E ‘Manatu Mamafa Mai Ieova iā te Outou’
AISEĀ ua e mautinoa ai e moni na upu, ma e manatu mamafa moni mai Ieova iā te oe? O se tasi o māfuaaga, ona o loo taʻua patino lava i le Tusi Paia. Ua taʻua i le 1 Peteru 5:7: “Ia taʻu atu o outou popolega uma iā te ia, auā o loo manatu mamafa mai o ia iā te outou.” O ā faamaoniga e iloa ai e naunau mai Ieova le Atua iā te oe?
E SAUNIA E IEOVA MEA FAALETINO MO TAGATA
Ua faataatia e Ieova le faaaʻoaʻoga i le agalelei ma le limafoaʻi
O se tasi o vala, e iai i le Atua uiga ia e te manaʻo e maua i sau uō mamae. O i latou e feutagaʻi ma isi ma le agalelei ma le limafoaʻi, e masani ona avea i latou ma uō māfana. E faigofie ona e iloa e agalelei ma aao mafola Ieova i tagata i aso uma. Seʻi iloilo se faataʻitaʻiga: “[E] na te faaoso lona lā i ē e amioleaga ma ē e amiolelei, ma faatotō mai le timu i ē e amiotonu ma ē e amiolētonu.” (Mata. 5:45) O le ā le aogā o le lā ma le timu? O nei mea ua ʻfoaʻi mai ai e le Atua le anoanoaʻi o meaʻai ma ua tutumu ai o tatou loto i le olioli.’ (Galu. 14:17) Ioe, ua faamautinoa e Ieova ua lava meaʻai i le lalolagi e faafiafiaina ai i tatou.
Ae aiseā ua matelāina ai le toʻatele? Talu ai e masani ona uaʻi atu taʻitaʻi faaletagata ia maua le pule faapolotiki ma tupe faasili, nai lo o le faaleleia o olaga o tagata. Ua toeitiiti nei ona foʻia lea e Ieova le faafitauli o le manaʻo tele, e ala i le suia o faiga faapolotiki i le Malo faalelagi, lea o le a avea ai lona Alo ma Tupu. O le a lē toe iai se tasi e matelāina i lenā taimi. Ae i le taimi nei, o loo tausia e le Atua ana auauna faamaoni. (Sala. 37:25) Pe e lē o se faailoaga ea lenā o lona manatu mamafa mai?
E LĒ MANUMANU IEOVA I LONA TAIMI
Ua faataatia e Ieova le faaaʻoaʻoga i le lē manumanu i lona taimi
O sau uō lelei e faaalu lona taimi faatasi ma oe. E na te ono faaalu ni itula e te lua talanoa ai i mea e te lua fiafia ai. O se uō lelei foʻi, e faalogologo ma le faaeteete pe a faamatala atu ou faafitauli ma popolega. Pe e faapena le auala e uaʻi mai ai Ieova? Ioe, o le mea moni lenā. E tali mai o ia i a tatou tatalo. Ua faalaeiauina i tatou e le Tusi Paia ina ia “finafinau i le tatalo,” ma ia “tatalo e lē aunoa.”—Roma 12:12; 1 Tesa. 5:17.
O le ā le tele o le taimi e naunau Ieova e faafofoga mai ai i au tatalo? Ua aumai e se faaaʻoaʻoga mai i le Tusi Paia le tali. A o leʻi filifilia e Iesu ona aposetolo, “ua tatalo atu pea o ia i le Atua i le pō atoa.” (Luka 6:12) I lenā tatalo, na iloilo ai e Iesu igoa o ona soo, o latou uiga ma vaivaiga, ma ōle atu i lona Tamā mo se fesoasoani i le filifilia o i latou. Ina ua oso aʻe le lā i le aso na sosoo ai, na silafia e Iesu ua ia filifilia i latou e sili ona agavaa e auauna o ni ona aposetolo. E fiafia Ieova le “Faafofoga tatalo” e faafofoga i tatalo faamaoni uma. (Sala. 65:2) E tusa po o le ā le umi e tatalo ai se tasi i se mataupu o loo popole ai, e lē manumanu Ieova i le tele o le taimi e alu ai.
E LOTOMALIE LE ATUA E FAAMAGALO
Ua faataatia e Ieova le faaaʻoaʻoga i le lotomalie e faamagalo
E iai taimi e lē faigofie ai i ni faigāuō lelei ona faamagalo e le tasi le isi. I nisi taimi, ua faamuta faigāuō ua leva ona ua faigatā iā i latou ona faamagalo pea. Ae e lē faapena Ieova. Ua valaaulia e le Tusi Paia tagata lotofaamaoni uma ina ia ōle atu mo lana faamagaloga, “auā e na te matuā faamagaloina lava.” (Isa. 55:6, 7) O le ā ua uunaʻia ai le Atua e faamagalo atoatoa i tatou?
O le māfuaaga ona e lē mafaatusalia le alofa o le Atua. O lona alofa tele i le lalolagi ua ia aumaia ai lona Alo o Iesu, ina ia laveaʻia ai tagata mai i le agasala ma ona āuga. (Ioa. 3:16) Ae iai isi mea ua mafai ona faataunuuina i le togiola. E ala i le taulaga a Keriso, ua faamagalo atoatoa ai e le Atua i latou e alofa i ai. Na tusi le aposetolo o Ioane: “Afai e faailoa atu a tatou agasala, e faamaoni ma amiotonu o ia e na te faamagaloina a tatou agasala.” (1 Ioa. 1:9) Talu ai le faamagaloga a Ieova, ua mafai ai e tagata ona olioli pea i lana faauōga. O le iloaina o lenā mea e matuā pāʻia ai o tatou loto.
E FESOASOANI MAI PE A E MANAʻOMIA O IA
Ua faataatia e Ieova le faaaʻoaʻoga i le fesoasoani mai pe a manaʻomia o ia
O le uō moni e fesoasoani i isi pe a latou manaʻomia le fesoasoani. Pe e faia faapena e Ieova? Ua faapea mai lana Afioga: “Afai e paʻū o ia [se auauna a le Atua], e lē lafotuina i lalo, auā e taofia e Ieova lona lima.” (Sala. 37:24) E eseese auala e lagolago ai e Ieova ana auauna. Mātau le mea na tupu i le motu o St. Croix i le Atu Karipiane.
Sa feagai se teine talavou ma omiga mai i lana vasega, talu ai e leʻi faʻalo o ia i le fuʻa ona o māfuaaga faaletapuaʻiga. Ina ua uma ona tatalo iā Ieova mo le fesoasoani, na filifili o ia e taulima le mataupu. Na ia tusia lana lipoti e sosoo ai e faatatau i le faʻalo i le fuʻa. Na ia faaaogāina le tusi Laʻu Tusi o Tala o Le Tusi Paia ma faamatala le auala na fesoasoani ai le tala iā Sataraka, Mesako, ma Apeteniko i le faia o lana filifiliga. Na ia faapea atu: “Na puipuia e Ieova na Eperu e toʻatolu talu ai e latou te leʻi tapuaʻi i le tupua.” Ona ia ofo atu lea o tusi iā i latou sa auai, ma e toʻasefulu tasi tamaiti i lana vasega na mananaʻo i se kopi. Na matuā faafiafiaina le teine talavou, i lona iloaina o Ieova na foaʻia atu iā te ia le malosi ma le atamai, e molimau atu ai i se mataupu maʻaleʻale.
Pe afai e iai se taimi ua e masalosalo e lē o manatu mamafa mai Ieova iā te oe, ia manatunatu loloto i mau e pei o le Salamo 34:17-19; 55:22; ma le 145:18, 19. Ia fesili atu iā i latou ua loa ona avea ma Molimau e faatatau i le auala na tausia ai i latou e Ieova. Pe a e manaʻomia le fesoasoani a le Atua, ia tatalo atu iā te ia e faatatau i le mataupu. O le a toeitiiti ona e vaaia lea o le auala e faaalia ai e Ieova lona “manatu mamafa” iā te oe.
