NA OU ola aʻe i Graz i Oseteria. Na auina atu aʻu ou te aʻoga i se aʻoga faalelotu ina ua fitu oʻu tausaga. Peitaʻi, na ou vaaia amioga sili ona matagā i le va o patele ma taupousa. O lea, na faataga ai aʻu e loʻu tinā ina ia ou alu ese mai i lenā aʻoga a o leʻi atoa se tausaga.

Mulimuli ane, na ou auai i se aʻoga nofotumau. Ae i se tasi pō, na ave aʻu e loʻu tamā i se nofoaga saogalemu ona na tuʻi pomu lo matou nuu o Graz. Na matou sulufaʻi atu i le aai o Schladming. E leʻi leva ona matou taunuu i inā ma sopoʻia se auala laupapa, ae faatamaʻia loa e se pomu lenā auala laupapa. I se tasi aso, na tafana ai e ni vaalele i maʻua ma le tinā o loʻu tinā, a o ma iai i fafo o lo matou fale. Ina ua uma le taua, na foliga mai ua lē taulau taumafaiga a le lotu ma le malo e fesoasoani i tagata.

I le 1950, na faailoa atu ai e se Molimau a Ieova le feʻau o le Tusi Paia i loʻu tinā. Na ou faalogologo i a la talanoaga, ma auai faatasi ma loʻu tinā i nisi o sauniga a le faapotopotoga. Na papatiso loʻu tinā i le 1952, ina ua ia mautinoa o loo aʻoaʻoina e Molimau a Ieova le upu moni.

I lenā taimi, sa ou vaai i le faapotopotoga i lo matou vaipanoa e pei o se kalapu o loomatutua. Ae mulimuli ane, na ma asiasi atu i se faapotopotoga na toʻatele i talavou, ae e lē tumu i loomatutua. Na amata loa ona ou auai i sauniga uma i Graz, ma e leʻi umi ae ou talitonu o lea ua ou maua le upu moni. Na ou aʻoaʻoina foʻi, o Ieova o le Atua e na te lagolagoina e lē aunoa ana auauna. E faia faapea e Ieova e tusa lava pe e tatou te manatu ua tuua toʻatasi i tatou e feagai ma tulaga e sili ona faigatā.​—Sala. 3:5, 6.

Na ou naunau e faasoa atu le upu moni i isi tagata, ma na ou taulaʻi muamua i oʻu tei. O le taimi lenā ua tuua e oʻu uso matutua e toʻafā lo matou aiga ina ia faigaluega o ni faiaʻoga.  Na ou asia i latou i nuu eseese na nonofo ai, ma faalaeiau e suʻesuʻe i le Tusi Paia. Mulimuli ane, na faia faapea e loʻu tuagane ma oʻu uso e toʻalima ma avea ai i latou uma o ni Molimau a Ieova.

I le lua vaiaso talu ona ou talaʻi mai i lea fale i lea fale, na ou feiloaʻi ai i se fafine e silia i le 30 ona tausaga ma na amata ai la ma suʻesuʻega faale-Tusi Paia. Na agaʻigaʻi i luma lenei fafine ma papatisoina. Mulimuli ane, na papatiso foʻi lana tane ma la laʻua fanau tama e toʻalua. O lenā suʻesuʻega faale-Tusi Paia, na telē se aafiaga faaleagaga iā te aʻu. Aiseā? Talu ai e leʻi faia e se tasi saʻu suʻesuʻega faale-Tusi Paia. Na tatau ona ou sauniuni lelei mo lesona taʻitasi. Na ou faia faapea ina ia mafai ai ona aʻoaʻo muamua aʻu, ona ou aʻoaʻoina lea o laʻu tagata suʻesuʻe. O le iʻuga, na matuā faaloloto ai loʻu talisapaia o le upu moni. Iā Aperila i le 1954, na faailogaina ai loʻu tuuina atu iā Ieova e ala i le papatisoga.

Na ou auai i tauaofiaga faavaomalo i le 1955 na faia i Siamani, Falani, ma Egelani. A o oʻu iai i Lonetona, na ou feiloaʻi ai iā Albert Schroeder. O ia o se tasi o faiaʻoga i le Aʻoga Faale-Tusi Paia o Kiliata, ma na avea mulimuli ane o se sui o le Vaega Pule. A o alu la matou maimoaga i le falemataʻaga o le British Museum, na faasino mai ai e le uso o Schroeder nisi o manusikulipi o le Tusi Paia. O na manusikulipi na tusia ai le suafa o le Atua i mataʻitusi Eperu, ma na ia faamatala mai lo latou tāua. O lenā faamatalaga na aafia ai loʻu loto ma loʻu itu faaleagaga, ma matuā uunaʻia ai aʻu e faailoa atu upu moni o le Afioga a le Atua.

Na amata ona ou paeonia faataimi atoa iā Ianuari 1, 1956. I le fā masina mulimuli ane ai, na valaaulia aʻu e auauna o se paeonia faapito i Oseteria. E leʻi iai ni Molimau a Ieova i lenā taimi i Mistelbach, o le nuu na tofia aʻu e galue ai. Ae na iai se luʻi na tulaʻi mai. Na eseese o ma uiga ma laʻu paga paeonia. O aʻu o se talavou e leʻi atoa le 19 o tausaga na ola aʻe i le taulaga, ae o laʻu paga o se tuafafine e 25 tausaga na ola aʻe i se nuu maotua. Ou te fiafia e moe umi, ae fiafia laʻu paga e vave ala. E tuai foʻi ona ou moe i le pō, ae e fiafia laʻu paga e vave moe. E ui i lea, na mafai ona ma foʻia nei eseesega ma olioli e galulue faatasi o se paga paeonia, ona o le faatatauina o fautuaga mai i le Tusi Paia.

O le mea moni, na iai ni luʻi na sili atu ona faigatā. Na ma fetaiaʻi ma teteega, ae ʻe leʻi tuulafoaʻiina ai’ i maʻua. (2 Kori. 4:7-9) I se tasi aso a o ma talaʻi i oganuu maotua, na tatala mai ai e tagata a latou taʻifau. Na siʻomia e taʻifau lapopoʻa i maʻua a o ōu ma gū mai iā i maʻua. Na ma uulima ma si aʻu paga ma na ou tatalo e faapea: “Ieova, afai e osofaʻia i maʻua e maile, faamolemole ia ma feoti ma le filemu.” Peitaʻi ina ua latalata mai maile, sa na o le tutū ma tātā o latou siʻusiʻu, ma toe ō ese. Ioe, na ma talitonu ai na puipuia e Ieova i maʻua. Sa faaauau la ma talaʻiga i lenā nuu, ma na faafiafiaina i maʻua i le talilelei mai o tagata. Atonu na maofa i latou i le lē osofaʻia o i maʻua e maile, po o le faaauau foʻi o la ma talaʻiga e ui i lenā mea mataʻutia na tupu. Mulimuli ane, na avea nisi o i latou o ni Molimau a Ieova.

Na iai foʻi se isi mea na faateʻia ai i maʻua. I se tasi aso, na onā ai lē e ona le fale na ma  nonofo ai, ma folafola o le a ia fasiotia i maʻua ona o le faalavelave i tuaoi. Na fiu lana avā e faatoʻafilemu o ia. Na ma lagonaina mai i lo ma potu la laʻua finauga. Na vave ona ma gaoioi e tuu ni nofoa e poloka ai le faitotoʻa o lo ma potu, ma amata loa ona teu a ma atopaʻu. Ina ua ma tatalaina atu le faitotoʻa, na faateʻia i maʻua ona o loo tū mai le tamāloa i le fasitepu a o ia uuina se sapelu. Na ma sosola i le faitotoʻa i tua o le fale ma ui atu i le togālaau a o uu a ma atopaʻu. E ma te leʻi toe foʻi i lenā fale.

Na ma ō atu i se faletalimālō ma talosaga mo se potu. Na toetoe atoa le tausaga o ma nonofo i lenā faletalimālō, ma na telē se aogā i la ma faiva. Aiseā? Talu ai na tū le faletalimālō i le ogatotonu o le taulaga, ma na mananaʻo nisi o a ma suʻesuʻega faale-Tusi Paia e fai a latou suʻesuʻega i le faletalimālō. E leʻi umi ae fai la matou suʻesuʻega tautusi ma le suʻesuʻega faalevaiaso o Le Olomatamata i lo ma potu, ma e pe tusa e toʻa 15 ē na auai ai.

E silia ma le tausaga le umi sa ma nonofo ai i Mistelbach. Mulimuli ane, na tofia aʻu e galue i Feldbach, i le itu i saute i sasaʻe o Graz. Na sui laʻu paga paeonia, ma e leʻi iai se faapotopotoga i inā. Na ma nonofo i se tamaʻi potu i le fogāfale lona lua o se fale na fausia i laau. Talu ai na sao mai le savili i le va o laupapa o le potu, na ma taumafai ai e poloka le savili e ala i le tuu i ai o nusipepa. Sa tatau foʻi ona ma ō i se vaieli e asu mai ai vai. Ae na faamanuiaina a ma taumafaiga, ona na amataina ai se vaega i ni nai masina mulimuli ane. A o faagasolo tausaga, na ō mai ai i le upu moni ni tagata pe tusa ma le toʻa 30 mai i se aiga na matou suʻesuʻe.

O na mea na tutupu, na faaloloto ai loʻu talisapaia o le lagolagosua faaauau pea a Ieova i ē e faamuamua lona Malo. E tusa pe e lē mafai ona fesoasoani mai ni tagata, ae e mafai lava ona fesoasoani mai Ieova iā i tatou.​—Sala. 121:1-3.

Na faatulaga e uso se tauaofiaga faavaomalo e fai i le 1958 i le Aai o Niu Ioka, i le Yankee Stadium ma le Polo Grounds. Na ou talosaga ou te fia auai, ae na fesili mai le lālā i Oseteria po ou te fia auai i le vasega lona 32 o le Aʻoga o Kiliata. Maʻeu se faaeaga o le a ou mauaina! O lea, na vave ona ou tali atu, “Ioe!”

A o faagasolo le aʻoga, na ou nofo i autafa o Martin Poetzinger. E tele tofotofoga ogaoga  na onosaia e Martin i nofoaga o faasalaga mamafa a le ʻau Nasi. Mulimuli ane, na auauna foʻi o ia o se sui o le Vaega Pule. A o faagasolo nisi o vasega, na musumusu mai Martin e faapea, “Erika, o le ā le faa-Siamani o lenā manatu?”

Na faasilasila e Nathan Knorr o matou tofiga ina ua oo i le ogatotonu o le aʻoga. Na tofia aʻu e galue i Paraguay. Talu ai na ou talavou i lenā taimi, na manaʻomia ai le faatagaga a loʻu tamā ina ia ou ulu atu ai i Paraguay. Ina ua maua le faatagaga a loʻu tamā, na ou taunuu loa i Paraguay iā Mati, 1959. Na tofia i maʻua ma laʻu paga fou e nonofo i se fale misionare i Asunción.

E leʻi umi ae ou feiloaʻi iā Walter Bright, o se misionare na faauu mai le vasega lona 30 o Kiliata. Na ma faaipoipo mulimuli ane, ma galulue faatasi e faafetaiaʻia luʻi o le olaga. O so o se taimi lava e tulaʻi mai ai se faafitauli faigatā, e ma te faitau i le folafolaga a Ieova o loo i le Isaia 41:10: “Aua e te fefe, auā ou te faatasi ma oe. Aua e te vaai solo, auā o aʻu o lou Atua. Ou te faamalosi iā te oe.” Ua faamautinoa mai e lenei mau, e lē taitai tuulafoaʻia i tatou e Ieova pe a faaauau ona tatou faamaoni iā te ia, ma faamuamua lona Malo.

Na tofia mulimuli ane i maʻua e galulue i se oganuu e lata i le tuaoi o Pasili. A o ma iai i inā, na faaosooso e taʻitaʻi lotu le ʻautalavou e tauʻai i maa le fale misionare, lea ua amata ona tuai. O le taimi foʻi lenā na suʻesuʻe ai Walter ma le taʻitaʻi o leoleo. Na faamautinoa e le taʻitaʻi o leoleo na puipuia e leoleo lo ma fale mo le vaiaso atoa, ma e leʻi toe faalavelave mai ni tagata tetee iā i maʻua. E leʻi umi ae ma siitia atu loa i se nofoaga saogalemu i le isi itu o le tuaoi o Pasili. O lenei gaoioiga poto na mafai ai ona fai a matou sauniga i Paraguay ma Pasili. E lua ni faapotopotoga lāiti na iai ina ua ma ō ese mai i lenā tofiga.

Na fai mai fomaʻi ou te lē fanau, o lea na faateʻia ai i maʻua ina ua ou tō i le 1962. Na iʻu ina ma faamautū i Hollywood i Florida, e lata i le aiga o Walter. E leʻi mafai ona ma paeonia ma Walter mo ni nai tausaga, ona na tausi lo ma aiga. E ui i lea, na faaauau pea ona faamuamua i o ma olaga manaʻoga o le Malo.​—Mata. 6:33.

Ina ua ma taunuu i Florida iā Novema 1962, na faateʻia i maʻua ina ua ma iloa na fai ese sauniga a uso uli mai i uso papaʻe ma na eseese foʻi vaipanoa na latou talaʻi ai. Na māfua lenei tulaga ona o le faailogalanu o tagata o le vaipanoa. Talu ai e lē faailogalanu Ieova, e leʻi umi ae fai faatasi sauniga a uso papaʻe ma uso uli i faapotopotoga. Na faamaonia le lagolagoina e Ieova o lenei faatulagaga, ona ua tele faapotopotoga ua iai i aso nei i lenā vaipanoa.

O le mea e faanoanoa ai, ona na maliu Walter i le 2015 i le kanesa o le faiʻai. O ia o se tane lelei e alofa iā Ieova ma na fesoasoani i le toʻatele o uso. Na ma faaipoipo mo le 55 tausaga. Ou te tulimataʻia le taimi e ma te toe feiloaʻi ai ma Walter pe a toetū mai i le soifua lelei atoatoa.​—Galu. 24:15.

Ou te lotofaafetai iā Ieova ona e silia i le 40 tausaga o oʻu auai i le auaunaga faataimi atoa, ma ua ou tofo i le tele o le olioli ma faamanuiaga. O se faataʻitaʻiga, na ma molimauina ma Walter le papatisoga o le toʻa 136 o a ma suʻesuʻega faale-Tusi Paia. E moni na iai ni tulaga faigatā na tulaʻi mai. Peitaʻi, e lē o ni māfuaaga na e taofia ai la ma auaunaga i lo tatou Atua faamaoni. Nai lo o lea, na atili ai ona ma mafuta vavalalata atu iā te ia. Na ma faatuatuaina foʻi o ia e na te taulima faafitauli i lana taimi ma lana auala. E mautinoa e na te faia faapea!​—2 Timo. 4:16, 17.

E ui lava i loʻu matuā misia o Walter, ae e fesoasoani laʻu paeonia iā te aʻu. O le mea e aogā tele iā te aʻu, o le aʻoaʻoina lea o isi ma faasoa atu iā i latou le faamoemoe o le toetū. O le mea moni, e lē mafaitaulia le tele o auala e leʻi tuulafoaʻia ai aʻu e Ieova. E faamaoni o ia i lana folafolaga e na te tausia, faamalosia, ma matuā lagolagoina aʻu i lona “lima taumatau o le amiotonu.”​—Isa. 41:10.