o lē e malosi, ma e pule lona aao mo ia.” (Isa. 40:10) E masani ona faaaogā i le Tusi Paia le upu “aao” e faasino atu i le malosi. O lea, o le faaupuga ʻe pule le aao o Ieova,’ e faamanatu mai ai o Ieova o se Tupu e malosi. Na ia faaaogā lona mana e lagolagoina ma puipuia ai  ana auauna i aso ua mavae, ma o loo ia faamalosia ma puipuia pea i latou e faatuatuaina o ia i aso nei.​—Teu. 1:30, 31; Isa. 43:10.

13. (a) O le ā le taimi e sili ona tausia ai e Ieova lana folafolaga e na te faamalosia i tatou? (e) O le ā le folafolaga e mafai ona tatou maua ai le malosi ma le lototele?

¹³ Pe a sauāina i tatou e o tatou fili, o le taimi lea e sili ona tausia ai e Ieova lana folafolaga lenei: “Ou te faamalosi iā te oe.” I nisi vaega o le lalolagi i aso nei, o loo taumafai o tatou fili e taofia le galuega talaʻi ma tafiesea la tatou faalapotopotoga. E ui i lea, e tatou te lē soona atuatuvale i na osofaʻiga. Ua foaʻi mai e Ieova iā i tatou le malosi ma le lototele, e ala i le folafola mai: “O so o se auupega ua faia e faasagatau iā te oe e lē manuia.” (Isa. 54:17) O lenā faamatalaga ua faamanatu mai ai iā i tatou ni manatu tāua se tolu.

14. Aiseā e lē faateʻia ai i tatou pe a osofaʻia i tatou e fili o le Atua?

¹⁴ Muamua, e faatalitalia e soo o Keriso e inosia i latou. (Mata. 10:22) Na valoia mai e Iesu o le a matuā sauāina ona soo a o faagasolo aso e gata ai. (Mata. 24:9; Ioa. 15:20) Lua, o le valoaga a Isaia ua lapataʻia ai i tatou e lē gata o le a ʻinoʻino mai o tatou fili, ae o le a latou faaaogāina foʻi auupega eseese e faasagatau mai ai. O na auupega e aofia ai tala pepelo e foliga mai e moni, pepelo taufaaleaga, ma sauāga faamoʻamoʻa. (Mata. 5:11) E lē taofia e Ieova o tatou fili mai i le faaaogāina o na auupega e faasagatau mai ai. (Efe. 6:12; Faaa. 12:17) Peitaʻi, e lē manaʻomia ona tatou fefefe. Aiseā?

15-16. (a) O le ā le manatu lona tolu e manaʻomia ona tatou manatua, ma e faapefea ona lagolagoina lenā manatu e le Isaia 25:4, 5? (e) O le ā se faamatalaga i le Isaia 41:11, 12 e faatatau i le iʻuga o ē e faasagatau mai iā i tatou?

¹⁵ Seʻi o tatou iloiloina le manatu lona tolu e manaʻomia ona tatou manatua. Na fetalai Ieova o so o se “auupega” e faasagatau mai iā i tatou “e lē manuia.” E pei lava ona puipui i tatou e se pā mai i timuga mamafa, e faapena foʻi ona puipuia i tatou e Ieova mai i “le ita o ē e sauā.” (Faitau le  Isaia 25:4, 5.) E lē taulau o tatou fili i le faia o se mea e tumau ona tatou afāina ai.​—Isa. 65:17.

¹⁶ Ua faamalosia foʻi e Ieova lo tatou maufaatuatuaina o ia, e ala i le faamatala auʻiliʻili mai o le iʻuga e oo iā i latou “e feita” iā i tatou. (Faitau le Isaia 41:11, 12.) E tusa po o ā taumafaiga a o tatou fili e faasagatau mai ai iā i tatou ma po o le ā foʻi le faigatā o la tatou tauiviga, ae e lē suia ai lava le mea o le a tupu: O fili o tagata o le Atua “o le a pei o se mea noa ma o le a faaumatia.”

17-18. (a) E faapefea i le faitauina o le Tusi Paia ona faamalosia ai lo tatou maufaatuatuaina o le Atua? Aumai se faataʻitaʻiga. (e) E faapefea ona fesoasoani iā i tatou le manatunatu loloto i le mau o le tausaga mo le 2019?

¹⁷ E faamalosia lo tatou maufaatuatuaina o Ieova e ala i le iloa lelei o ia. E pau le auala e tatou te iloa lelei ai Ieova o le faitau māeʻaeʻa o le Tusi Paia ma manatunatu loloto i ai. O loo iai i le Tusi Paia faamatalaga maufaatuatuaina e faatatau i auala na puipuia ai e Ieova ona tagata i le taimi ua teʻa. O na faamatalaga e tatou te mautinoa ai e tausia i tatou e Ieova.

¹⁸ Seʻi mafaufau i le faataʻitaʻiga manaia na faaaogā e Isaia e faamatala mai ai le auala e puipuia ai e Ieova i tatou. Na ia faatusa Ieova i se leoleo mamoe, ae faatusa auauna a le Atua i ni tamaʻi mamoe. Ua faapea mai Isaia e faatatau iā Ieova: “E na te aoaoina tamaʻi mamoe i lona aao; ma tauave mamoe i lona fatafata.” (Isa. 40:11) Pe a tatou lagona le opoina o i tatou e Ieova i ona aao malolosi, o le a tatou lagona le malupuipuia ma le toʻafilemu. Ina ia tatou maua pea le toʻafilemu e ui i faafitauli e tatou te fesagaʻia, ua filifilia ai e le pologa faamaoni ma le faautauta le Isaia 41:10 e avea ma mau o le tausaga mo le 2019, “Aua e te atuatuvale, auā o aʻu o lou Atua.” Ia manatunatu i lenā faamautinoaga. O le a mafai ona faamalosia ai oe a o e fesagaʻia luʻi e tulaʻi mai.